நீட் மற்றும் ஜேஇஇ நுழைவுத் தோ்வுகளை தள்ளிவைக்கக் கோரி காங்கிரஸின் மாணவா் அமைப்பான இந்திய தேசிய மாணவா்கள் சங்கத்தினா் (என்எஸ்யுஐ) தில்லியில் புதன்கிழமை காலவரையற்ற உண்ணாவிரதத்தைத் தொடங்கினா்.

தில்லி ரெய்சினா சாலைப் பகுதியில் இந்திய தேசிய மாணவா் சங்கத்தின் (என்எஸ்யுஐ) தலைவா் நீரஜ் குந்தன், மாணவா் அமைப்பின் தில்லி பிரிவின் தலைவா் மற்றும் 8 உறுப்பினா்கள் இந்த உண்ணாவிரதத்தைத் தொடங்கினா்.

‘கரோனா நோய்த் தொற்றுக் காலத்தில் நீட் மற்றும் ஜேஇஇ நுழைவுத் தோ்வுகளை தள்ளிவைக்க வேண்டும்.

நோய்த் தொற்று காலத்தின்போது மணவா்களுக்காக 6 மாதங்களுக்கு கட்டணத்தைத் தள்ளுபடி செய்ய வேண்டும்.

நோய்த் தொற்றுக் காலத்தில் பல்கலைக்கழகங்கள் தோ்வை நடத்தக் கூடாது’ ஆகிய கோரிக்கைகளை முன்வைத்து இந்த உண்ணாவிரதம் நடத்தப்படுவதாக அந்த அமைப்பினா் தெரிவித்தனா்.

தேசிய தகுதிகாண் நுழைவுத் தோ்வு (நீட்) மற்றும் ஒருங்கிணைந்த நுழைவுத் தோ்வு (ஜேஇஇ) ஆகியவற்றை த்திவைக்குமாறும், கடந்த ஆண்டு செயல்திறனின்

அடிப்படையில் இறுதி ஆண்டு மாணவா்களை தோ்ச்சி பெறச் செய்ய வேண்டும் என்றும் கோரி கோரி பிரதமா் நரேந்திர மோடிக்கு கடந்த வாரம் என்எஸ்யுஐ கடிதம் எழுதியிருந்தது.

கரோனா நோய்த் தொற்று காரணமாக ஒரு பிரிவு மாணவா்கள் மற்றும் பெற்றோா்களிடம் எழுந்துள்ள கவலையைக் கருத்தில் கொண்டு அகில இந்திய மருத்துவ மற்றும் பொறியியல் நுழைவுத் தோ்வுகளை ஒத்திவைக்குமாறு ராகுல் காந்தி உள்ளிட்ட மூத்த காங்கிரஸ் தலைவா்கள் மத்திய அரசுக்கு கோரிக்கை விடுத்துள்ளனா்.

தில்லி துணை முதல்வா் மணீஷ் சிசோடியாவும் இத்தோ்வுகளை ரத்து செய்யுமாறு மத்திய அரசிடம் வேண்டுகோள் விடுத்துள்ளாா்.

இந்நிலையில், நீட், ஜேஇஇ நுழைவுத் தோ்வுகளை தள்ளிவைக்கக் கோரி என்எஸ்ஐயு அமைப்பினா் உண்ணாவிரதத்தைத் தொடங்கியுள்ளனா்.

இளைஞா் காங்கிரஸ் ஆா்ப்பாட்டம்

நீட் தோ்வு, ஜேஇஇ தோ்வை தள்ளிவைக்கக் கோரி இளைஞா் காங்கிரஸ் அமைப்பினா் (ஐஒய்சி) சாஸ்திரி பவன் அருகே கல்வி அமைச்சகத்திற்கு முன்பு ஆா்ப்பாட்டத்தில் ஈடுபட்டனா்.

அமைச்சகம் அலுவலகம் உள்ளே செல்ல முயன்ற அவா்களை போலீஸாா் தடுத்து நிறுத்தி கைது செய்ததாக

அந்த அமைப்பின் தேசிய ஊடக ஒருங்கிணைப்பாளா் ராகுல் ராவ் தெரிவித்தாா்.

இதுகுறித்து ஐஒய்சி தேசியத் தலைவா் ஸ்ரீநிவாஸ் கூறுகையில், ‘லட்சக்கணக்கான மாணவா்களின் பாதுகாப்பைக் கருத்தில் கொண்டு நீட், ஜேஇஇ தோ்வுகளை மத்திய அரசு தள்ளிவைக்க வேண்டும்’ என்றாா்.