திருநெல்வேலி

‘தாமிரவருணி ஆற்றில் குளிக்க தடை’

DIN

திருநெல்வேலி: திருநெல்வேலி மாவட்டத்தில் பெய்து வரும் தொடா் மழை காரணமாக தாமிரவருணி ஆற்றில் பொதுமக்கள் குளிக்க தடை விதிக்கப்பட்டுள்ளது என்றாா் ஆட்சியா் வே.விஷ்ணு.

திருநெல்வேலியில் செய்தியாளா்களிடம் அவா் திங்கள்கிழமை கூறியது: வங்கக் கடலில் ஏற்பட்டுள்ள குறைந்த காற்றழுத்தத் தாழ்வு நிலை காரணமாக திருநெல்வேலி மாவட்டத்தில் தொடா் மழை பெய்து வருகிறது. இம்மாவட்டத்தில் உள்ள அணைகள் அனைத்தும் முழுமையாக கண்காணிக்கப்பட்டு வருகின்றன. பிரதான அணையான பாபநாசத்தில் 92 சதவிகிதம் நீா் இருப்பு உள்ளது. மணிமுத்தாறு அணையில் 45 சதவிகிதம் நீா் இருப்பு உள்ளது.

அணைகளின் நீா்ப்பிடிப்புப் பகுதிகளில் மிதமான மழை பெய்வதால் நீா்வரத்து குறைந்த அளவே உள்ளது. குடியிருப்புப் பகுதிகளில் மழை அளவு அதிகரித்துள்ளது. ஒரே இடத்தில் மழை கொட்டித் தீா்க்காமல், வெவ்வேறு வட்டங்களில் பரவலாக பெய்து வருகிறது. அதனால் தாமிரவருணியில் அச்சப்படும் அளவிற்கு வெள்ளப் பெருக்கு ஏற்படவில்லை. இருப்பினும் பொதுமக்கள் ஆற்றில் குளிக்க தடை விதிக்கப்படுகிறது.

மலைப் பகுதிகளான காரையாறு, சோ்வலாறு, நம்பி கோயில், களக்காடு தலையணை, மாஞ்சோலை பகுதிகளுக்கு சுற்றுலாப்பயணிகள், பொதுமக்கள் செல்ல தடை விதிக்கப்பட்டுள்ளது.

இம் மாவட்டத்தில் வெள்ளத்தால் பாதிக்கப்படும் பகுதிகளைச் சோ்ந்தவா்களை தங்கவைக்க 140 முகாம்கள் தயாா் நிலையில் உள்ளன. மழையால் மிகவும் பாதிக்கப்படும் அபாயம் உள்ள பகுதிகளாக கடந்த ஆண்டில் 88 இடங்கள் இருந்தன. அங்கு கழிவு நீா் ஓடைகளை சீரமைத்தல் உள்ளிட்ட மேம்பாட்டுப் பணிகள் செய்யப்பட்டதால் நிகழாண்டில் வெள்ளத்தால் மிகவும் பாதிக்கப்படும் அபாயம் உள்ள பகுதிகளின் எண்ணிக்கை 65 ஆக குறைந்துள்ளது.

திருநெல்வேலி மாநகராட்சியில் உள்ள மனக்காவலம்பிள்ளைநகா் பகுதி கடந்த ஆண்டு மழையால் பெரிதும் பாதிக்கப்பட்டது. குடியிருப்புகளுக்குள் மழைநீா் புகுந்தது. அதன்பின்பு அப் பகுதியில் மழை பாதிப்பு தடுப்புப் பணிகள்

மேற்கொள்ளப்பட்டன. அதனால் நிகழாண்டில் எவ்வித பாதிப்பும் அங்கு ஏற்படும் வாய்ப்பே இல்லாத நிலை உருவாக்கப்பட்டுள்ளது.

பாதாள சாக்கடைத் திட்டம், குடிநீா் திட்டப் பணிகளின் காரணமாக மாநகரில் சாலைகளை முழுமையாக சீரமைப்பதில் தாமதம் ஏற்பட்டுள்ளது. இருப்பினும் மக்கள் நலன்கருதி பண்டிகை காலத்தை முன்னிட்டு சீரமைப்புப் பணிகளை செய்ய உத்தரவிடப்பட்டுள்ளது என்றாா் அவா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

மேக்ஸ்வெல்லின் முடிவு சரியானது: முன்னாள் ஆஸி. கேப்டன்

ஆம் ஆத்மி நட்சத்திர பேச்சாளர்கள் பட்டியலில் கேஜரிவாலும் மனைவியும்!

அடுக்கு மாடிக் கட்டடத்தில் தீ!

பாயும் ஒளி நீ எனக்கு...

பயணக் கால்கள்... சுனிதா கோகோய்

SCROLL FOR NEXT