திருநெல்வேலி மாவட்டத்தில் பருவமழை நோய்களைத் தடுக்க தொடா் கண்காணிப்புகளை செய்ய சுகாதாரம் மற்றும் உள்ளாட்சித் துறைகளுக்கு உத்தரவிடப்பட்டுள்ளது என்றாா் மாவட்ட ஆட்சியா் இரா.சுகுமாா்.

திருநெல்வேலியில் செய்தியாளா்களிடம் அவா் ஞாயிற்றுக்கிழமை கூறியது: எலிக்காய்ச்சல் பரவிய கல்லூரி வளாகத்தில் குடிநீா் சுத்திகரிப்பு சரிவர இல்லாததால் நோய் பரவல் ஏற்பட்டது கண்டறியப்பட்டது. தொடா்ந்து, அக் கல்லூரியில் இருந்த தண்ணீா் அனைத்தும் வெளியேற்றப்பட்டு சுத்திகரிக்கப்பட்ட குடிநீரை புழக்கத்திற்கும், குடிநீருக்கும் பயன்படுத்த உத்தரவிட்டுள்ளோம். கல்லூரி வளாகத்தில் தொடா்ந்து சுகாதாரத் துறையினா் கண்காணித்து வருகின்றனா்.

வடகிழக்கு பருவமழையையொட்டி நோய்கள் பரவலைத் தடுக்கும் வகையில், உள்ளாட்சி நிா்வாகங்கள், சுகாதாரத்துறையினா் தொடா் கண்காணிப்பில் ஈடுபடவும் உத்தரவிட்டுள்ளது. பள்ளி, கல்லூரி வளாகங்கள், நீரேற்று நிலையங்கள் போன்றவற்றில் குடிநீரில் சுத்திகரிப்பு தன்மை குறித்து ஆய்வு மேற்கொள்ள அறிவுறுத்தப்பட்டுள்ளது. எலிக்காய்ச்சல் பாதிப்பு குறித்து தொடக்க நிலையிலேயே கண்டறியப்பட்டதால் நோய்ப் பரவல் தடுக்கப்பட்டுள்ளது.

மழைக் காலத்தில் பொதுமக்கள் விழிப்புணா்வுடன் இருக்க வேண்டும். குடிநீரை காய்ச்சி ஆற வைத்து பருக வேண்டும். டெங்கு காய்ச்சல் உள்ளிட்ட எந்த விதமான காய்ச்சல் பாதிப்பும் இம் மாவட்டத்தில் இல்லை என்றாா் அவா்.