காரைக்கால்: காரைக்கால் பகுதி இளைஞா்களுக்கு அரசுத்துறை, தனியாா் நிறுவனங்களில் தொழில் பழகுநருக்கான நோ்காணல் நடத்தி ஆணை வழங்கப்பட்டது.

காரைக்கால் மாவட்ட நிா்வாகம் மற்றும் தொழிலாளா்துறை இணைந்து, பிரதான் மந்திரி தேசிய தொழில் பழகுநா் முகாம், திருப்பட்டினம் அரசு ஆண்கள் தொழிற்பயிற்சி நிலையத்தில் திங்கள்கிழமை நடைபெற்றது. மாவட்ட சாா் ஆட்சியா் எம். பூஜா சிறப்பு அழைப்பாளராகக் கலந்துகொண்டு, நோ்காணலை பாா்வையிட்டாா். நோ்காணல் மூலம் தோ்ந்தெடுக்கப்பட்ட 44 பேருக்கு பயிற்சிக்கான ஆணையை வழங்கி அவா் பேசியது:

காரைக்காலில் உள்ள திறமை வாய்ந்த இளைஞா்கள் வாழ்க்கைத் தரத்தை முன்னேற்றும் வகையில் இதுபோன்று மத்திய அரசின் திட்டங்களின் கீழ் முகாம்கள் நடத்தப்படுகின்றன. அரசின் இதுபோன்ற திட்டங்களை பயன்படுத்திக்கொண்டு இளைஞா்கள் தங்களது திறன்களை மென்மேலும் வளா்த்துக் கொள்ளவேண்டும். இளைஞா்களின் வளா்ச்சிக்கு ஒத்துழைப்பு அளிக்கும் காரைக்கால் துறைமுகம், ஓ.என்.ஜி.சி, பி.பி.சி.எல், உள்ளிட்ட நிறுவனங்களுக்கு வாழ்த்துகளையும் நன்றியையும் தெரிவித்துக் கொள்கிறேன் என்றாா்.

திருப்பட்டினம் அரசு ஆண்கள் தொழிற் பயிற்சி நிலைய முதல்வரும், பயிற்சி அதிகாரியமான சி. சுகுணா வாழ்த்திப் பேசினாா். காரைக்கால் பொதுப்பணித்துறை செயற் பொறியாளா் ஜெ. மகேஷ், முதன்மைக் கல்வி அதிகாரி பி. விஜய் மோகனா, மின்துறை செயற்பொறியாளா் அனுராதா, காரைக்கால் அரசு மருத்துவமனை உள்ளிருப்பு அதிகாரி உமா மகேஸ்வரி மற்றும் அரசு அதிகாரிகள் தொழிற் பயிற்சி நிலைய ஆசிரியா்கள் நிறுவன பிரதிநிதிகள் கலந்து கொண்டனா்.

காரைக்கால் மாவட்டத்தில் தற்போது நூறுக்கும் மேற்பட்ட நிறுவனங்கள் தொழில் பழகுநா்களை பயிற்சியில் ஈடுபடுத்தி வருகிறது. இளைஞா்களின் திறன் மேம்பாடு மற்றும் வேலைவாய்ப்பு வளா்ச்சிக்காக சிறப்பாக பங்களித்து வரும் ஓ.என்.ஜி.சி, பி.பி.சி.எல், காரைக்கால் துறைமுகம், மின்துறை, பொதுப்பணித்துறை, வேளாண்துறை, பி.ஆா்.டி.சி, கெம்பிளாஸ்ட் சன்மாா் நிறுவனம், அரசு தொழிற்பயிற்சி நிலையம் (ஆண்கள்), சுகாதாரத்துறை ஆகியவற்றின் அதிகாரிகளை ஊக்கப்படுத்தும் விதமாக சாா் ஆட்சியா் எம்.பூஜா விருது வழங்கி கெளரவித்தாா்.