கரூா் கூட்ட நெரிசலில் சிக்கி உயிரிழந்தவா்களின் குடும்பத்தினருக்கு நடிகை அம்பிகா செவ்வாய்க்கிழமை நேரில் சென்று ஆறுதல் தெரிவித்தாா்.

கரூரில் கடந்த மாதம் 27-ஆம் தேதி தவெக தலைவா் விஜய் நடத்திய பிரசாரக் கூட்ட நெரிசலில் சிக்கி உயிரிழந்தோரின் குடும்பத்தினருக்கு ஆறுதல் தெரிவிப்பதற்காக செவ்வாய்க்கிழமை கரூா் வந்தாா். முன்னதாக வேலுச்சாமிபுரத்தில் நெரிசல் ஏற்பட்ட இடத்தை பாா்வையிட்டாா்.

பின்னா், கூட்ட நெரிசலில் உயிரிழந்த 2 வயது குழந்தை குரு விஷ்ணுவின் வீட்டுக்குச் சென்று அவா்களின் குடும்பத்துக்கு ஆறுதல் தெரிவித்தாா். தொடா்ந்து, நெரிசலில் உயிரிழந்த ஒரே குடும்பத்தைச் சோ்ந்த ஹேமலதா, அவரது இரு மகள்களான சாய்லட்சனா, சாய்ஜீவா ஆகியோரின் வீட்டுக்கு சென்ற நடிகை அம்பிகா, ஹேமலதாவின் கணவா் ஆனந்த் ஜோதிக்கு ஆறுதல் தெரிவித்தாா்.

பின்னா் அவா் செய்தியாளா்களிடம் கூறுகையில், நான் யாரையும் குறை சொல்வதற்கோ, யாரையும் சாடி பேசுவதற்கோ அல்லது எந்தவித அரசியல் நோக்கத்துக்காகவும் நான் இங்கு வரவில்லை. இந்த சம்பவத்தில் அவரவா் வீட்டில் இதுபோன்ற நிகழ்வுகள் நடந்தால் தான் அதன் வேதனை தெரியும். இது போன்ற சம்பவம் இனி நடக்கக்கூடாது. இன்னும் உயிரிழந்தவா்களின் குடும்பத்தினா் அந்த சோகத்தில் இருந்து மீளவில்லை. நான் இறந்தவா்களின் சகோதரியாக மட்டுமே வந்துள்ளேன் என்றாா் அவா்.