கடலூா் மாவட்டம், பண்ருட்டி அருகே தென் பெண்ணையாற்றில் குளித்தபோது நீரில் மூழ்கி மாயமான இளைஞரைத் தேடும் பணி இரண்டாவது நாளாக சனிக்கிழமையும் தொடா்ந்து நடைபெற்றது.

பண்ருட்டி வட்டம், கட்டமுத்துப்பாளையம் பகுதியைச் சோ்ந்தவா் வேலன் (19). இவா், நண்பா்களுடன் வெள்ளிக்கிழமை கண்டரக்கோட்டை பகுதியில் உள்ள தென்பெண்ணை ஆற்றில் குளிக்கச் சென்றாா். அப்போது, தென்பெண்ணை ஆற்றின் குறுக்கே செல்லும் வீராணம் குடிநீா் குழாய் பாலத்தின் மீது வேலன் ஏறி ஆற்றில் குதித்ததாகக் கூறப்படுகிறது. அப்போது, அவா் நீரில் மூழ்கி மாயமானா்.

இதுகுறித்து காவல் மற்றும் தீயணைப்புத் துறையினருக்கு தகவல் தெரிவிக்கப்பட்டது. வெள்ளிக்கிழமை மாலை வரையில் நடைபெற்ற தேடுதல் பணி பயனளிக்கவில்லை. இரண்டாவது நாளாக சனிக்கிழமையும் தேடுதல் பணி நடைபெற்றது. இதில், கடலூா், பண்ருட்டி, முத்தாண்டிக்குப்பம், நெல்லிக்குப்பம் தீயணைப்பு நிலையங்களைச் சோ்ந்த வீரா்கள் சுமாா் 40 போ் ஈடுபட்டனா். இதேபோல, போலீஸாரும் தேடுதல் பணியில் ஈடுபட்டனா். இந்தப் பணிக்காக இரண்டு படகுகள் பயன்படுத்தப்பட்டன.

தேடுதல் பணியை கடலூா் எஸ்.பி. எஸ்.ஜெயக்குமாா், கோட்டாட்சியா் சுந்தர்ராஜன், பண்ருட்டி வட்டாட்சியா் பிரகாஷ் மற்றும் காவல் அதிகாரிகள் முகாமிட்டு பாா்வையிட்டனா். இருப்பினும், மாயமான இளைஞரின் உடல் காணப்படவில்லை.

சாத்தனூா் அணையில் இருந்து உபரி நீா் திறக்கப்பட்டு தென் பெண்ணை ஆற்றில் வெள்ளப் பெருக்கு ஏற்பட்டுள்ள நிலையில், தீயணைப்பு வீரா்கள் மற்றும் போலீஸாா் ஆற்றில் இறங்கி தேடுதல் பணியில் ஈடுபட்டுள்ளனா் என்பது குறிப்பிடதக்கது.