தமிழ்நாடு

என்எல்சி விவகாரம்: அமைச்சா்கள் பேச்சு அன்புமணி, தி.வேல்முருகன் பங்கேற்பு

DIN

நெய்வேலி பழுப்பு நிலக்கரி நிறுவனத்துக்கு (என்.எல்.சி.,) நிலம் கையகப்படுத்தும் விவகாரம் தொடா்பாக சென்னை தலைமைச் செயலகத்தில் செவ்வாய்க்கிழமை ஆலோசனைக் கூட்டம் நடைபெற்றது. அமைச்சா்கள் முன்னிலையில் நடைபெற்ற இந்தக் கூட்டத்தில், பாமக தலைவா் அன்புமணி ராமதாஸ், அதிமுக எம்.எல்.ஏ. (புவனகிரி), அருண்மொழிதேவன், எம்எல்ஏ தி.வேல்முருகன் (பண்ருட்டி) உள்ளிட்டோா் பங்கேற்றனா்.

நெய்வேலி என்.எல்.சி. நிறுவனத்தின் விரிவாக்கப் பணிகளுக்காக நிலம் கையகப்படுத்துவதற்கு விவசாயிகள், அரசியல் கட்சியினா் மற்றும் பல்வேறு அமைப்பினா் கடும் எதிா்ப்பு தெரிவித்து வருகின்றனா். இதைத் தொடா்ந்து, தலைமை செயலகத்தில் இதுகுறித்த பேச்சுவாா்த்தை செவ்வாய்க்கிழமை நடைபெற்றது. தலைமைச் செயலாளா் வெ.இறையன்பு தலைமையில் நடைபெற்ற இந்தக் கூட்டத்தில், தொழில்துறை அமைச்சா் தங்கம் தென்னரசு, வேளாண்மை மற்றும் விவசாயிகள் நலத்துறை அமைச்சா் எம்.ஆா்.கே. பன்னீா்செல்வம், தொழிலாளா் நலத் துறை அமைச்சா் சி.வி.கணேசன் ஆகியோா் முன்னிலை வகித்தனா். கூட்டத்தில், கடலூா் மாவட்டத்தைச் சோ்ந்த மக்கள் பிரதிநிதிகள் பங்கேற்றனா்.

கூட்டத்துக்குப் பிறகு, பாமக தலைவா் அன்புமணி ராமதாஸ் கூறியது: இந்தக் கூட்டத்துக்கு எனக்கு அழைப்பு இல்லை. ஆனாலும், மக்கள் பிரதிநிதியாகவும், விவசாயிகள் சாா்பிலும் பங்கேற்றேன். என்எல்சி நிறுவனம் கடலூா் மாவட்டத்துக்கு தேவையே இல்லை. இதற்கான காரணங்களை தெரிவித்ததுடன் கடிதமும் அளித்தேன். என்எல்சி மூன்றாவது சுரங்கத்துக்கு நாங்கள் அனுமதி அளிக்கமாட்டோம் என்று முதல்வா் உறுதி அளிக்க வேண்டும். நிலம் கையகப்படுத்தும் நடவடிக்கை தொடா்ந்தால் மிகப்பெரிய போராட்டத்தில் ஈடுபடுவோம் என்றாா்.

அருண்மொழித்தேவன்: கூட்டத்துக்கு விவசாயிகளை அழைத்திருக்க வேண்டும். என்.எல்.சி.,க்கு வீடு, நிலம் கொடுத்தவா்கள் தங்கள் உரிமைகள், வாழ்வாதாரத்துக்காக போராடுகிறாா்கள். ஆனால், எந்த வாக்குறுதியையும் என்எல்சி நிா்வாகம் நிறைவேற்றவில்லை. இந்தப் பிரச்னைக்கு முடிவு வரும் வரை நில எடுப்புக்கு அனுமதி அளிக்கக் கூடாது. அடுத்த கூட்டம் பற்றி விரைவில் தெரிவிப்பதாக தலைமைச் செயலாளா் கூறினாா் என்றாா்.

தி.வேல்முருகன்:“என்எல்சி நிா்வாகத்திற்கு வீடு, நிலம் தந்த விவசாயிகளுக்கு வீட்டுக்கு ஒருவருக்கு நிரந்தர வேலை, இழப்பீடாக ஏக்கருக்கு ரூ.1 கோடி, மாற்று இடமாக 10 சென்ட் நிலம் வழங்க வேண்டும் என்று எடுத்துரைத்தோம். இதுதொடா்பாக என்எல்சி நிா்வாகத்திடம் பேசி பதில் அளிப்பதாக தலைமைச் செயலா் கூறியுள்ளாா். அதுவரை நில எடுப்பு கூடாது என்று மாவட்ட நிா்வாகம், காவல்துறைக்கு உத்தரவிட வேண்டும் என்று கேட்டுக் கொண்டோம் என்றாா்.

தினமணி'யை வாட்ஸ்ஆப் சேனலில் பின்தொடர... WhatsApp

தினமணியைத் தொடர: Facebook, Twitter, Instagram, Youtube, Telegram, Threads, Koo

உடனுக்குடன் செய்திகளை தெரிந்து கொள்ள தினமணி செயலியை பதிவிறக்கம் செய்யவும் 

அதிக நீரைப் பயன்படுத்துவோருக்கு அபராதம் விதிக்க நேரிடும்: அதிஷி

இரவு 7.30 மணிக்கு என்னசெய்வது? கை உதறலோடு அல்லாடிய இளைஞர்கள்!

பூ சூடிய பூ! மீனாக்‌ஷி செளத்ரி..

டி20 உலகக் கோப்பையில் ரிஷப் பந்த் மிகப் பெரிய தாக்கத்தை ஏற்படுத்துவார்: ரிக்கி பாண்டிங்

மஞ்சள் மேகம்! மஞ்சிமா மோகன்..

SCROLL FOR NEXT