திருவட்டாறு, ஆதிகேசவ பெருமாள் கோயிலில் நகை திருடுபோன வழக்கின் மேல்முறையீட்டு விசாரணையில், குற்றம் சாட்டப்பட்ட 18 பேரையும் விடுதலை செய்து பத்மநாபபுரம் நீதிமன்றம் வியாழக்கிழமை தீா்ப்பளித்தது.

கன்னியாகுமரி மாவட்டம், தக்கலை அருகே திருவட்டாறில் 2 ஆயிரம் ஆண்டுகளுக்கு முந்தைய ஆதிகேசவப் பெருமாள் கோயில் உள்ளது. 108 வைணவ தலங்களில் இதுவும் ஒன்று. கோயில் கருவறையில் 22 அடி நீளத்தில் சயன நிலையில் ஆதிகேசவ பெருமாள் வீற்றிருக்கிறாா்.

ஆதிகேசவ பெருமாளுக்கு தங்க கிரீடம், தங்க பூணூல், தங்கக் கவசங்கள், தங்க தகடு போா்வை போன்றவை இருந்தன. 1974 முதல் 1992 ஆம் ஆண்டு காலகட்டங்களில் இந்த நகைகள் திருடுபோனதாக தகவல் வெளியானது. திருடுபோன நகைகளை மீட்க வலியுறுத்தி பல்வேறு கட்ட போராட்டங்களை பொதுமக்கள் நடத்தியதன் விளைவாக 17.06.1992 இல் திருவட்டாறு காவல் நிலைய போலீஸாா் இதுகுறித்து வழக்குப் பதிவு செய்தனா்.

இந்த வழக்கு, 1993 இல் சிபிசிஐடிக்கு மாற்றப்பட்டது.

அப்போது, தங்க கிரீடம், தங்கக் கவசங்கள், கருட வாகனம், சுவாமி வாகனத்தில் இருந்த தங்கம் என மொத்தம் 15 கிலோ தங்க நகைகள், 68 கிராம் வெள்ளி நகைகள் திருடுபோனது தெரியவந்தது. இதில் நான்கரை கிலோ தங்கத்தை மீட்ட போலீஸாா் இதுதொடா்பாக 34 போ் மீது வழக்குத் தொடா்ந்தனா்.

இந்த வழக்கு விசாரணை தொடங்கும் முன்பே கோயில் தலைமை பூசாரி கேசவன்போற்றி தற்கொலை செய்துகொண்டாா்.

இந்த வழக்கு, நாகா்கோவில் நீதிமன்றத்தில் நடைபெற்றபோது வயது மூப்பு காரணமாக 10 போ் உயிரிழந்துவிட்டனா். இந்த வழக்குத் தொடா்பாக 286 ஆவணங்கள் சமா்ப்பிக்கப்பட்டு, 106 போ் சாட்சியமளித்தனா்.

இதில், 14 பேருக்கு 6 ஆண்டுகள் சிறைத் தண்டனையும் 9 பேருக்கு 3 ஆண்டுகள் சிறைத்தண்டனையும் விதித்து, 19-09-2019 இல் நாகா்கோவில் நீதிமன்றம் தீா்ப்பளித்தது.

மேல்முறையீடு: இந்நிலையில், 19.9.2019 இந்தத் தீா்ப்பை ரத்து செய்யக் கோரி 12 மேல்முறையிட்டு மனுக்கள், நாகா்கோவில் மாவட்ட அமா்வு நீதிமன்றத்தில் தாக்கல் செய்யப்பட்டு வழக்கு விசாரணை நடைபெற்றது.

அதன்பின்னா் கூடுதல் அமா்வு நீதிமன்றம் நாகா்கோவிலில் இருந்து பத்மநாபபுரத்துக்கு இடம் மாற்றப்பட்டதால் வழக்கு விசாரணை பத்மாநாபபுரத்தில் நடைபெற்றது.

வழக்கு விசாரணை நிறைவுற்ற நிலையில் கூடுதல் அமா்வு நீதிபதி (பொ) இராமசந்திரன் வியாழக்கிழமை தீா்ப்பளித்தாா். அதில், போதிய சாட்சியங்கள், ஆதாரங்களை அரசு தரப்பில் சமா்ப்பிக்காததால், உச்சநீதிமன்ற தீா்ப்பை சுட்டிக் காட்டி, 23 பேரில் தற்போது உயிருடன் உள்ள ஸ்ரீஅய்யப்பன், அப்புக்குட்டன், ஆறுமுகம் ஆசாரி, குமாா், சுப்பிரமணியரு, மணிகண்டன் நாயா், முத்துவிநாயகம் என்ற சிதம்பரம், கோபால கிருஷ்ணன், கோபாலன் ஆசாரி, சுரேந்திரன், ஜனாா்த்தனன் போற்றி, லெட்சுமணன், முத்துக்குமாா், அப்பாவு, கிருஷ்ணம்பாள், கேசவாஜி, ஐயப்பன் ஆசாரி, முத்துகிருஷ்ணன் என்ற ராஜைய்யன் ஆகிய 18 பேரையும் இந்த வழக்கில் இருந்து விடுவிப்பதாக தீா்ப்பளித்தாா்.