புது தில்லி: நாட்டின் மிகப்பெரிய காா் தயாரிப்பு நிறுவனமான மாருதி சுஸுகி இரண்டாவது காலாண்டில் ஈட்டிய லாபம் 66 சதவீதம் சரிந்துள்ளது.
இதுகுறித்து அந்த நிறுவனம் புதன்கிழமை வெளியிட்ட அறிக்கையில் தெரிவித்துள்ளதாவது:
நடப்பு நிதியாண்டின் ஜூலை-செப்டம்பா் வரையிலான இரண்டாவது காலாண்டில் நிறுவனத்தின் ஒட்டுமொத்த வருவாய் ரூ.20,551 கோடியாக இருந்தது. இது, முந்தைய நிதியாண்டின் இதே காலகட்டத்தில் ரூ.18,756 கோடியாக இருந்தது.
ஒட்டுமொத்த நிகர லாபம் ரூ.1,420 கோடியிலிருந்து 66 சதவீதம் சரிவடைந்து ரூ.487 கோடியானது. செமிகன்டெக்டருக்கு பற்றாக்குறை மற்றும் மூலப் பொருள்களின் விலை உயா்வால் நிறுவனத்தின் லாபம் சரிவைச் சந்தித்துள்ளது.
செப்டம்பா் காலாண்டில் நிறுவனத்தின் மொத்த வாகன விற்பனை 3,93,130 என்ற எண்ணிக்கையிலிருந்து 3 சதவீதம் குறைந்து 3,79,541-ஆக இருந்தது. உள்நாட்டில் விற்பனை 3,70,619-லிருந்து 3,20,133-ஆக குறைந்தது.
ஏற்றுமதி முன்னெப்போதும் இல்லாத வகையில் 22,511-லிருந்து 59,408-ஆக அதிகரித்தது என மாருதி சுஸுகி தெரிவித்துள்ளது.