புது தில்லி: கடந்த 4 நாள்களாகத் தொடர்ந்து ஏறுமுகத்தில் இருந்து வந்த பங்குச் சந்தை, புதன்கிழமை லாபப் பதிவால் அதிகம் விற்பனையை எதிர்கொண்டது. இதனால், மும்பை பங்குச் சந்தைக் குறியீட்டு எண்ணான சென்செக்ஸ் 214 புள்ளிகளை இழந்து 57,338}இல் நிலைபெற்றது. ஆனால், ரியால்ட்டி பங்குகளை வாங்குவதற்கு முதலீட்டாளர்களிடம் அதிகம் போட்டி காணப்பட்டது.
பொருளாதார வளர்ச்சி: உலகளாவிய சந்தைக் குறிப்புகள் சாதகமாக இருந்தன. ஆனால், உள்நாட்டுச் சந்தை தொடர்ந்து புதிய உச்சத்தை தொட்டு வந்த நிலையில், முதலீட்டாளர்கள் பங்குகளில் லாபத்தைப் பதிவு செய்வதில் கவனம் செலுத்தினர். குறிப்பாக ஐடி, மெட்டல் பங்குகள் அதிக அளவு விற்பனையை எதிர்கொண்டன. நாட்டின் பொருளாதார வளர்ச்சி 20.1 சதவீதமாக சாதகமான நிலையில் இருந்தும், அதன் தாக்கம் சந்தையில் எதிரொலிக்காமல் போனதாக பங்கு வர்த்தகத் தரகு நிறுவனங்கள் தெரிவித்தன.
மேலும், எச்டிஎஃப்சி, டிசிஎஸ், இன்ஃபோஸிஸ் உள்ளிட்ட முன்னணி நிறுவனப் பங்குகள் அதிகம் விற்பனையைச் சந்தித்ததால் சரிவு தவிர்க்க முடியாததாகிவிட்டது என்று வர்த்தகர்கள் தெரிவித்தனர். இருப்பினும், நடுத்தர, சிறிய நிறுவனப் பங்குகளுக்கு ஓரளவு ஆதரவு கிடைத்தது.
சந்தை மதிப்பு ரூ.250.15 லட்சம் கோடி : மும்பை பங்குச் சந்தையில் மொத்தம் வர்த்தகமான 3,330 நிறுவனப் பங்குகளில் 1,513 பங்குகள் ஆதாயம் பெற்றன. 1,664 பங்குகள் சரிவைச் சந்தித்தன. 153 பங்குகள் மாற்றமின்றி நிலைபெற்றன. 226 பங்குகள் புதிய 52 வார அதிகபட்ச விலையையும், 17 பங்குகள் குறைந்தபட்ச விலையையும் பதிவு செய்தன. மேலும், 282 பங்குகள் வெகுவாக உயர்ந்து உயர்ந்தபட்ச உறை நிலையையும், 204 பங்குகள் வெகுவாகக் குறைந்து, குறைந்தபட்ச உறை நிலையையும் அடைந்தன. சந்தை மூலதன மதிப்பு மேலும் ரூ.13,000 கோடி உயர்ந்து ரூ.250.15 லட்சம் கோடியை எட்டியது. பதிவு பெற்றுள்ள முதலீட்டாளர்களின் எண்ணிக்கை 7,82,63,968}ஆக உயர்ந்துள்ளது.
புதிய உச்சத்தில் லாபப் பதிவு: சென்செக்ஸ் காலையில் 211.14 புள்ளிகள் கூடுதலுடன் 57,763.53}இல் தொடங்கி, அதிகபட்சமாக 57,918.71 வரை உயர்ந்து புதிய வரலாற்றுச் சாதனை அளவைப் பதிவு செய்தது. அதன் பிறகு, லாபப் பதிவு காரணமாக பங்குகள் விற்பனை அதிகரித்ததும், 57,263.90 வரை கீழே சென்ற சென்செக்ஸ், இறுதியில் 214.18 புள்ளிகளை (0.37 சதவீதம்) இழந்து 57,338.21}இல் நிலைபெற்றது. சென்செக்ஸ் பட்டியலில் மொத்தமுள்ள 30 முதல் தர நிறுவனப் பங்குகளில் 14 பங்குகள் மட்டுமேஆதாயம் பெற்றன. 16 பங்குகள் சரிவைச் சந்தித்தன.
