Enable Javscript for better performance
பரஸ்பர நிதியில் சேமிப்பு- Dinamani

சுடச்சுட

    
    money

    வங்கியில் டெபாசிட் செய்வது, தங்கத்தில் முதலீடு, நிலம் வாங்குவது இவை பாரம்பரிய சேமிப்பு வழிமுறைகள். பின்னர் பங்குச் சந்தை முதலீடும் சேர்ந்து கொண்டது. ஆனால் பங்குகளில் முதலீடு செய்வோர் எண்ணிக்கை மற்றவற்றில் இருப்பதைவிடக் குறைவு என்றே கூறிவிடலாம். இவற்றுள் மிக மிகப் பாதுகாப்பானது வங்கி சேமிப்பு என்ற நம்பிக்கை இன்று வரை உண்மையாகவே இருந்து வருகிறது. ஆனால் அங்கு வட்டி விகிதங்கள் வேகமாக சரிந்து வருகின்றன.
    ஆனால் பங்குச் சந்தை அதிக வருவாயை ஈட்டித் தருவதையும் கண்கூடாகப் பார்க்கிறோம். பங்குச் சந்தை முதலீடுகள் வீழ்ச்சி அடையும் "ஆபத்து' உண்டு. அதன் பலன்கள் தேவை, ஆனால் நமது முதலீடுக்கு ஆபத்து ஏற்படக் கூடாது என்று நினைப்பவர்களுக்கு ஏற்ற முதலீடு பரஸ்பர நிதித் திட்டங்கள்.
    பங்குச் சந்தை பற்றிய அனுபவம் மிக்க நபர்களை நிதி நிர்வாகிகளாகக் கொண்டு பரஸ்பர நிதிகள் நிர்வகிக்கப்படுகின்றன.
    நமது சேமிப்புத் தொகையானது பங்குச் சந்தை, அரசு கடன் பத்திரங்கள் உள்ளிட்டவற்றில் முதலீடு செய்யப்படுகிறது.
    ஏராளமான திட்டங்களைப் பரஸ்பர நிதி நிறுவனங்கள் வழங்கி வருகின்றன. அவற்றில் சிறிய முதலீட்டாளர்களுக்கு ஏற்றது, "எஸ்.ஐ.பி.' எனப்படும் "திட்டமிட்ட மாதாந்தர முதலீடு'.
    இந்த வகை திட்டங்களில் முதலீடு செய்வதற்கு முன்பு, நமக்கு ஏற்ற திட்டங்கள் எவை என இணையதளத்திலேயே பார்த்து ஒப்பிட்டுக் கொள்ளலாம்.
    சேமிப்பைத் தொடங்கும் முன், எதற்காக சேமிக்கிறோம் என்பதை தீர்மானித்துக் கொள்ள வேண்டும். வரிச் சலுகை, நீண்ட காலத்துக்குப் பிறகு வருவாய் தேவை போன்ற காரணங்களுக்காக, குறிக்கோளுடன் சேமிப்பது நல்லது. திருமணம், குழந்தைகளின் படிப்பு, சொந்த மனை, புது வீடு, வீட்டை மேம்படுத்துதல்- என பல வகை செலவுகள் உள்ளன. சேமிப்பு தொடங்கும் நாளிலிருந்து அந்த செலவுக்கு எத்தனை காலம் உள்ளது என்பதைப் பொருத்து சேமிக்கும் தொகையை முடிவு செய்து கொள்ளுங்கள்.
    குழந்தையின் படிப்பு என்று எடுத்துக் கொண்டால், பிரபலமான பள்ளிகளில் குழந்தைகளை ஆரம்பக் கல்விக்கு சேர்ப்பதற்கே பெரும் தொகை தேவைப்படுகிறது. இதற்கு குழந்தை பிறந்த தேதி முதல் சேமிக்கத் தொடங்கலாம். மாதம் ரூ.1,000 அல்லது 2,000 வீதம் சேமிக்கத் தொடங்கினாலே, மூன்று ஆண்டுகளில் வட்டியுடன் கணிசமான தொகை சேரும். அதையே பரஸ்பர நிதியில் முதலீடு செய்தால் கூடுதல் தொகை சேர்ந்துவிடும்.
    பரஸ்பர நிதிகளில் எப்போது வேண்டுமானாலும் இணைந்து முதலீடு செய்யும் "ஓபன் எண்டெட்' வகை திட்டங்கள் உண்டு. அதில் எப்போது வேண்டுமானாலும் சேரலாம், விலகலாம். முதலீட்டுத் திட்டக் காலம் முடியும்போது மட்டுமே முதலீடு-வருவாயுடன் விலக அனுமதிக்கும் "க்ளோஸ் எண்டெட்' திட்டங்களும் உள்ளன.
    நமது தேவை, குறிக்கோளுக்கு ஏற்ப முதலீட்டு முறையைத் தேர்ந்தெடுக்க வேண்டும். பல்வேறு பரஸ்பர நிதித் திட்டங்களில் வெவ்வேறு முதலீட்டு அளவுகளுடன் முதலீடு செய்தால் ஆபத்தில்லாத, சீரான வருவாய்க்கு வழி வகுக்கலாம்.
    நமக்கு கிடைக்கும் ஊதிய உயர்வு, வருடாந்தர ஊக்கத் தொகை போன்றவற்றை கூடுதல் செலவுக்கு மட்டுமே பயன்படுத்தாமல், சேமிக்க கிடைத்த வாய்ப்பாகக் கருதி சேமிப்பு திட்டங்களில் முதலீடு செய்ய வேண்டும்.

     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai