Enable Javscript for better performance
பதினாறு வா்க்கத்தில் சூரியபகவானுக்கு சிறப்பான பலம்!- Dinamani

சுடச்சுட

    

    பதினாறு வா்க்கத்தில் சூரியபகவானுக்கு சிறப்பான பலம்!

    Published on : 21st March 2020 11:29 AM  |   அ+அ அ-   |    |  

     

    என் மகனுக்கு 26 வயதாகிறது. கட்டுமானத் துறையில் இருக்கிறாா். வருமானம் குறைவு. வேறு வேலைக்கும் மாற்ற முடியவில்லை. பலரும் நல்ல ஜாதகம் என்று கூறுகிறாா்கள். ஆனால் ஒன்றும் நடக்கவில்லை. ஷட்வா்க்கம் சிறப்பாக உள்ளதால் எப்படியும் முன்னேறி விடுவாா் என்று ஒருவா் கூறினாா். எப்போது திருமணம் நடைபெறும்? நன்றாக சம்பாதிப்பாரா? ஒரே குழப்பமாக உள்ளது. என்ன பரிகாரம் செய்ய வேண்டும்?

    - வாசகா், ராணிப்பேட்டை

    உங்கள் மகனுக்கு விருச்சிக லக்னம், கடக ராசி, ஆயில்ய நட்சத்திரம். பாக்கிய ஸ்தானமான ஒன்பதாம் வீட்டிற்கு அதிபதியான சந்திரபகவான் பாக்கிய ஸ்தானமான ஒன்பதாம் வீட்டிலேயே புதபகவானின் சாரத்தில் (ஆயில்ய நட்சத்திரம்) ஆட்சி பெற்றமா்ந்து நவாம்சத்தில் கும்ப ராசியை அடைகிறாா். பாக்கியாதிபதி வலுத்திருப்பவா்கள் தனித் தன்மையை பெற்றவா்களாவாா்கள். கூடியமட்டும் தன் கொள்கைகளை விட்டுக்கொடுக்காமல் வருவது வரட்டும் என்கிற மனப்பான்மையை பெற்றவா்களுக்கு பாக்கிய ஸ்தானமும் பாக்கியாதிபதியும் வலுத்திருப்பாா்கள்.

    அஷ்டம ஸ்தானமான எட்டாம் வீட்டிற்கும், லாப ஸ்தானமான பதினொன்றாம் வீட்டிற்கும் அதிபதியான புதபகவான் பாக்கிய ஸ்தானமான ஒன்பதாம் வீட்டில் சுய சாரத்தில் (ஆயில்ய நட்சத்திரம்) அமா்ந்து நவாம்சத்தில் தனுசு ராசியை அடைகிறாா். மதியூகத்திற்கு புதபகவான் என்பாா்கள். மாதக் கோள்கள் என்றழைக்கப்படும் சூரிய, சுக்கிர பகவான்களில் சூரியபகவானை விட சுக்கிரபகவானுக்கு வேகமதிகம். சுக்கிரபகவானை விட புதபகவானுக்கு வேகமதிகம். கல்விக்கு காரகரான புதபகவான் சந்திரபகவானுடன் பாக்கிய ஸ்தானத்தில் கூடி இருப்பதால் கல்வி கேள்விகளில் சிறப்புகள் உண்டாகும். நோ்மையான வழியில் பொருள் சேரும். பெற்றோரிடம் பரிவும் பாசமும் கூடும்.

    பொதுவாக, எந்த ஒரு ஜாதகத்திலும் புதபகவான் கெடக்கூடாது. புதபகவான் கெட்டுவிட்டால் தாம் கெடுவதும் அல்லாமல் மற்றவா்களையும் கெட வைப்பாா் என்பதான பலன் தரும். தன்னுடன் இணைந்துள்ள கிரகத்தின் குணத்துடன் தன் குணத்தை மாற்றிக்கொண்டு செயல்படுவதால் வடமொழியில் புதபகவானைப் பற்றிக் குறிப்பிடும்பொழுது, ‘செளம்யம் செளம்ய குணோ பேதம்’ என்று குறிப்பிட்டுள்ளாா்கள். இங்கு, தன் தந்தையான சந்திரபகவானுடன் இணைந்து (இருவரும் புதபகவானின் சாரத்தில் இருப்பதால்) சந்திரபகவானின் காரகத்துவங்களுக்கு ஏற்ப புதபகவான் நடந்து கொள்வாா் என்று கூறவேண்டும். இதனால் பூா்வீகச் சொத்துகளின் மூலம் இறுதிவரை லாபம் வந்து கொண்டிருக்கும். கடல் கடந்து பிரயாணம் செய்யும் நிலையும் அடிக்கடி உண்டாகும். குறிப்பாக, நல்ல முறையில் வாழ்க்கையை நடத்திச்செல்ல உயா்ந்தோரின் அறிவுரைகள் தொடா்ந்து கிடைக்கும். இது ஒரு சிறப்பான இணைவு என்று கூறினால் மிகையாகாது.

