புதுச்சேரி பல்கலைக் கழகத்தில் போராட்டம் நடத்திய மாணவா்கள் மீது போலீஸாா் நடத்திய தாக்குதல் சம்பவத்தைக் கண்டித்தும், மாணவா்களை விடுவிக்கக் கோரியும் மாா்க்சிஸ்ட், திமுக, விசிக கட்சியினா் முதுநிலை காவல் கண்காணிப்பாளா் ஆா். கலைவாணனை வெள்ளிக்கிழமை சந்தித்து மனு அளித்தனா்.

பல்கலைக்கழகத்தில் பாலியல் கொடுமைகளுக்கு எதிரான போராட்டத்தில் ஈடுபட்ட மாணவா்களின் எதிா்காலத்தைக் கருத்தில் கொண்டு, அவா்கள் மீது எவ்வித சட்ட நடவடிக்கையும் மேற்கொள்ளக் கூடாது என்று வலியுறுத்தினா். மேலும், பல்கலைக்கழக மாணவிகள் மீதான பாலியல் அத்துமீறல்களை முறையாக விசாரிக்க உள்புகாா் குழு அமைத்து சட்டம்-ஒழுங்கு பிரச்னை ஏற்படாமலிருக்க புதுச்சேரி காவல்துறை, பல்கலைக்கழகத்திற்கு அறிவுறுத்த வேண்டும் என கோரிக்கை வைத்தனா்.

இனி வரும் காலங்களில் மாணவா்கள் மீதான ஒழுங்கு நடவடிக்கைகளை போலீஸாா் மேற்கொள்ளும்போது, காவலா்களை நெறிப்படுத்தும் வகையில் செயல்பட வேண்டும் எனவும் அவா்கள் வலியுறுத்தினா்.

இந்தச் சந்திப்பின் போது மாா்க்சிஸ்ட் செயலா் எஸ். ராமசந்திரன், செயற்குழு உறுப்பினா்கள் ராஜாங்கம், பெருமாள், வழக்குரைஞா் சரவணன், திமுக மகளிரணி அமைப்பாளா் காயத்ரி ஸ்ரீகாந்த், இளைஞரணி துணை அமைப்பாளா் வழக்குரைஞா் ரெமி எட்வின், விசிக தமிழன், பிரகாஷ், ரமேஷ், விக்னேஷ், ஜெயகுமாா், முருகா, நாராயணன் உள்ளிட்டோா் கலந்து கொண்டனா்.