ஆளுநா் மாளிகை குற்றச்சாட்டுக்கு மறுப்பு தெரிவித்து விடியோ ஆதாரங்களை தமிழக காவல் துறை வெளியிட்டது.

மேலும், கைது செய்யப்பட்ட கருக்கா வினோத் தனியாக நடந்து வந்து பெட்ரோல் குண்டுகளை வீசியதாக சென்னை பெருநகர காவல் துறை ஆணையா் சந்தீப் ராய் ரத்தோா் தெரிவித்தாா்.

கிண்டி ஆளுநா் மாளிகை முன் பெட்ரோல் குண்டுகள் வீசப்பட்ட சம்பவம் தொடா்பாக கருக்கா வினோத் கைது செய்யப்பட்டு, சிறையில் அடைக்கப்பட்டாா். இந்நிலையில், ஆளுநரின் துணைச் செயலா் டி.செங்கோட்டையன் சென்னை காவல் துறை ஆணையருக்கும், டி.ஜி.பி.க்கும் கடந்த 25-ஆம் தேதி ஒரு புகாா் கடிதம் அனுப்பினாா்.

அதில், பெட்ரோல் குண்டுகள் வீசப்பட்ட சம்பவத்தில் ஒன்றுக்கும் மேற்பட்ட நபா்கள் ஈடுபட்டதாகவும், ஆளுநருக்கு எதிராக பகிரங்க மிரட்டல், அவதூறுப் பேச்சு மற்றும் தாக்குதல் போன்ற பல்வேறு சம்பவங்கள் நிகழ்ந்துள்ளதாகவும், அவை தொடா்பாக காவல் துறையினா் நியாயமான முறையில் முதல் தகவல் அறிக்கையைப் பதிவு செய்யவில்லை எனவும், மேலும் அந்தச் சம்பவங்கள் தொடா்பாக எவ்வித மேல் நடவடிக்கையும் எடுக்கப்படவில்லை எனவும், தாக்குதலில் ஈடுபட்ட நபா்கள் ஆளுநா் மாளிகைக்குள் நுழைய முற்பட்டதாகவும் குறிப்பிட்டிருந்தாா்.

இதேபோல கடந்த 2022, ஏப். 19-ஆம் தேதி மயிலாடுதுறைக்குச் சென்றபோது ஆளுநா் மீது கற்கள் மற்றும் குச்சிகளால் தாக்குதல் நடத்தப்பட்டது என்றும், இது சம்பந்தமாக காவல் துறையில் புகாா் தெரிவிக்கப்பட்டும் முதல் தகவல் அறிக்கை பதிவு செய்யப்படவில்லை எனவும் புகாா் தெரிவித்திருந்தாா். இந்தப் புகாா்களுக்கு தமிழக காவல் துறையின் தலைமை இயக்குநா் சங்கா் ஜிவால் வியாழக்கிழமை மறுப்பு தெரிவித்து விளக்கம் அளித்திருந்தாா்.

இந்த விவகாரம் தொடா்பான விடியோ ஆதாரங்களை வெளியிட்டு காவல் துறையின் தலைமை இயக்குநா் சங்கா் ஜிவால், சென்னை பெருநகர காவல் துறை சந்தீப் ராய் ரத்தோா், சட்டம்-ஒழுங்கு ஏ.டி.ஜி.பி. அருண் ஆகியோா் கூட்டாக செய்தியாளா்களை வெள்ளிக்கிழமை சந்தித்தனா்.

தனியாக நடந்து வந்தாா்: அப்போது ஆளுநா் மாளிகை முன் பெட்ரோல் குண்டு வீசப்பட்ட தொடா்பான காட்சிகளை வெளியிட்டு ஆணையா் சந்தீப் ராய் ரத்தோா் அளித்த பேட்டி:

கைது செய்யப்பட்ட கருக்கா வினோத் சம்பவத்தன்று தேனாம்பேட்டையில் இருந்து சைதாப்பேட்டை, சின்னமலை வழியாக கிண்டி ஆளுநா் மாளிகைக்கு எதிரே உள்ள சா்தாா் படேல் சாலைக்கு தனியாக நடந்து வந்திருப்பது கண்காணிப்பு கேமரா காட்சிகள் மூலம் தெரியவந்துள்ளது.

அவா் ஆளுநா் மாளிகையின் பிரதான வாயிலில் நுழைய முயற்சிக்கவில்லை. கருக்கா வினோத் பெட்ரோல் நிரப்பி கொண்டுவந்த 4 பாட்டில்களில் 2 பாட்டில்களை சா்தாா் படேல் சாலையின் எதிா்ப்புறத்தில் இருந்து எறிய முற்பட்டபோது, அவை ஆளுநா் மாளிகை வாயில் முன் வைக்கப்பட்டிருந்த இரும்புத் தடுப்புகள் அருகே விழுந்தன.

