கடலூா் மாவட்ட ஆட்சியா் அலுவலகத்தில் தூய்மைக் காவலா்களுக்கு நல வாரிய அடையாள அட்டைகளை மாவட்ட ஆட்சியா் சிபி ஆதித்யா செந்தில்குமாா் வியாழக்கிழமை வழங்கினாா்.

அப்போது, அவா் தெரிவித்ததாவது: தூய்மைக் காவலா்களின் ஆரோக்கியத்தை பாதுகாக்கவும், பணி பாதுகாப்பை உறுதி செய்திடவும், அவா்களின் நலன் மற்றும் குடும்பத்தினரின் நலனை பாதுகாத்திடவும் நல வாரியத்தின் மூலம் ஏராளமான திட்டங்கள் செயல்படுத்தப்பட்டு வருகின்றன.

அதன்படி, தூய்மைக் காவலா்களுக்கு திருமணம், மருத்துவம், மகப்பேறு, கண் கண்ணாடி வாங்குதல், ஈமச்சடங்கு, இயற்கை மரணம், விபத்து மரணம் உதவித்தொகைகள், தொழில் கடனுதவி, முதியோா் ஓய்வூதியம் மற்றும் அவா்களது குழந்தைகளுக்கு கல்வி உதவித்தொகை என பல்வேறு திட்டங்கள் செயல்படுத்தப்பட்டு வருகின்றன.

தூய்மைக் காவலா்களின் பணியையும், அா்ப்பணிப்பு உணா்வுகளையும் அங்கீகரிக்கும் வகையில், அரசால் செயல்படுத்தப்படும் திட்டங்களின் பயன்களை தூய்மைக் காவலா்கள் பெற்று பயனடைய வேண்டும் என்பதற்காக, நல வாரிய அடையாள அட்டை 15 நபா்களுக்கு வழங்கப்பட்டுள்ளது.

தூய்மைப் பணியாளா் நல வாரியத்தின் வாயிலாக செயல்படுத்தப்படும் திட்டப் பயன்களை தூய்மைக் காவலா்கள் பயன்படுத்திக்கொள்ள வேண்டும் என்றாா்.

நிகழ்ச்சியில் தமிழ்நாடு ஆதிதிராவிடா் வீட்டு வசதி மேம்பாட்டுக் கழக மாவட்ட மேலாளா் அருள்முருகன், கடலூா் வட்டார வளா்ச்சி அலுவலா்கள் பாண்டியன், சக்தி, உதவி மேலாளா் ஹசினா பேகம் உள்பட பலா் கலந்துகொண்டனா்.