வீரம், வேதாளம், விவேகம் ஆகிய படங்களைத் தொடர்ந்து நான்காவது முறையாக அஜித் நடித்த விஸ்வாசம் படத்தை இயக்கினார் சிவா. அடுத்ததாக, சூர்யா கதாநாயகனாக நடிக்கும் படத்தை அவர் இயக்கவுள்ளார்.
இந்நிலையில் சமீபத்தில் ரஜினியை அவரது போயஸ் கார்டன் இல்லத்தில் சந்தித்துப் பேசியிருக்கிறார் சிவா. இதனால் ரஜினியின் அடுத்தப் படத்தை சிவா இயக்கவுள்ளதாகப் பரபரப்பு கிளம்பியது.
ஆனால் இத்தகவலை ரஜினியின் செய்தித் தொடர்பாளர் ரியாஸ் அகமது மறுத்துள்ளார். ட்விட்டரில் அவர் கூறியுள்ளதாவது:
ரஜினி - சிவா தொடர்பான சந்திப்பு குறித்து எழுந்துள்ள ஊகம் தவறானது. இந்த வருட ஆரம்பத்தில் வெளியான விஸ்வாசம் படத்தின் வெற்றிக்கு வாழ்த்துகளைப் பெறுவதற்காக ரஜினியை சிவா சந்தித்தார் என்று அவர் விளக்கமளித்துள்ளார்.