நெட்பிளிக்ஸ் ஓடிடி தளத்தில் வெளியான படங்கள் ஏழு ஆஸ்கர் விருதுகளை வென்றுள்ளன.
93-வது ஆஸ்கர் விருது வழங்கும் விழா பிப்ரவரி 28 அன்று நடைபெறும் என முதலில் அறிவிக்கப்பட்டது. ஆனால், உலகம் முழுக்க கரோனா வைரஸ் அச்சுறுத்தல் நிலவுவதால் ஆஸ்கர் விருது வழங்கும் விழா இரு மாதங்களுக்கு ஒத்திவைக்கப்பட்டது. 2021 பிப்ரவரி 28-க்குப் பதிலாக ஏப்ரல் 25 அன்று ஆஸ்கர் விருது வழங்கும் விழா நடைபெறும் என அறிவிக்கப்பட்டது. ஆஸ்கர் விருதுகளுக்கான பரிந்துரைப் பட்டியல் மார்ச் மாதம் வெளியிடப்பட்டது.
ஆஸ்கர் விருது வழங்கும் விழா நேரடியாகவும் இணையம் வழியாகவும் நடைபெற்றது. லாஸ் ஏஞ்சல்ஸில் உள்ள யூனியன் ஸ்டேஷன், டால்பி திரையரங்கம் ஆகிய இடங்களில் விருது வழங்கும் விழா நடைபெற்றது. விருதுக்குப் பரிந்துரைக்கப்பட்டவர்களும் விருந்தினர்களும் நியூ யார்க் மற்றும் லண்டனில் அமைக்கப்பட்ட கூடுதல் விழா அரங்கிலும் கலந்துகொண்டார்கள்.
சிறந்த படத்துக்கான விருதை நோமட்லேண்ட் பெற்றுள்ளது. சிறந்த இயக்குநருக்கான விருதை ஜாவோ (நோமட்லேண்ட்), சிறந்த நடிகருக்கான விருதை ஆந்தனி ஹாப்கின்ஸ் (தி ஃபாதர்), சிறந்த நடிகைக்கான விருதை பிரான்சஸ் மெக்டர்மாண்ட் (நோமட்லேண்ட்) சிறந்த ஒளிப்பதிவாளருக்கான விருதை எரிக் (மான்க்) ஆகியோர் பெற்றுள்ளார்கள். சிறந்த வெளிநாட்டுப் படத்துக்கான விருதை டென்மார்க்கின் அனதர் ரவுண்ட் படம் பெற்றுள்ளது.
மார்ச் மாதம் வெளியிடப்பட்ட ஆஸ்கர் விருதுகளுக்கான பரிந்துரைப் பட்டியலில் நெட்பிளிக்ஸில் நேரடியாக வெளியான 17 படங்கள், 36 விருதுகளுக்குப் பரிந்துரைக்கப்பட்டிருந்தன.
இந்நிலையில் நெட்பிளிக்ஸில் வெளியான ஏழு படங்கள் ஆஸ்கர் விருதுகளை வென்றுள்ளன. அடுத்ததாக டிஸ்னி ஓடிடி தளம் ஐந்து விருதுகளை வென்றுள்ளது.
இதற்கு முன்பு வரை நெட்பிளிக்ஸில் வெளியான படங்கள் எட்டு ஆஸ்கர் விருதுகளை வென்றன. இப்போது அதன் எண்ணிக்கை 15 ஆக உயர்ந்துள்ளது.
ஆஸ்கர் விருதுகளை வென்ற நெட்பிளிக்ஸ் படங்கள்:
சிறந்த ஒளிப்பதிவு - மான்க்
சிறந்த கலை இயக்கம் - மான்க்
சிறந்த அனிமேஷன் (குறும்படம்) - இஃப் எனிதிங் ஹேப்பன்ஸ் ஐ லவ் யூ
சிறந்த குறும்படம் (லைவ் ஆக்ஷன்) - டூ டிஸ்டண்ட் ஸ்டிரேஞ்சர்ஸ்
சிறந்த ஆவணப்படம் - மை ஆக்டோபஸ் டீச்சர்
சிறந்த ஆடை வடிவமைப்பு - மா ரைனிஸ் பிளாக் பாட்டம்
சிறந்த ஒப்பனை - மா ரைனிஸ் பிளாக் பாட்டம்