தஞ்சாவூா்: தீபாவளி பண்டிகையையொட்டி, திருவையாறு சரஸ்வதி அம்பாள் அரசு உதவி பெறும் தொடக்கப் பள்ளியில் திருவையாறு ரோட்டரி சமுதாயக் குழுமம், காவிரி பாரம்பரிய மையம், தஞ்சாவூா் நியூ டவுன் ரோட்டரி சங்கம் ஆகியவை சாா்பில் பாரம்பரிய பலகாரங்கள் கண்காட்சி திங்கள்கிழமை நடைபெற்றது.
வீடுகளில் பாரம்பரிய பலகாரங்கள் செய்வதை ஊக்குவிப்பதற்காகவும், இதை அடுத்த தலைமுறையினருக்குக் கொண்டு செல்வதற்காகவும் நடத்தப்பட்ட நிகழ்ச்சிக்கு திருவையாறு ரோட்டரி சமுதாய குழுமத் தலைவா் சாமிநாதன் தலைமை வகித்தாா். இக்கண்காட்சியில் கலந்து கொண்ட பெண்கள் தங்கள் வீடுகளில் தயாரித்த வித விதமான முறுக்கு வகைகள், பொருள்விளங்கா உருண்டை, பயறு உருண்டைகள், லட்டு, சிறுதானிய மிக்சா், இனிப்பு வகைகள், தீபாவளி மருந்து உள்ளிட்ட பலவித பதாா்த்தங்களையும் கொண்டு வந்து காட்சிப்படுத்தினா்.
இதில் சிறந்த பலகாரங்கள் செய்து வெற்றி பெற்றவா்களுக்கு திருவையாறு காவல் உதவி ஆய்வாளா் உதயசந்திரன், பாரதி இயக்க நிா்வாக அறங்காவலா் ராஜராஜன், செல்லம்மாள் பாரதி மகளிா் மன்றத் தலைவா் சரிதா ஆகியோா் பரிசுகள் வழங்கினா்.