புதுவையில் ஆசிரியா்கள் கண்டித்ததால், வெளியூருக்கு ரயிலில் சென்ற பள்ளி மாணவா்கள், மயிலாடுதுறையில் புதன்கிழமை இரவு மீட்கப்பட்டனா்.

புதுச்சேரியில் அரசு உதவி பெறும் உயா்நிலைப் பள்ளி ஒன்றில் 9-ஆம் வகுப்பு படிக்கும் 3 போ் புதன்கிழமை பள்ளி முடிந்து வீடு திரும்பவில்லை.

இதுகுறித்து, மாணவா்களின் பெற்றோா் அளித்த புகாரின்பேரில், புதுச்சேரி நகர காவல் நிலைய போலீஸாா் விசாரணை மேற்கொண்டனா். 3 மாணவா்களும் புதுச்சேரியில் இருந்து ரயிலில் விழுப்புரம் சென்று, அங்கிருந்து மயிலாடுதுறை மாா்க்கமாக செல்லும் ரயிலில் செல்வதாக போலீஸாருக்கு தகவல் கிடைத்தது.

இம்மாணவா்களை மீட்க, திருச்சி ரயில்வே எஸ்பி பி. ராஜன், மயிலாடுதுறை ரயில்வே இருப்புப் பாதை போலீஸாருக்கு உத்தரவிட்டாா். அதன்பேரில், காவல் உதவி ஆய்வாளா் எஸ். ராஜு, தனிப்பிரிவு தலைமை காவலா் ஆா். பதி மற்றும் போலீஸாா் தாம்பரத்திலிருந்து ராமேசுவரம் சென்ற ரயிலில் சோதனை செய்து மாணவா்களை மீட்டனா்.

ஆசிரியா்கள் படிக்க சொல்லி கண்டித்தது பிடிக்காததால், பள்ளி முடிந்தபிறகு வீட்டுக்கு திரும்பாமல், மூன்று மாணவா்களும் ஊரைவிட்டு ஓடிப்போக முடிவெடுத்து, ரயிலில் ராமேசுவரம் நோக்கி சென்றது தெரியவந்தது.

மாணவா்கள் மீட்கப்பட்ட தகவலறிந்த பெற்றோா் மயிலாடுதுறை ரயில் நிலையத்துக்கு வந்து, மாணவா்களை அழைத்துச் சென்றனா். அவா்களுக்கு அறிவுரை கூறி ரயில்வே போலீஸாா் அனுப்பி வைத்தனா்.