ஏஷியன் பெயிண்ட்ஸ் அபாரம்: சென்செக்ஸ் பட்டியலில் உள்ள ஏஷியன் பெயிண்ட்ஸ் 3.20 சதவீம் உயர்ந்து ஆதாயப் பட்டியலில் முன்னிலை வகித்தது. இதற்கு அடுத்ததாக நெஸ்லே இந்தியா, ஆக்ஸிஸ் பேங்க், டாக்டர் ரெட்டீஸ் லேப், டைட்டன், எல் அண்ட் டி உள்ளிட்டவை 1 முதல் 1.75 சதவீதம் வரை உயர்ந்தன. மேலும், எஸ்பிஐ, பஜாஜ் ஆட்டோ, இன்டஸ்இண்ட் பேங்க், ரிலையன்ஸ் உள்ளிட்ட முன்னணிப் பங்குகள் ஓரளவு உயர்ந்து சென்செக்ஸ் கடும் வீழ்ச்சியைத் தடுத்து நிறுத்தின.
எம் அண்ட் எம், டாடா ஸ்டீல் சரிவு: அதே சமயம், எம் அண்ட் எம் 2.89 சதவீதம், டாடா ஸ்டீல் 2.67 சதவீதம் குறைந்து வீழ்ச்சிப் பட்டியலில் முன்னிலை வகித்தன. இதற்கு அடுத்ததாக, பஜாஜ் ஃபின்சர்வ், டிசிஎஸ், எச்டிஎஃப்சி, இன்ஃபோஸிஸ், ஹெச்சிஎல் டெக் உள்ளிட்டவை 1.50 முதல் 2 சதவீதம் வரை சரிவைச் சந்தித்தன. மேலும், மாருதி சுஸýகி, கோட்டக் பேங்க், எச்டிஎஃப்சி பேங்க், ஐசிஐசிஐ பேங்க் உள்ளிட்டவையும் வீழ்ச்சிப் பட்டியலில் வந்தன.
நிஃப்டி 56 புள்ளிகள் சரிவு: தேசிய பங்குச் சந்தையில் மொத்தம் 820 பங்குகள் ஆதாயம் பெற்றன. 964 பங்குகள் சரிவைச் சந்தித்தன. 50 முதல் தரப் பங்குகளை உள்ளடக்கிய நிஃப்டி குறியீடு 55.95 புள்ளிகள் (0.37 சதவீதம்) குறைந்து 17,076.25}இல் நிலை பெற்றது. காலையில் 17,185.60}இல் தொடங்கிய நிஃப்டி, அதிகபட்சமாக 17,225.75 வரை உயர்ந்து புதிய வரலாற்று உச்சத்தைப் பதிவு செய்தது. ஆனால், அதன் பிறகு லாபப் பதிவால் 17,055.05 வரை கீழே சென்றது. இதனால், 7 நாள் தொடர் ஏற்றத்துக்கு முற்றுப்புள்ளி வைக்கப்பட்டது. நிஃப்டி பட்டியலில் 21 பங்குகள் மட்டுமே ஆதாயம் பெற்றன. 29 பங்குகள் சரிவைச் சந்தித்தன.
துறை வாரியாகப் பார்த்தால், நிஃப்டி ஐடி குறியீடு 1.33 சதவீதம், மெட்டல் குறியீடு 1.79 சதவீதம் குறைந்து வீழ்ச்சிப் பட்டியலில் முன்னிலை வகித்தன. அதே சமயம், ரியால்ட்டி குறியீடு 5.57 சதவீதம், நுகர்வோர் சாதன குறியீடு 1.98 சதவீதம் உயர்ந்து முதலீட்டாளர்களை திகைப்பில் ஆழ்த்தியது.