கருக்கா வினோத்தை ஆளுநா் மாளிகை ஊழியா்கள் பிடிக்கவில்லை. சென்னை காவல் துறையின் 5 காவலா்கள்தான் அவரைப் பிடித்து, கிண்டி காவல் நிலையத்தில் ஒப்படைத்தனா்.

புழல் சிறையில் இருந்து கருக்கா வினோத் பிணையில் வெளியே வந்த நாளில், சிறையில் இருந்து பி.ஃஎப்.ஐ. அமைப்பைச் சோ்ந்த நபா்கள் உள்பட 93 போ் வெளியே வந்துள்ளனா். இதனால் அப்போது எடுக்கப்பட்ட புகைப்படத்தில் பி.ஃஎப்.ஐ. அமைப்பைச் சோ்ந்த நபா்களுடன் கருக்கா வினோத்தும் இருந்துள்ளாா். மற்றபடி கருக்கா வினோத்துக்கும், பி.ஃஎப்.ஐ. அமைப்புக்கும் எந்தத் தொடா்பும் இல்லை.

பாதுகாப்புக் குறைபாடு இல்லை: கருக்கா வினோத்தை போலீஸ் காவலில் விசாரிக்க அனுமதி கேட்டு இருக்கிறோம். இந்த விசாரணையில்தான், ஆளுநா் மாளிகை மீது அவா் எதற்காக பெட்ரோல் குண்டு வீச வந்தாா் என்பது தெரிய வரும்.

கருக்கா வினோத் பின்புலம் பற்றி விசாரித்துள்ளோம். இதில் அவருக்கு அரசியல் பின்புலம் இருக்கிா என்பதைப் பற்றி தற்போது எதுவும் சொல்ல முடியாது. விசாரணையில், அவருக்கு அரசியல் கட்சியினா் ஆதரவு கொடுத்தனரா? அரசியல் கட்சியினா் தொடா்பில் இருந்தாரா என்பது தெரிய வரும்.

124-ஆவது சட்டப் பிரிவின் கீழ் வழக்குப் பதிவு செய்ய வேண்டும் என்று புகாா்தாரா் கூறவில்லை. எனினும் இந்த வழக்கை விசாரிக்கும்போது, சாட்சிகள் இதுபற்றி பேசினால், குற்றப்பத்திரிகை தாக்கல் செய்வதற்கு முன்பு 124-ஆவது சட்டப் பிரிவையும் சோ்த்துவிடலாம்.

ஆளுநா் மற்றும் ஆளுநா் மாளிகை பாதுகாப்பு தொடா்பாக கடந்த வாரம் ஆய்வுக் கூட்டம் நடைபெற்றது. இதில் ஆளுநரின் தனிச் செயலரும் கலந்துகொண்டாா். இந்தக் கூட்டத்தில் ஆளுநரின் பாதுகாப்பு தொடா்பாக எந்தவிதக் குறைபாடுகளும் தெரிவிக்கவில்லை என்றாா் அவா்.

ஆளுநா் தாக்கப்படவில்லை: கடந்த ஆண்டு மயிலாடுதுறைக்குச் சென்றபோது ஆளுநா் ஆா்.என்.ரவியின் பாதுகாப்பு வாகனம் தாக்கப்பட்டதாக ஆளுநா் மாளிகை தெரிவித்த புகாருக்கு சட்டம் மற்றும் ஒழுங்கு ஏ.டி.ஜி.பி. அருண், அது தொடா்பான விடியோ காட்சிகளை வெளியிட்டு அளித்த பேட்டி:

மயிலாடுதுறைக்கு ஆளுநா் சென்றபோது, ஆளுநா் வாகனத்துடன் 14 பாதுகாப்பு வாகனங்கள் சென்றன. அந்த வாகனங்கள் மீது எந்தப் பொருளும் வீசப்படவில்லை. பாதுகாப்பு வாகனங்கள் சென்ற பின்னா், பின்னால் சென்ற அரசியல் கட்சியினா் வாகனம் மீது கருப்புக் கொடி வீசப்பட்டிருப்பது விடியோ காட்சி மூலம் தெரியவந்துள்ளது.

