தோவாளையில் புதிதாக கட்டப்பட்டு வரும் பாலத்தில் கார் மோதி விபத்துக்குள்ளானதில் ஓட்டுநர் பலத்த காயமடைந்தார்.
நாகர்கோவில்- ஆரல்வாய்மொழி தேசிய நெடுஞ்சாலையில் தோவாளை அரசு மேல்நிலைப் பள்ளி அருகே குறுகலாக இருந்த பாலத்தின் விரிவாக்கப் பணி நடைபெற்று வருகிறது. இப்பணிக்காக சாலையின் இருபுறமும் ஜல்லி, மண் கொட்டப்பட்டிருந்தன. வாகனங்கள் செல்வதற்கு அருகிலேயே அணுகு சாலை அமைக்கப்பட்டுள்ளது.
இந்நிலையில் புதன்கிழமை அதிகாலை 2 மணியளவில் நாகர்கோவிலில் இருந்து திருநெல்வேலிக்கு சென்றுகொண்டிருந்த கார் எதிர்பாராமல் அணுகு சாலையை விட்டு விலகி ஜல்லி, மண் குவிக்கப்பட்டுள்ள பகுதிக்குள் புகுந்து விபத்துக்குள்ளானது. இதில், பலத்த காயமடைந்த கார் ஓட்டுநர் பேச்சிமுத்து (26) ஆசாரிப்பள்ளம் அரசு மருத்துவமனையில் அனுமதிக்கப்பட்டார்.