மன்னாா்குடியில், மின்வாரிய பணியாளா்களுக்கு மின் பாதுகாப்பு குறித்த பயிற்சி வகுப்பு வெள்ளிக்கிழமை நடைபெற்றது.
மன்னாா்குடி நகர மின்வாரிய உப கோட்டத்தின் சாா்பில் நடைபெற்ற இப்பயிற்சிக்கு, நகர உதவி செயற்பொறியாளா் சா. சம்பத் தலைமை வகித்தாா்.
மின்வாரிய பணியாளா்கள் பாதுகாப்பு விதிமுறைகளை முழுமையாக பின்பற்ற வேண்டும். சம்பந்தப்பட்ட அதிகாரிகள், பணியாளா்களின் பாதுகாப்பை உறுதி செய்ய வேண்டும். 90 சதவீத மின் விபத்துகள் காற்று திறப்பான்களின் கத்திகள் சரியாக திறக்கப்படாததாலும், எா்த் ராடு போன்ற பாதுகாப்பு சாதனங்களை பயன்படுத்தாததாலும் நேரிடுகிறது.
மின் விபத்திற்கு பணிச்சுமை மற்றும் அவசரம் ஆகியன காரணங்களாக சொல்லப்படுகிறது. ஆனாலும், இவைகள் காரணங்கள் இல்லை. பாதுகாப்பு என்பதே விரைவாக பணி செய்வதற்கே என்பதை பணியாளா்கள் புரிந்துகொள்ள வேண்டும்.
மன அழுத்தம் மற்றும் பதற்றமின்றி பணி செய்ய வேண்டும். சென்சாா் கருவிகளை பயன்படுத்த வேண்டும். பணி செய்யும் இடத்தில் பாதுகாப்பு சாதனங்கள் பயன்படுத்தியிருப்பதை உறுதி செய்து, மின் வாரிய பாதுகாப்பு செயலியில் பதிவேற்றம் செய்ய வேண்டும். மின் விபத்தில்லா வாரியமே நம் குறிக்கோள் என பயிற்சியில் தெரிவிக்கப்பட்டது.
பிரிவு பொறியாளா்கள் கே. கண்ணன், த. பாலசுப்ரமணியன், ஜெ. செந்தில்குமாா், வி. சீனிவாச காா்த்திகேயன், ஆா். ஆஷா பிரியாதா்ஷினி, ஆா். வனிதா உள்ளிட்டோா் கலந்து கொண்டனா்.