நாட்டின் மிகப்பெரிய பொதுத் துறை வங்கியான பாரத ஸ்டேட் வங்கி (எஸ்பிஐ), பல்வேறு மொத்த டெபாசிட்டுகளுக்கான வட்டி விகிதத்தை 0.40 சதவீதம் முதல் 0.90 சதவீதம் வரை அதிகரித்துள்ளது.
இதுகுறித்து அந்த வங்கி செவ்வாய்க்கிழமை வெளியிட்ட செய்திக்குறிப்பில் தெரிவித்துள்ளதாவது:
ரூ.2 கோடி மற்றும் அதற்கு மேலான மொத்த டெபாசிட்டுகளுக்கான வட்டி விகிதம் செவ்வாய்க்கிழமை முதல் அதிகரிக்கப்பட்டுள்ளது. அதன்படி, 46-179 நாள்களுக்கிடையில் மேற்கொள்ளப்படும் குறித்த கால டெபாசிட்டிற்கான வட்டி விகிதம் 3 சதவீதத்திலிருந்து 3.50 சதவீதமாக உயா்த்தப்பட்டுள்ளது. 180-210 நாள்கள் கால அளவைக் கொண்ட டெபாசிட்டிற்கான வட்டி 0.4 சதவீதம் அதிகரிக்கப்பட்டு 3.10 சதவீதத்திலிருந்து 3.50 சதவீதமாக்கப்பட்டுள்ளது. 211 நாள்கள்-1ஆண்டுக்கும் குறைவான டெபாசிட்டிற்கான வட்டி 0.45 சதவீதம் அதிகரிக்கப்பட்டு 3.30 சதவீதத்திலிருந்து 3.75 சதவீதமாக்கப்பட்டுள்ளது.
ஓராண்டு-2 ஆண்டுக்கும் குறைவான டெபாசிட்டிற்கு 4 சதவீதமும், 2-3 ஆண்டு முதிா்வுக்கு 4.25 சதவீதமும், 3-10 ஆண்டு டெபாசிட்டிற்கு 4.50 சதவீதமும் வட்டி வழங்கப்படும் என எஸ்பிஐ தெரிவித்துள்ளது.