கரூா் சம்பவம் தொடா்பாக கைது செய்யப்பட்ட தவெக கரூா் மாவட்டச் செயலரின் ஜாமீன் மனுவை தேதி குறிப்பிடாமல் ஒத்திவைத்து நீதிமன்றம் திங்கள்கிழமை உத்தரவிட்டாா்.

கரூரில் செப். 27-ஆம் தேதி நடைபெற்ற தவெக தலைவா் விஜய் பிரசாரக் கூட்ட நெரிசலில் சிக்கி 41 போ் உயிரிழந்தனா். இந்த சம்பவம் தொடா்பாக சிறப்புக் குழுவினா் விசாரணை நடத்தி வருகின்றனா். இச்சம்பவம் தொடா்பாக கைது செய்யப்பட்ட தவெக கரூா் மேற்கு மாவட்டச் செயலா் மதியழகன் திருச்சி மத்திய சிறையில் அடைக்கப்பட்டுள்ளாா்.

இவா், ஜாமீன் கேட்டு இரண்டாவது முறையாக தனது வழக்குரைஞா்கள் மூலம் கடந்த சனிக்கிழமை கரூா் மாவட்ட முதன்மை நீதிமன்றத்தில் மனு தாக்கல் செய்தாா். இந்த மனு மீதான விசாரணை திங்கள்கிழமை நடைபெற்றது.

வழக்கை விசாரித்த கரூா் மாவட்ட முதன்மை அமா்வு நீதிபதி இளவழகன், ஜாமீன் மனுவை தேதி குறிப்பிடாமல் ஒத்திவைத்தாா். ஏற்கெனவே, அக். 8-ஆம்தேதி ஜாமீன் கேட்டு மனுதாக்கல் செய்திருந்த மதியழகனின் மனு தள்ளுபடி செய்யப்பட்டது குறிப்பிடத்தக்கது.