3 ஆண்டுகளில் 6,744 மருத்துவப் பணியிடங்கள் நிரப்பப்பட்டுள்ளன: எடப்பாடி பழனிசாமிக்கு அமைச்சா் மா.சுப்பிரமணியன் பதில்

தமிழகத்தில் கடந்த மூன்று ஆண்டுகளில் மட்டும் சுகாதாரத் துறையில் 6,744 காலிப் பணியிடங்கள் நிரப்பப்பட்டுள்ளதாக மக்கள் நல்வாழ்வுத் துறை அமைச்சா் மா.சுப்பிரமணியன் தெரிவித்தாா்.

மக்கள் நல்வாழ்த் துறையில் உள்ள காலி பணியிடங்களை நிரப்ப வேண்டும் என எதிா்க்கட்சித் தலைவா் எடப்பாடி பழனிசாமி அறிக்கை வெளியிட்ட நிலையில், அவருக்கு பதிலளிக்கும் வகையில் அவா் இவ்வாறு கூறினாா்.

சென்னை மருத்துவக் கல்லூரியில் மருத்துவ மாணவா்கள், நோயாளிகளுக்கான 3 பிரத்யேக வாகன சேவை, குளிரூட்டப்பட விரிவுரை அரங்குகள், கலையரங்கம், கல்லூரி மாணவா் பேரவை ஆகியவற்றை அமைச்சா் மா.சுப்பிரமணியன் வியாழக்கிழமை தொடக்கி வைத்தாா். தொடா்ந்து, இந்திய மருத்துவ ஆராய்ச்சிக் கவுன்சிலின் கீழ் ஆராய்ச்சி நடவடிக்கைகளை மேற்கொள்ளும் நான்கு உதவி பேராசிரியா்களுக்கு சான்றிதழ்களையும் அவா் வழங்கினாா். அதன் பின்னா் செய்தியாளா்களிடம் அவா் கூறியதாவது:

ராஜீவ்காந்தி அரசு மருத்துவமனையில் கழிவு நீா் அடைப்பு ஏற்பட்டதாகவும், இதனால், நோயாளிகள் பாதிக்கப்பட்டுள்ளதாகவும் அதிமுக பொதுச் செயலா் எடப்பாடி பழனிசாமி அறிக்கை வெளியிட்டிருந்தாா். இதுகுறித்து விசாரித்த போது, மெட்ரோ ரயில் பணிகள் காரணமாக, கழிவு நீா் சுமாா் 20 நிமிஷங்கள் வெளியே வந்திருக்கிறது. அது உடனடியாக சரி செய்யப்பட்டுள்ளது. ஆனால், இந்த விஷயம் எதிா்க்கட்சித் தலைவருக்கு பூதாகரமாக தெரிந்திருக்கிறது. அதுமட்டுமல்லாது, மருத்துவத் துறையில் காலி பணியிடங்களை உடனடியாக நிரப்ப வேண்டும் எனவும் அவா் கூறியிருக்கிறாா். வியாழக்கிழமை (ஆக.29) மட்டும் 127 உணவு பாதுகாப்பு துறை அலுவலா்களுக்கு பணி நியமன ஆணைகள் வழங்கப்பட்டுள்ளன.

இதேபோன்று மருத்துவா்கள், செவிலியா்கள் என மருத்துவப் பணியாளா் நியமனங்கள் தொடா்ந்து நடைபெற்று வருகின்றன. கடந்த 3 ஆண்டுகளில் மட்டும் 1947 உதவி மருத்துவா்கள், 1291 மருத்துவம் சாா்ந்த பணியாளா்கள், 977 தற்காலிக செவிலியா்கள், 946 மருந்தாளுநா்கள், 1583 தட்டச்சா்கள், சுருக்கெழுத்தா்கள், சுகாதார அலுவலா்கள் என மொத்தம் 6,744 பணியிடங்கள் வெளிப்படத்தன்மையுடன் நிரப்பப்பட்டுள்ளன.

மருத்துவக்கல்லூரி முதல்வா்கள்: மருத்துவக் கல்லூரிகளில் காலியாக உள்ள முதல்வா் பொறுப்புகளுக்கு எவரையும் நியமிக்கவில்லை என்றும் எடப்பாடி பழனிசாமி குற்றம்சாட்டியுள்ளாா். மருத்துவக் கல்லூரி முதல்வா்கள் ஓய்வு பெற்றால், உடனடியாக பொறுப்பு முதல்வா்கள் நியமிக்கப்படுவாா்கள். அந்த வகையில் தற்போது தமிழகத்தில் எந்த மருத்துவக் கல்லூரியிலும் முதல்வா் பொறுப்பு காலியாக இல்லை. மேலும், புதிய கல்லூரி முதல்வா்களை நியமிப்பதற்காக 26 முதல்வா்கள் உள்ளடங்கிய பட்டியல் தயாா் செய்யும் பணி நடந்து வருகிறது. இந்த பணிகள் இன்னும் ஓரிரு நாள்களில் நிறைவடையும். அதன்பிறகு கலந்தாய்வு மூலம் முதல்வா்கள் நியமிக்கப்படுவாா்கள். இவை எதுவும் தெரியாமல் முன்னாள் முதல்வா் அறிக்கை விட்டிருப்பது நகைப்புக்குரியது என்றாா் அவா்.

இந்நிகழ்வில் மக்கள் நல்வாழ்வுத் துறை செயலா் சுப்ரியா சாஹு, மருத்துவக் கல்வி இயக்குநா் சங்குமணி, சென்னை மருத்துவக் கல்லூரி முதல்வா் எ.தேரணிராஜன், துணை முதல்வா் கவிதா உள்ளிட்டோா் பங்கேற்றனா்.