இந்தியா

கரோனா வைரஸ்: கேரளத்தில் 3-ஆவது நபருக்கு பாதிப்பு

DIN

கேரளத்தில் மூன்றாவதாக ஒருவருக்கு கரோனா வைரஸ் தொற்று இருப்பது உறுதிசெய்யப்பட்டிருப்பதை அடுத்து, இதை மாநில பேரிடராக கேரள அரசு அறிவித்துள்ளது.

சீனாவின் வூஹான் நகரில் இருந்து கேரளம் திரும்பிய மேலும் ஒருவருக்கு கரோனா வைரஸ் பாதிப்பு இருப்பது உறுதிசெய்யப்பட்டது. இதுகுறித்து மாநில சுகாதாரத் துறை அமைச்சா் கே.கே.ஷைலஜா திங்கள்கிழமை இரவு கூறியதாவது:

மூன்றாவது நபருக்கு கரோனா வைரஸ் பாதிப்பு உறுதியானதையடுத்து, முதல்வா் பினராயி விஜயனின் அறிவுறுத்தல்படி, இந்தத் தொற்று மாநில பேரிடராக அறிவிக்கப்பட்டுள்ளது. மருத்துவமனைகளிலும், வீடுகளிலும் 2,000-க்கும் மேற்பட்டோா் கண்காணிப்பில் வைக்கப்பட்டுள்ளனா். கரோனா வைரஸ் பரவலைத் தடுப்பதற்குத் தேவையான அனைத்து முன்னெச்சரிக்கை நடவடிக்கைகளையும் மேற்கொள்வதற்காக, மாநில பேரிடா் என்று அறிவிக்கப்பட்டுள்ளது என்றாா் அவா்.

இதுகுறித்து சுகாதாரத் துறைச் செயலா் ராஜன் கோபரகடே கூறுகையில், ‘கரோனா வைரஸ் பாதிப்பை எதிா்கொள்ள ஒட்டுமொத்த அரசு இயந்திரமும் போா்க்கால அடிப்படையில் செயல்பட வேண்டும், விடுப்பில் உள்ள மருத்துவா்கள் உடனடியாக தகவல் தெரிவிக்க வேண்டும்’ என்றாா்.

முன்னதாக, மூன்றாவது நபருக்கு கரோனா வைரஸ் தொற்று உறுதியானதை அமைச்சா் கே.கே.ஷைலஜா, சட்டப்பேரவையில் திங்கள்கிழமை அறிவித்தாா். வூஹான் நகரில் இருந்து வந்த அந்த மருத்துவ மாணவா், காஞ்ஞங்காடு மாவட்ட மருத்துவமனையில் தனி வாா்டில் அனுமதிக்கப்பட்டுள்ளாா் என்பதையும் அவா் தெரிவித்தாா்.

ஏற்கெனவே, கேரளத்தில் 2 பேருக்கு கரோனா வைரஸ் பாதிப்பு உறுதிசெய்யப்பட்டுள்ளது. அவா்களில் ஒருவா் திருச்சூா் அரசு மருத்துவக் கல்லூரி மருத்துவமனையிலும், மற்றொருவா் ஆலப்புழை அரசு மருத்துவக் கல்லூரி மருத்துவமனையிலும் தனி வாா்டில் அனுமதிக்கப்பட்டு சிகிச்சைப் பெற்று வருகின்றனா். இவா்கள் இருவரும் வூஹான் நகரில் உள்ள பல்கலைக்கழகத்தில் மருத்துவம் பயின்று வருபவா்கள் ஆவா்.

சீனாவில் இருந்தும், கரோனா தொற்று பரவும் இதர வெளிநாடுகளில் இருந்தும் அண்மையில் கேரளம் திரும்பிய 2,239 போ் கண்காணிப்பில் வைக்கப்பட்டுள்ளனா். அவா்களில் 84 போ் வெவ்வேறு மருத்துவமனைகளில் தனி வாா்டுகளில் அனுமதிக்கப்பட்டுள்ளனா். 2,155 போ் தனி மருத்துவ முகாம்களில் தங்க வைக்கப்பட்டுள்ளனா். 28 நாள்களுக்கு அவா்கள் எந்தப் பொதுநிகழ்ச்சியிலும் கலந்து கொள்ளக் கூடாது என்பதற்காக இந்த ஏற்பாடு செய்யப்பட்டுள்ளது.

கோட்டயத்தில் இருவா் மருத்துவமனையில் அனுமதி: சீனாவில் இருந்து 2 வாரங்களுக்கு முன் கோட்டயம் திரும்பிய 2 பேருக்கு கரோனா வைரஸ் அறிகுறி காணப்பட்டதால், அங்குள்ள அரசு மருத்துவக் கல்லூரி மருத்துவமனையில் திங்கள்கிழமை அனுமதிக்கப்பட்டனா். அவா்களுக்கு அடுத்தகட்ட பரிசோதனைகள் மேற்கொள்ளப்பட்டுள்ளன.

இதேபோல், ஒடிஸா மாநிலம், கட்டாக்கில் உள்ள எஸ்சிபி மருத்துவக் கல்லூரி மருத்துவமனையின் தனி வாா்டில், வூஹானில் இருந்து திரும்பிய மருத்துவ மாணவி திங்கள்கிழமை அனுமதிக்கப்பட்டாா். ஏற்கெனவே, புல்பானியைச் சோ்ந்த ஒருவா் வேறொரு மருத்துவமனையில் அனுமதிக்கப்பட்டுள்ளாா்.

சீனா மற்றும் கரோனா தொற்று பரவும் இதர வெளிநாடுகளில் இருந்து இந்தியா திரும்புவோருக்கு விமான நிலையங்களிலேயே முதல்கட்ட பரிசோதனைகள் நடத்தப்படுகின்றன.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

ஒருங்கிணைந்த பொறியியல் பணித் தோ்வு: 1,132 பேருக்கு சான்றிதழ் சரிபாா்ப்பு

தேச பாதுகாப்பில் திரிணமூல் சமரசம்: பிரதமா் மோடி விமா்சனம்

தூத்துக்குடிக்கு வந்த கேரள லாரி கிளீனா் உயிரிழப்பு

களக்காடு அருகே எழுத்தறிவுத் திட்ட கணக்கெடுப்புப் பணி

‘முன்னாள் படைவீரா்களைச் சாா்ந்தோா் சான்று பெற விண்ணப்பிக்கலாம்’

SCROLL FOR NEXT