முன்னாள் மத்திய இணை அமைச்சரும், கர்நாடக மாநிலம், சித்ரதுர்கா தொகுதி பாஜக மக்களவை உறுப்பினருமான ஜி.எம்.சித்தேஸ்வர் இல்லம், அலுவலகத்தில் வியாழக்கிழமை வருமான வரித் துறையினர் சோதனையில் ஈடுபட்டனர்.
சித்ரதுர்கா மாவட்டம், பீமாசமுத்திரத்தில் உள்ள சித்தேஸ்வரின் வீடு, அலுவலகம் மற்றும் அவர் பங்குதாரராக உள்ள ஹுப்பள்ளி செளஹாரதா கூட்டுறவு வங்கியில் சோதனையில் ஈடுபட்ட வருமான வரித் துறையினர், பெரும் மதிப்பிலான அசையும், அசையா சொத்துகளின் ஆவணங்களைக் கைப்பற்றியுள்ளதாகக் கூறப்படுகிறது.
கர்நாடகத்தில் காங்கிரஸ் பிரமுகர்களின் வீடுகளில் வருமான வரித் துறையினர் சோதனையில் ஈடுபட்டு வந்த நிலையில், முதல் முறையாக பாஜக மக்களவை உறுப்பினர் வீடு, அலுவலகத்தில் வருமான வரித் துறையினர் சோதனையில் ஈடுபட்டுள்ளது மாநில அளவில் பெரும் பரபரப்பை ஏற்படுத்தியுள்ளது.