நடப்பு நிதியாண்டில் 450 புதிய கிளைகளை அமைக்கவும், 3500 பேருக்கு பணிவாய்ப்புகளை வழங்கவும் உள்ளதாக ஐசிஐசிஐ வங்கி தெரிவித்துள்ளது.
இதுகுறித்து அந்த வங்கியின் செயல் இயக்குநர் அனுப் பக்ஷி பிடிஐ-யிடம் தெரிவித்துள்ளதாவது:
பணமதிப்பு நீக்கம், ஜிஎஸ்டி மற்றும் கடுமையான கட்டுப்பாடுகள் காரணமாக, ரியல் எஸ்டேட் துறை தற்போது பெரிதும் பாதிக்கப்பட்டுள்ளது. அதேசமயம், இது வங்கியின் விரிவாக்க நடவடிக்கைகளுக்கு கைகொடுத்துள்ளது.
வரும் 2020-ஆம் ஆண்டு மார்ச் மாதத்துக்குள் 450 புதிய கிளைகளை அமைக்கவுள்ளோம். இதையடுத்து, வங்கியின் ஒட்டுமொத்த கிளைகளின் எண்ணிக்கை 5,300-ஐ எட்டும். மேலும், நடப்பு நிதியாண்டின் இறுதிக்குள் 3500 பேருக்கு வேலைவாய்ப்பை வழங்கவும் இலக்கு நிர்ணயித்துள்ளோம். சந்தைப் பங்களிப்பை பொருத்தவரை இரட்டை இலக்க வளர்ச்சியை நெருங்கி விட்டோம் என்றார் அவர்.