ஜாதி உணர்வுள்ள படங்களில் நடிக்கிறேனா? சசிகுமார் வெளிப்படையான பதில்!

சோலை பிரகாஷ் இயக்கத்தில் சசிகுமார், கோவை சரளா, தன்யா ஆகியோர் நடித்த பலே வெள்ளையத் தேவா, டிசம்பர் 23 அன்று வெளிவருகிறது. இந்நிலையில் தன் மீதான விமரிசனங்களுக்கு சசிகுமார் பதிலளித்துள்ளார். ஒரு பேட்டியில் அவர் கூறியதாவது:

படைப்பாளிகள் குறிப்பிட்ட ஒரு ஜாதியை மட்டும் குறிவைத்துப் படம் எடுப்பார்கள் என்று கூறமுடியாது. பலே வெள்ளையத் தேவா படம் எந்தவொரு ஜாதிக்கும் ஆதரவானதல்ல. சிவாஜி நடித்த வீரபாண்டிய கட்டபொம்மன் படத்தில், பலே வெள்ளையத் தேவா, வெற்றியுடன் திரும்பிவா என்றொரு வசனம் வரும். அதைவைத்துதான் இந்தப் படத்துக்குப் பெயர் வைத்தேன்.

என்னுடைய படங்களில் குறிப்பிட்ட ஒரு ஜாதியைத் தூக்கிப்பிடிப்பதாக என் மீது ஒரு விமரிசனம் உண்டு. நான் சினிமா கலைஞன். என் பொறுப்புகள் பற்றி நன்கு அறிவேன். என்னுடைய படங்களில் ஜாதி ரீதியான தடயங்கள் இல்லாமல் பார்த்துக்கொள்கிறேன்.

தமிழ்நாட்டின் குறிப்பிட்ட ஒரு பகுதியிலிருந்து நான் வந்துள்ளதால் என் படங்கள்மீது ஜாதி முத்திரை குத்தப்படுகிறது. என்னிடம் கதை சொல்பவர்களும் மதுரை, தேனியில் நடக்கும் கதைகளாகச் சொல்கிறார்கள். அதேசமயம் என் படங்களின் கதை, கதாபாத்திரங்களில் எந்தவொரு ஜாதி முத்திரையும் விழாமல் பார்த்துக்கொள்கிறேன் என்றார்.