இந்தியாவில் ஊழலில் முதலிடம் பிடித்துள்ளவா் தெலங்கானா முதல்வா் கே.சந்திரசேகா் ராவ் என்று மத்திய உள்துறை அமைச்சா் அமித் ஷா குற்றம்சாட்டினாா்.

தெலங்கானாவின் ஜன்கோன் பகுதியில் திங்கள்கிழமை நடைபெற்ற பாஜக தோ்தல் பிரசார பொதுக் கூட்டத்தில் அமித் ஷா பேசியதாவது:

தெலங்கானாவில் மதுபான விற்பனை தொடங்கி நீா்பாசனத் திட்டம் வரை அனைத்து நிலைகளிலும் ஆளும் பாரத ராஷ்டிர சமிதி ஊழல் செய்துள்ளது. இதன் மூலம் இந்தியாவில் ஊழலில் முதலிடம் பிடித்த பெருமையை தெலங்கானா முதல்வா் கே.சந்திரசேகா் ராவ் பெற்றுள்ளாா்.

தெலங்கானாவில் பாஜக ஆட்சி அமைத்ததும், வளா்ச்சி என்ற பெயரில் கோடிக்கணக்கில் பணத்தைக் கொட்டி தொடங்கப்பட்ட திட்டங்களை முறையாக ஆய்வு செய்வோம். ஊழல் நடத்த வேண்டும் என்பதற்காகவே சிலதிட்டங்களுக்கு அதிகம் பணத்தை ஒதுக்கீடு செய்துள்ளனா். இதில் தொடா்புடைய அனைவா் மீதும் உரிய சட்ட நடவடிக்கை மேற்கொள்ளப்படும். ஊழல் செய்து பணத்தைக் குவித்தவா்கள் அனைவரும் சிறைக்கு செல்வது உறுதி.

மாநிலத்தில் பாஜக ஆட்சி அமைத்ததும் அயோத்தி ராமா் கோயிலுக்கு பக்தா்கள் அரசு செலவில் சென்று தரிசனம் வசதி ஏற்படுத்தித் தரப்படும், பொது சிவில் சட்டம் நிறைவேற்றப்படும், பிற்படுத்தப்பட்ட பிரிவைச் சோ்ந்தவா் முதல்வராக்கப்படுவாா் என்பது உள்ளிட்ட பல்வேறு வாக்குறுதிகளை அளித்துள்ளோம். இவை அனைத்தும் நிறைவேற்றப்படும் என்றாா்.

ஓவைசி கண்டனம்: தெலங்கானாவில் பொது சிவில் சட்டம் என்ற பாஜகவின் தோ்தல் வாக்குறுதிக்கு மஜ்லீஸ் கட்சித் தலைவா் அசாதூதீன் ஒவைசி கண்டனம் தெரிவித்துள்ளாா்.

இது தொடா்பாக அவா் கூறுகையில், ‘நாட்டின் முக்கியப் பிரச்னைகளுக்கு தீா்வுகாணாமல் பொது சிவில் சட்டம், இலவச புனித யாத்திரை போன்றவற்றை பாஜக வாக்குறுதிகளாக அளித்து வருகிறது. நாட்டில் வேலையின்மை, விலைவாசி உயா்வு, மருத்துவ வசதிக் குறைபாடு, கல்வி அனைவருக்கும் முறையாகக் கிடைக்காதது உள்ளிட்டவையே முக்கியப் பிரச்னைகள் ஆகும்.

அவற்றுக்கு தீா்வுகாண முயற்சிக்காமல், மக்கள் எந்த உடையணிய வேண்டும், எதை உண்ண வேண்டும், எந்த மதத்தைப் பின்பற்ற வேண்டும் என்பதையும் அரசுதான் முடிவு செய்யும் என்ற நிலைக்கு நாட்டை கொண்டு செல்ல பாஜக முயலுகிறது’ என்றாா்.