டெபாசிட்டுகளுக்கான வட்டி குறைப்பு: எஸ்பிஐ 

நாட்டின் மிகப்பெரிய பொதுத் துறை வங்கியான பாரத ஸ்டேட் வங்கி பல்வேறு கால அளவுகளைக் கொண்ட குறித்தகால டெபாசிட்டுகளுக்கான வட்டி விகிதத்தை 0.50 சதவீதம் வரை குறைத்துள்ளது.
 இதுகுறித்து அந்த வங்கி வெளியிட்ட அறிக்கையில் தெரிவித்துள்ளதாவது: 7-45 நாள்கள் வரையிலான முதிர்வு காலத்தைக் கொண்ட டெபாசிட்டுகளுக்கான வட்டி விகிதம் தற்போதைய 5 சதவீதத்திலிருந்து 4.5 சதவீதமாக குறைக்கப்பட்டுள்ளது. அதேபோன்று, 46-179 நாள்கள், 180-1 ஆண்டுக்கும் குறைவான டெபாசிட்டுகளுக்கான வட்டி விகிதங்கள் முறையே 0.25 சதவீதம் குறைக்கப்பட்டு 6 சதவீதத்திலிருந்து 5.5 சதவீதமாக நிர்ணயிக்கப்பட்டுள்ளன.
 1-2 ஆண்டு முதிர்வு காலத்தைக் கொண்ட டெபாசிட்டுகளுக்கான வட்டி 0.10 சதவீதம் குறைக்கப்பட்டு 6.70 சதவீதமாக்கப்பட்டுள்ளது. மேலும், 5-10 ஆண்டுகள் வரையிலான டெபாசிட்டுகளுக்கான வட்டியும் 0.25 சதவீதம் குறைக்கப்பட்டு 6.25 சதவீதமாக்கப்பட்டுள்ளது. சேமிப்பு கணக்கில் ரூ.1 லட்சத்துக்கும் அதிகமாக வைக்கப்படும் தொகைக்கு 3 சதவீத வட்டியும், ரூ.1 லட்சம் வரையிலான தொகைக்கு 3.50 சதவீத வட்டியும் எப்போதும் போல் தொடரும். இந்த வட்டி குறைப்பு நடவடிக்கை ஆகஸ்ட் 26-ஆம் தேதியிலிருந்து அமலுக்கு வரும் என அந்த அறிக்கையில் பாரத ஸ்டேட் வங்கி தெரிவித்துள்ளது. இந்த டெபாசிட் வட்டி குறைப்பு நடவடிக்கையை அடுத்து, இன்னும் பிற வங்கிகளும் வட்டி குறைப்பு அறிவிப்புகளை அடுத்தடுத்து வெளியிடும் என எதிர்பார்க்கப்படுகிறது.