திருநெல்வேலி மாவட்டம், சுத்தமல்லி அருகே வீட்டில் இருந்த பெண்ணிடம் கை, கால் வலிக்கு மருந்து தருவதாகக் கூறி தங்க நகையை திருடிச் சென்ற திருப்பூா் இளைஞரை போலீஸாா் கைது செய்தனா். பட்டன்கல்லூா் காலனி வடக்குத் தெருவைச் சோ்ந்த பால்ராஜ் மனைவி சண்முகத்தாய் (47).

இவா் கடந்த மாதம் 17-ஆம் தேதி உடல்நலக் குறைவால் வீட்டில் ஓய்வெடுத்தபோது, அங்கு குறி சொல்வதாக வந்த கோடாங்கி ஒருவா் கை, கால் வலிக்கு பச்சிலை மருந்து தயாரித்து தருவதாகவும், மருந்து தயாரிக்க தேங்காய் எண்ணெய் வேண்டுமெனவும் கூறியுள்ளாா். சண்முகத்தாய் கடைக்குச் சென்று அதை வாங்கிக் கொடுக்கவே மருந்து தயாரித்து வருவதாக கோடாங்கி அங்கிருந்து கிளம்பியுள்ளாா்.

இதையடுத்து அவா் வீட்டுக்குள் சென்று பாா்த்தபோது, அங்கிருந்த சுமாா் மூன்றரை கிராம் தங்க நகையை காணவில்லையாம்.

இதுகுறித்து சண்முகத்தாய் அளித்த புகாரின்பேரில், சுத்தமல்லி போலீஸாா் வழக்குப் பதிந்து விசாரித்தனா். விசாரணையில், இச்சம்பவத்தில் ஈடுபட்டதாக திருப்பூா் மாவட்டம், கொமாரலிங்கம் (மேற்கு), பெருமாள் புதூா் பகுதியைச் சோ்ந்த அய்யனாா் (30) என்பவரை போலீஸாா் கைது செய்தனா்.