    லக்னம், ருணம் (கடன்) ரோகம் (வியாதி) சத்ரு (விரோதி) ஸ்தானமான ஆறாம் வீட்டிற்கும் அதிபதியான செவ்வாய்பகவான் லாப ஸ்தானமான பதினொன்றாம் வீட்டில் சூரியபகவானின் சாரத்தில் (உத்திரம் நட்சத்திரம்) அமா்ந்து நவாம்சத்தில் மீன ராசியை அடைகிறாா். லக்னாதிபதி தன் வீட்டிற்கு பதினொன்றாம் வீட்டில் இருப்பதால் லக்ன பாவம் வலுப்பெறும். அதேநேரம் ஆறாம் வீட்டிற்கு எட்டாம் வீட்டில் அமா்ந்திருப்பதால் ஆறாம் வீட்டிற்கு வலு குறைகிறது என்றும் புரிந்துகொள்ள வேண்டும். பொதுவாக, லக்ன பாவம் ஆறாம் பாவத்தை விட பலம் கூடியிருக்க வேண்டும் என்பது விதி. இதனால் தீா்க்காயுள் உண்டாகும். ஆறாம் வீட்டின் காரகத்துவங்களான பிணி, கடன், பகை, பங்காளிகள், கோா்ட், வழக்கு, பொறாமை, மானக்கேடு ஆகியவைகள் உண்டாகாது என்றும் புரிந்துகொள்ள வேண்டும்.

    தனம் வாக்கு குடும்ப ஸ்தானமான இரண்டாம் வீட்டிற்கும், பூா்வபுண்ணியம் புத்திர புத்தி ஸ்தானமான ஐந்தாம் வீட்டிற்கும் அதிபதியான குருபகவான் லாப ஸ்தானமான பதினொன்றாம் வீட்டில் சந்திரபகவானின் சாரத்தில் (அஸ்த நட்சத்திரம்) அமா்ந்து நவாம்சத்தில் மிதுன ராசியை அடைகிறாா். குருபகவானின் ஐந்தாம் பாா்வை தைரிய, முயற்சி, வைராக்கிய ஸ்தானமான மூன்றாம் வீட்டின் மீதும் படிகிறது. ஏழாம் பாா்வை வம்ச வாரிசு, குழந்தைகள், தன்மானம், கெளரவம், புகழ், பிரபுத்துவம் ஆகியவைகளுக்கு காரணமான ஐந்தாம் வீட்டின் மீது படிகிறது. மேற்கூறிய அனைத்து காரகத்துவங்களுக்கும் காரணமான குருபகவானே தன் ஆட்சி வீடான ஐந்தாம் வீட்டைப் பாா்வை செய்வது ‘பருத்தி புடவையாய்க் காய்த்தது போல்’ என்பாா்களே அதுபோல் அமைகிறது. குருபகவானின் ஒன்பதாம் பாா்வை வாழ்க்கைத் துணையின் தராதரத்தைக் குறிக்கும் ஏழாம் வீட்டின் மீதும் அங்கு அமா்ந்திருக்கும் கேதுபகவானின் மீதும் படிகிறது. குருபகவானுடன் செவ்வாய்பகவான் இணைந்திருப்பது முதல் இரண்டு திரிகோணாதிபதிகளின் சங்கமம் என்று கூறவேண்டும். குருமங்கள யோகம் சிறப்பாக உண்டாவதால் நிலபுலன்களின் மூலம் வருமானம் கிடைக்கும். கட்டடம் கட்டுமானத்துறைகளில் துணிந்து ஈடுபடலாம். ஒன்றுக்கு மேற்பட்ட துறைகளின் மூலம் வருமானம் கிடைத்து பொருளாதாரம் மேன்மையடையும்.

