சட்டவிரோத சுரங்கம் தொடர்பான வழக்கில், கர்நாடக முன்னாள் முதல்வரும், மதச்சார்பற்ற ஜனதா தளம் கட்சியின் மாநிலத் தலைவருமான ஹெச்.டி.குமாரசாமியை வரும் 20-ஆம் தேதி வரை கைது செய்ய அந்த மாநில உயர் நீதிமன்றம் வியாழக்கிழமை தடை விதித்தது.
கர்நாடக மாநிலத்தில் சட்டவிரோத சுரங்கச் செயல்பாடுகள் குறித்து லோக் ஆயுக்த அமைப்பின் சிறப்புப் புலனாய்வுக் குழு (எஸ்ஐடி) விசாரணை நடத்தி வருகிறது. இந்த விசாரணையில், கர்நாடக முதல்வராக ஹெச்.டி.குமாரசாமி பதவி வகித்தபோது, அப்போதைய சுரங்கத் துறை ஆணையர் கங்காராம் பதேரியாவுக்கு, ஜந்தகல் சுரங்க நிறுவனத்துக்கு சாதகமான கோப்புக்கு உடனடியாக ஒப்புதல் அளிக்கும்படி கடந்த 2007-ஆம் ஆண்டில் நெருக்கடி கொடுத்தது தெரிய வந்தது.
இதையடுத்து, கர்நாடக வருவாய்த் துறை செயலராக இருந்த பதேரியாவை லோக் ஆயுக்தா சிறப்பு புலனாய்வுக் குழு கடந்த மாதம் கைது செய்தது. மேலும், குமாரசாமிக்கும் சிறப்பு புலனாய்வுக் குழு அழைப்பாணை (சம்மன்) அனுப்பியுள்ளது.
இந்த விவகாரத்தில், பதேரியா போன்று தாமும் கைது செய்யப்படலாம் என்று கருதி, பெங்களூரு லோக் ஆயுக்த சிறப்பு நீதிமன்றத்தில் முன்ஜாமீன் கோரி குமாரசாமி மனு தாக்கல் செய்தார். அந்த மனு, லோக் ஆயுக்த நீதிமன்ற நீதிபதி கோபால் முன்னிலையில் செவ்வாய்க்கிழமை விசாரணைக்கு வந்தது. அப்போது குமாரசாமி முன்ஜாமீன் கோரி தாக்கல் செய்த மனுவைத் தள்ளுபடி செய்வதாக நீதிபதி அறிவித்தார்.
இந்நிலையில், இவ்வழக்கில் தமக்கு முன்ஜாமீன் அளிக்குமாறு கோரி குமாரசாமி, கர்நாடக உயர் நீதிமன்றத்தில் மனுத் தாக்கல் செய்தார். இந்த மனுவை வியாழக்கிழமை விசாரித்த நீதிபதி ரத்னகலா, குமாரசாமியை வரும் 20-ஆம் தேதி வரை கைது செய்யக் கூடாது என்று எஸ்ஐடி-க்கு உத்தரவிட்டார். மேலும், வழக்கு விசாரணையை 20-ஆம் தேதிக்கு அவர் ஒத்திவைத்தார்.