விழுப்புரம் மாவட்டம், மயிலம் ஒன்றியத்திலுள்ள தீவனூா் ஊராட்சியில் உங்களுடன் ஸ்டாலின் திட்ட முகாம் வியாழக்கிழமை நடைபெற்றது.

முகாமுக்கு மயிலம் ஒன்றியக் குழுத் தலைவா் யோகேசுவரி மணிமாறன் தலைமை வகித்தாா். முன்னாள் அமைச்சா் செஞ்சி கே.எஸ்.மஸ்தான் எம்.எல்.ஏ. முகாமில் பங்கேற்று, பொதுமக்களிடமிருந்து கோரிக்கை மனுக்களைப் பெற்றுக் கொண்டாா். இந்த மனுக்கள் மீது விரைந்து நடவடிக்கை எடுக்க கேட்டுக் கொண்டாா்.

முகாமில் தீவனூா், கொள்ளாா், சாலை, மேலபேரடிகுப்பம் ஊராட்சிகளைச் சோ்ந்த ஏராளமான பொதுமக்கள் பங்கேற்று வீட்டுமனைப்பட்டா, முதியோா் உதவித் தொகை, கலைஞா் மகளிா் உரிமைத் தொகை, மின் இணைப்பில் பெயா் மாற்றம், பட்டா மாற்றம் உள்ளிட்ட பல்வேறு கோரிக்கைகள் தொடா்பான மனுக்களை அளித்தனா்.

தொடா்ந்து மயிலம் வட்டார அரசு மருத்துவமனை சாா்பில் கா்ப்பிணிகளுக்கு ஊட்டச் சத்துப் பெட்டகங்களையும், நீரிழிவு, ரத்த அழுத்த நோயால் பாதிக்கப்பட்டவா்களுக்கு இல்லம் தேடி மருத்துவத் திட்டத்தின் கீழ் மாத்திரைப் பெட்டகங்களையும் மஸ்தான் எம்.எல்.ஏ. வழங்கினாா்.

முகாமில் முன்னாள் எம்.எல்.ஏ.க்கள் மாசிலாமணி, சேதுநாதன், மாவட்ட அவைத் தலைவா் சேகா், தலைமைத் தீா்மானக் குழு உறுப்பினா் செஞ்சி சிவா, ஒன்றியச் செயலா் மணிமாறன், வட்டார வளா்ச்சி அலுவலா்கள் சிவக்குமாா், இளங்கோவன் ஒன்றியக் குழு உறுப்பினா்கள் பரிதா சம்சுதீன், உமா ஞானசேகா் உள்ளிட்டோா் பங்கேற்றனா்.