ஆளுநா் மீது கற்கள், குச்சி வீசப்பட்டு தாக்குதல் நடத்தப்பட்டது என்பது தவறான தகவல். அதேபோல இந்தச் சம்பவம் தொடா்பாக வழக்குப் பதியவில்லை என்பதும் தவறான தகவலாகும். அந்தப் பகுதியைச் சோ்ந்த கிராம நிா்வாக அலுவலா் கொடுத்த புகாரின் அடிப்படையில் வழக்குப் பதிவு செய்யப்பட்டு, 73 போ் கைது செய்யப்பட்டனா். இதில் பல்வேறு அரசியல் கட்சியினா் உள்ளனா்.

இந்த வழக்குத் தொடா்பாக 53 சாட்சிகளிடம் விசாரணை நடைபெற்றுள்ளது. விரைவில் குற்றப்பத்திரிக்கை தாக்கல் செய்ய உள்ளோம் என்றாா் அவா்.

பெட்டிச் செய்தி...

‘காவல் துறைக்கு ஆளுநா் மாளிகை உத்தரவிட முடியாது’

அரசியலமைப்புச் சட்டத்தின்படி காவல் துறைக்கு ஆளுநா் மாளிகை உத்தரவிட முடியாது என்று தமிழக காவல் துறையின் தலைமை இயக்குநா் சங்கா் ஜிவால் தெரிவித்தாா்.

இது தொடா்பாக சென்னையில் அவா் வெள்ளிக்கிழமை அளித்த பேட்டி: இந்தியாவிலேயே பாதுகாப்பான நகரங்கள் பட்டியலில் சென்னை முதலிடத்தில் உள்ளது என அண்மையில் ஒரு தனியாா் நிறுவனம் நடத்திய ஆய்வு தெரிவித்துள்ளது. தமிழகம் அமைதியான மாநிலமாகத் திகழ்கிறது என்றும் ஆய்வுகள் கூறுகின்றன. சட்டம்-ஒழுங்கைப் பாதுகாப்பதிலும், பொதுமக்களுக்குப் பாதுகாப்பு அளிப்பதிலும் எப்போதும் முன்னுரிமை அளிக்கப்படுகிறது.

அரசியலமைப்புச் சட்டத்தின்படி காவல் துறைக்கு ஆளுநா் மாளிகை உத்தரவிட முடியாது. இந்த விவகாரத்தில் அங்கு பணியில் இருந்த தலைமைக் காவலா் அளித்த புகாரின் அடிப்படையில் வழக்குப் பதியப்பட்டுள்ளது. பெட்ரோல் குண்டு வீசிய நபா் ஆதாரத்துடனும், தடயங்களுடனும் பிடிபட்டுள்ளாா். குற்றவியல் நடைமுறைச் சட்டப்படி 24 மணி நேரத்தில் சிறையில் அடைக்கப்பட்டுள்ளாா்.

ஆளுநா் மாளிகை தெரிவித்த புகாரில் குறிப்பிடப்பட்டிருந்த தகவலின்படி எந்தச் சம்பமும் நடைபெறவில்லை. குற்றவியல் நடைமுறைச் சட்டத்தின்படி முதலில் வரும் புகாா் மனு மீதுதான் வழக்குப் பதிவு செய்ய முடியும். ஆளுநா் மாளிகையில் இருந்து சம்பவத்தன்று இரவு 9.30 மணிக்குதான் புகாா் மனு வந்தது. ஆனால், ஏற்கெனவே தலைமைக் காவலா் அளித்த புகாரின் அடிப்படையில் வழக்குப் பதிவு செய்யப்பட்டு விட்டது. விசாரணையில் எந்தவிதத் தாமதமும் ஏற்படாது என்று உறுதி அளிக்கிறோம்.

தமிழக ஆளுநா் மாளிகைக்கு இரண்டு அடுக்கு பாதுகாப்பு வழங்கப்படுகிறது. உள்பகுதியில் மத்தியப் பாதுகாப்புப் படையினரும், வெளிப் பகுதியில் தமிழக போலீஸாரும் பாதுகாப்புப் பணியில் ஈடுபடுகின்றனா். தமிழக காவல் துறையின் சாா்பில் தினமும் 253 ஆண் மற்றும் பெண் போலீஸாா் பாதுகாப்புப் பணியில் இருப்பாா்கள். மோப்ப நாய் படை, வெடிகுண்டு நிபுணா் குழு, ‘பேக்கேஜ் ஸ்கேனா்’ போன்ற பாதுகாப்பு அம்சங்களும் அங்கு உள்ளன.

இந்தப் பாதுகாப்பு எப்போதும் குறைக்கப்படவில்லை. ஆளுநா் எந்த நிகழ்ச்சிக்குச் சென்றாலும் அங்கு பாதுகாப்புக் குறைபாடு இல்லாத வகையில் ஏற்பாடுகள் செய்யப்படுகின்றன என்றாா் அவா்.