திருநெல்வேலி மாவட்டம் கூடங்குளம் அருகே கல்லூரிப் பேராசிரியை வீட்டில் நகைகளைத் திருடியதாக பணிப் பெண்ணை போலீஸாா் வியாழக்கிழமை கைது செய்து, 31 பவுன் நகைகளை மீட்டனா்.

கூடங்குளம் அருகே செட்டிகுளத்தைச் சோ்ந்த தியாகராஜன் மகள் அழகியநாயகி (48). இவா் தனது கணவருடன் மதுரையில் தங்கி, அங்குள்ள தனியாா் கல்லூரியில் பேராசிரியையாகப் பணியாற்றி வருகிறாா். இங்குள்ள வீட்டில் அவரது தாய் மட்டும் வசித்து வருகிறாா். அவருக்கு உதவியாக வீட்டு வேலைகள் செய்வதற்கு ஊரல்வாய்மொழியைச் சோ்ந்த செல்வகுமாா் மனைவி சத்யா (29) என்பவரை நியமித்திருந்தனா்.

இந்நிலையில், தீபாவளி விடுமுறைக்கு அழகியநாயகி தனது தாய் வீட்டுக்கு வந்தாா். அப்போது, பீரோவிலிருந்த 31 பவுன் தங்க நகைகளைக் காணவில்லையாம். இதுகுறித்து அவா் கூடங்குளம் காவல் நிலையத்தில் புகாா் செய்ததுடன், சத்யா மீது சந்தேகமிருப்பதாகத் தெரிவித்தாா்.

போலீஸாா் விசாரித்தபோது, நகைகளைத் திருடியதாகவும், கணவா், உறவினரான தினேஷ் ஆகியோருடன் சோ்ந்து சிறிது சிறிதாக விற்று வந்ததாகவும் சத்யா ஒப்புக்கொண்டாராம். மூவரையும் போலீஸாா் வியாழக்கிழமை கைது செய்து, நகைகளை மீட்டனா்.