சனிக்கிழமை 23 மார்ச் 2019

பிரிட்டன் தொழிலாளர் கட்சியிலிருந்து 7 எம்.பி.க்கள் விலகல்

DIN | Published: 19th February 2019 12:56 AM
தொழிலாளர் கட்சியின் பிரெக்ஸிட் கொள்கைக்கு எதிர்ப்பு தெரிவித்து, அக்கட்சியிலிருந்து விலகுவதாக அறிவித்த  (இடமிருந்து) ஆன் கோஃபி, ஏஞ்சலா ஸ்மித், கிறிஸ் லெஸ்லி, சுக்கா உமுன்னா, மைக் கேப்பிஸ், லூசியானா பெர


பிரெக்ஸிட் விவகாரத்தில், பிரிட்டனிலுள்ள முக்கிய எதிர்க்கட்சியான தொழிலாளர் கட்சியிலிருந்து 7 எம்.பி.க்கள் விலகியுள்ளனர்.
லண்டனில் எம்.பி.க்கள் ஆன் கோஃபி, ஏஞ்சலா ஸ்மித், கிறிஸ் லெஸ்லி, சுக்கா உமுன்னா, மைக் கேப்பிஸ், லூசியானா பெர்ஜர், கேவின் ஷுக்கர் ஆகிய 7 பேர் செய்தியாளர்களை சந்தித்தனர். அப்போது அவர்கள் கூறியதாவது:
பிரெக்ஸிட் மற்றும் யூதர்களுக்கு எதிரான பாகுபாடு ஆகிய விவகாரங்களில், தொழிலாளர் கட்சித் தலைவர் ஜெரிமி கோர்பின் கடைப்பிடித்து வரும் அணுகுமுறைகளில் எங்களுக்கு உடன்பாடில்லை. ஆதலால் தொழிலாளர் கட்சியிலிருந்து விலகும் முடிவை எடுத்தோம்.
இன்று காலை கட்சியிலிருந்து 7 பேரும் விலகி விட்டோம். இந்த முடிவு, மிகவும் கடினமாகவும், வருத்தமளிப்பதாகவும், அதே நேரத்தில் தவிர்க்க முடியாததாகவும் இருந்தது. நாடாளுமன்றத்தில் இனிமேல் நாங்கள் 7 பேரும் தனி அணியாக செயல்படுவோம் என்று தெரிவித்தனர்.
தொழிலாளர் கட்சியில் இருந்து மூத்த தலைவர்கள் 4 பேர் கடந்த 1981-ஆம் ஆண்டில் விலகி, ஜனநாயகக் கட்சி எனும் புதிய கட்சியை ஆரம்பித்தனர். 
அதன் பிறகு, தொழிலாளர் கட்சியில் ஏற்பட்ட மிகப்பெரிய பிளவாக இப்போதைய விலகல் கருதப்படுகிறது. தற்போதைய அரசியல் சூழலில் தொழிலாளர் கட்சிக்கும் இது பெரும் பின்னடைவாக கூறப்படுகிறது.
ஐரோப்பிய யூனியன் அமைப்பிலிருந்து பிரிட்டன் விலகுவதற்கு மார்ச் மாதம் 29ஆம் தேதி காலக்கெடு விதிக்கப்பட்டுள்ளது. இந்தநிலையில், பிரெக்ஸிட் தொடர்பாக பொது மக்களிடம் 2-ஆவது முறையாக வாக்கெடுப்பு நடத்துவது தொடர்பான பிரசாரத்துக்கு தொழிலாளர் கட்சியைச் சேர்ந்த ஏராளமான எம்.பி.க்கள் ஆதரவு தெரிவித்துள்ளனர்.

 

More from the section

துபையின் உயரிய கட்டடத்தில் நியூஸி. பிரதமர் புகைப்படம் ஒளிபரப்பு
பாக். தேசிய தினத்துக்கு இந்திய பிரதமர் மோடியின் வாழ்த்து வரவேற்கத்தக்கது: இம்ரான் கான்
சீன ரசாயன ஆலை விபத்து பலி எண்ணிக்கை 64-ஆக உயர்வு
சீனாவில் சுற்றுலா பேருந்தில் தீவிபத்து: 26 பயணிகள் உயிரிழப்பு
பயங்கரவாத அமைப்புகளுக்கு பாகிஸ்தானில் இடமில்லை: இம்ரான் கான்