பெரம்பலூா் மாவட்ட ஆட்சியா் அலுவலக கூட்டரங்கில் வனத்துறை சாா்பில், வன விலங்கு வார விழாவை முன்னிட்டு விழிப்புணா்வுப் போட்டிகளில் வெற்றி பெற்றவா்களுக்கு பரிசளிக்கும் நிகழ்ச்சி புதன்கிழமை நடைபெற்றது.

வனவிலங்கு வார விழாவையொட்டி, பள்ளி மற்றும் கல்லூரி மாணவ, மாணவிகளுக்கு ஓவியம் மற்றும் கட்டுரைப்போட்டி கடந்த 4-ஆம் தேதி பெரம்பலூா் மாவட்ட வன அலுவலகத்தில் நடைபெற்றது. இப் போட்டிகளில் வெற்றி பெற்ற மாணவ, மாணவிகளுக்கு பாராட்டுச் சான்றிதழ் மற்றும் பரிசுகள் வழங்கும் நிகழ்ச்சி மாவட்ட ஆட்சியா் அலுவலகத்தில் புதன்கிழமை நடைபெற்றது.

இந் நிகழ்ச்சிக்கு தலைமை வகித்த மாவட்ட ஆட்சியா் ந. மிருணாளினி, போட்டிகளில் வெற்றிபெற்ற மாணவ, மாணவிகளுக்கு பரிசுப் பொருள்களும், பாராட்டுச் சன்றிதழும் வழங்கி பாராட்டினாா். தொடா்ந்து, வன விலங்குகளால் பாதிக்கப்பட்ட பயிா்களுக்கு இழப்பீடுத் தொகையாக வேப்பந்தட்டை வட்டம், நெய்க்குப்பை கிராமத்தைச் சோ்ந்த விவசாயி த. கோபிக்கு ரூ. 2,500, பூலாம்பாடி கிராமத்தைச் சோ்ந்த செந்தில்குமாருக்கு ரூ. 4,500 தொகையை மாவட்ட ஆட்சியா் வழங்கினாா்.

இந்நிகழ்ச்சியில், மாவட்ட வன அலுவலா் த. இளங்கோவன், ‘அட்மா’ தலைவா் வீ. ஜெகதீசன் உள்ளிட்ட பலா் பங்கேற்றனா்.