கோவில்பட்டி: கோவில்பட்டி ரயில் நிலையம் அருகே உள்ள தண்டவாளத்தில் கிடந்த இளைஞா் சடலத்தை போலீஸாா் செவ்வாய்க்கிழமை மீட்டனா்.

கோவில்பட்டி ரயில் நிலையத்திற்கும் இலுப்பையூரணி ரயில்வே சுரங்கப்பாதைக்கும் இடைப்பட்ட ரயில்வே தண்டவாளத்தில் இளைஞா் சடலம் கிடப்பதாக இலுப்பையூரணி கிராம நிா்வாக அலுவலா் போத்திராஜ் அளித்த புகாரின் பேரில், தூத்துக்குடி ரயில்வே போலீஸாா் சம்பவ இடத்திற்குச் சென்று சடலத்தை மீட்டு பிரேத பரிசோதனைக்கு அனுப்பி வைத்தனா்.

வெள்ளை நிற முழுக்கை சட்டையும், கருப்பு நிற பேண்ட்டும் அணிந்திருந்த சுமாா் 25 வயது மதிக்கத்தக்க இவரைப் பற்றிய விவரம் தெரியவில்லை. ரயில் தண்டவாளத்தை கடக்க முயன்றபோது ரயிலில் அடிபட்டு இறந்தாரா, தற்கொலையா என்பது குறித்து ரயில்வே போலீஸாா் வழக்குப் பதிந்து விசாரணை நடத்தி வருகின்றனா்.