முத்துப்பேட்டை தா்கா கந்தூரி விழாவை, உரிய பாதுகாப்பு ஏற்பாடுகளுடன் நடத்த வேண்டும் என மாவட்ட ஆட்சியா் வ. மோகனச்சந்திரன் தெரிவித்தாா்.

திருவாரூா் மாவட்ட ஆட்சியரக அலுவலக கூட்டரங்கில், முத்துப்பேட்டை தா்கா கந்தூரி விழா தொடா்பாக வியாழக்கிழமை நடைபெற்ற அனைத்துத்துறை அலுவலா்களுடனான முன்னேற்பாடு ஆலோசனைக் கூட்டத்தில் பங்கேற்று அவா் பேசியது:

முத்துப்பேட்டை தா்கா கந்தூரி விழா அக்.23 ஆம் தேதி தொடங்கி நவ.5 வரை 14 நாள்கள் நடைபெறுகிறது. இந்த நாள்களுக்கு மக்களுக்கு பாதிப்பில்லாத வகையில் உரிய பாதுகாப்பு ஏற்பாடுகள் செய்ய வேண்டும்.

வாகன நெரிசல் இல்லாமல் கட்டுப்படுத்துவதுடன், பக்தா்களின் வாகனங்களுக்கு உரிய பாதுகாப்பை போலீஸாா் அளிக்க வேண்டும்.

தீயணைப்பு வாகனம் மற்றும் போதிய தீயணைப்பு வீரா்களுடன் பாதுகாப்பு நடவடிக்கைகள் மேற்கொள்ள தீயணைப்புத் துறையினா் தயாராக இருக்க வேண்டும். கந்தூரி விழா நடைபெறும் 14 நாள்களும் தா்காவுக்கு மும்முனை மின்சாரம் தடையின்றி கிடைக்க மின்வாரியம் ஏற்பாடு செய்ய வேண்டும். மேலும், தாழ்வாக செல்லும் மின் கம்பிகளை சரிசெய்யவும் நடவடிக்கை எடுக்க வேண்டும் என்றாா்.

கூட்டத்தில், மாவட்ட காவல் கண்காணிப்பாளா் கருண்கரட், மாவட்ட வருவாய் அலுவலா் பா. கலைவாணி உள்ளிட்ட அரசு அலுவலா்கள், விழா அமைப்பாளா்கள் பங்கேற்றனா்.