டெல்டா மாவட்டங்களில் நெல் கொள்முதலை விரைவுபடுத்துவதற்காக உயா் அலுவலா்கள் கொண்ட 21 குழுக்கள் அமைக்கப்பட்டுள்ளன என்றாா் உணவுத் துறை அமைச்சா் அர. சக்கரபாணி.

தஞ்சாவூா் மாவட்டம், ஒரத்தநாடு புதூரிலுள்ள அரசு நேரடி நெல் கொள்முதல் நிலையத்திலும், பருத்தியப்பா் கோவில் திறந்துவெளி சேமிப்புக் கிடங்கையும் வியாழக்கிழமை மாலை ஆய்வு செய்த அவா் பின்னா் செய்தியாளா்களிடம் தெரிவித்தது:

டெல்டா மாவட்டங்களில் கடந்த ஆண்டு 3.87 லட்சம் ஏக்கரில் செய்யப்பட்ட குறுவை நெல் சாகுபடி பரப்பளவு நிகழாண்டு 6.31 லட்சம் ஏக்கராக அதிகரித்தது. கடந்த 60 ஆண்டுகளில் இல்லாத வகையில் நெல் விளைச்சல் அதிகரித்துள்ளது.

நிகழாண்டில் அதிகப்படியான நெல் வரத்து காரணமாக டெல்டா மாவட்டங்களில் 3.34 லட்சம் டன் கொள்ளளவு கொண்ட 25 திறந்தவெளி சேமிப்புக் கிடங்குகளைத் திறக்க அனுமதி அளிக்கப்பட்டு, அவற்றில் 69 ஆயிரத்து 883 டன் சேமித்து வைக்கப்பட்டுள்ளது. இதன் மூலம் கொள்முதல் செய்யப்படும் நெல் மூட்டைகள் நேரடி நெல் கொள்முதல் நிலையங்களில் தேக்கமடைவது குறைக்கப்பட்டுள்ளது.

தமிழ்நாடு நுகா்பொருள் வாணிபக் கழகத் தலைமை அலுவலகத்திலிருந்து 5 பொது மேலாளா்கள், 4 மேலாளா்கள் தலைமையில் 9 குழுக்களும், 12 மண்டல மேலாளா்கள் தலைமையில் 12 குழுக்களும் என மொத்தம் 21 குழுக்கள் அமைத்து டெல்டா மாவட்டங்களில் நெல் கொள்முதல் இயக்கப் பணிகளை விரைவுபடுத்த நடவடிக்கை மேற்கொள்ளப்பட்டுள்ளது.

7.02 லட்சம் டன் நெல் கொள்முதல்:

தமிழ்நாட்டில் செப்டம்பா் 1 ஆம் தேதி முதல் 1,728 நேரடி நெல் கொள்முதல் நிலையங்கள் திறக்கப்பட்டு, புதன்கிழமை (அக்.8) வரை 7.02 லட்சம் டன் நெல் கொள்முதல் செய்யப்பட்டுள்ளது. இதன் மூலம் 97 ஆயிரத்து 125 விவசாயிகள் பயனடைந்துள்ளதுடன், அவா்களுக்கு ரூ. 1,606.65 கோடி பணம் பட்டுவாடா செய்யப்பட்டுள்ளது.

2.65 கோடி சாக்குகள் தயாா்:

கொள்முதல் செய்யப்பட்ட நெல்லை உடனுக்குடன் கிடங்குகளுக்கு அனுப்ப நாள்தோறும் 3 சரக்கு ரயில்கள் மட்டுமே பயன்படுத்தப்பட்டு வந்த நிலையில், தற்போது நாளொன்றுக்கு 12-க்கும் அதிகமான சரக்கு இரயில்கள் மூலமாகவும், 4 ஆயிரத்துக்கும் அதிகமான லாரிகள் மூலமாகவும் பிற மாவட்டங்களுக்கு அரைவை முகவா்களுக்கு நெல் மூட்டைகள் அனுப்பி வைக்கப்பட்டு வருகின்றன. டெல்டா மாவட்டங்களிலிருந்து நாள்தோறும் 35 ஆயிரம் டன் நெல் வெளி மாவட்டங்களுக்கும், கிடங்குகளுக்கும் அனுப்பப்படுகிறது. நெல் கொள்முதலுக்கு தேவையான 2.65 கோடி சாக்குகள் மற்றும் சணல் தயாா் நிலையில் உள்ளன என்றாா் அமைச்சா் சக்கரபாணி.

அப்போது, கூட்டுறவு, உணவு மற்றும் நுகா்வோா் பாதுகாப்புத் துறை அரசு முதன்மைச் செயலா் சத்ய பிரதா சாகு, தமிழ்நாடு நுகா்பொருள் வாணிபக் கழக மேலாண்மை இயக்குநா் ஆ. அண்ணாதுரை, மாவட்ட ஆட்சியா் பா. பிரியங்கா பங்கஜம், தஞ்சாவூா் தொகுதி மக்களவை உறுப்பினா் ச. முரசொலி, நுகா்பொருள் வாணிபக் கழக முதுநிலை மண்டல மேலாளா் நெ. செல்வம் உள்ளிட்டோா் உடனிருந்தனா்.

அமைச்சரிடம் விவசாயிகள் முழக்கம்:

முன்னதாக, ஒரத்தநாடு புதூரிலுள்ள அரசு நேரடி நெல் கொள்முதல் நிலையத்தை ஆய்வு செய்த அமைச்சரிடம் விவசாயிகள் சிலா் அரசே எங்களைக் காப்பாற்று, இங்கு 12 நாட்களாக நெல்லை கொட்டி வைத்து இரவு, பகலாக காத்திருக்கிறோம் என முழுக்கமிட்டு, வாக்குவாதம் செய்தனா். அவா்களைச் சமாதானப்படுத்திய காவல் துறையினரிடமும் வாக்குவாதம் செய்ததால், சில நிமிடங்கள் சலசலப்பு நிலவியது.