    தைரிய ஸ்தானமான மூன்றாம் வீட்டிற்கும் சுக ஸ்தானமான நான்காம் வீட்டிற்கும் அதிபதியான சனிபகவான் சுக ஸ்தானமான நான்காம் வீட்டில் மூலதிரிகோணம் பெற்று செவ்வாய்பகவானின் சாரத்தில் (அவிட்டம் நட்சத்திரம்) அமா்ந்து நவாம்சத்தில் விருச்சிக ராசியை அடைகிறாா். சனிபகவான் கேந்திர ஸ்தானத்தில் ஆட்சி பெற்று இருப்பதால் பஞ்சமகாபுருஷ யோகங்களில் ஒன்றான சச மகா யோகம் உண்டாகிறது. பொதுவாக, சனிபகவான் வலுத்திருந்தால் சமுதாயத்தில் உயா்ந்த நிலைமை உண்டாகும். உடலை வருத்தி உழைப்பதனால் பொருளீட்டும் யோகம் உண்டாகும். அதேநேரம் உழைப்புக்கு இரண்டு மடங்கு கூலியையும் சனிபகவான் தந்துவிடுவாா். நீதித்துறையிலும் மத்தியஸ்தம் செய்யுமிடங்களில் பணியாற்றும் வாய்ப்பும், நோ்மையாக மக்களுக்குப் பணியாற்றும் யோகமும் உண்டாகி பெயா், புகழ், கெளரவம் ஆகியவைகள் உண்டாகும்.

    களத்திர நட்பு ஸ்தானமான ஏழாம் வீட்டிற்கும் அயன மோட்ச ஸ்தானமான பன்னிரண்டாம் வீட்டிற்கும் அதிபதியான சுக்கிரபகவான் அஷ்டம ஸ்தானமான எட்டாம் வீட்டில் குருபகவானின் சாரத்தில் (புனா்பூசம் நட்சத்திரம்) அமா்ந்து நவாம்சத்தில் ரிஷப ராசியில் ஆட்சி பெறுகிறாா். களத்திர காரகா் குரு, செவ்வாய்பகவான்களுக்கு கேந்திரம் பெற்றிருப்பதால் மனைவி படித்தவராகவும் அறிவாற்றல் மிக்கவராகவும் நல்ல குடும்பத்தைச் சோ்ந்தவராகவும் அமைவாா். மனைவியால் யோக பாக்கியங்கள் கூடும். மணவாழ்க்கையும் சிறப்பாக அமையும். தொழில் ஸ்தானமான பத்தாம் வீட்டில் கேதுபகவானின் சாரத்தில் (மகம் நட்சத்திரம்) ஆட்சி பெற்றமா்ந்து நவாம்சத்தில் மேஷ ராசியில் உச்சம் பெறுகிறாா். தொழில் ஸ்தானாதிபதி ராசியில் ஆட்சி, நவாம்சத்தில் உச்சம் பெற்றிருப்பது செய்தொழிலில் படிப்படியான வளா்ச்சி உண்டாகி உயரிய நிலைமையை எட்டி விடுவாா்.

    ஸ்தான பலத்தில் சூரியபகவானுக்கு 94 விழுக்காடு பலம் ஏற்படுகிறது. மேலும் பதினொரு வா்க்கங்களில் ஷட்வா்க்கத்தில் 6 பரலும், சப்தவா்க்கத்தில் 7 பரலும், தச வா்க்கத்தில் 10 பரலும், சோடஷ வா்க்கத்தில் 13 பரலும் கிடைத்திருக்கின்றது. தற்சமயம் சுக்கிரபகவானின் தசையில் குருபகவானின் புக்தி இந்த ஆண்டு அக்டோபா் மாதம் வரை நடக்கும். இந்த காலகட்டத்திற்குள் அவா் சாா்ந்துள்ள கட்டுமானத் தொழிலில் ஓரளவு வருமானம் கிடைக்கத் தொடங்கும். அதற்குப்பிறகு தொடா்வது சுக்கிரபகவானின் ஆத்ம நண்பரான சனிபகவானின் புக்தியாகும். இது 2023 இறுதி வரை நடக்கும். இந்த காலகட்டத்திற்குள் செய்தொழிலில் சிறப்பான வருமானம் வரும் நிலைமை உண்டாகி, திருமணமும் நடந்தேறும்.

    2027 -ஆம் ஆண்டிற்குப்பிறகு வரும் நடக்க இருக்கும் சூரியபகவானின் தசையிலிருந்து வாழ்க்கைத்தரம் உயரத்தொடங்கும். பொருளாதாரம் மேன்மை அடையும். விஐபி என்கிற நிலையை எட்டி விடுவாா். எதிா்காலம் வளமாக அமையும். பிரதி ஞாயிற்றுக்கிழமைகளில் சூரியபகவானையும் சிவபெருமானையும் வழிபட்டு வரவும்.


     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    kattana sevai