சிவகார்த்திகேயன் தயாரித்து நடித்துள்ள 'டான்' திரைப்படம் வருகிற மார்ச் 25 ஆம் தேதி திரைக்குவரவிருக்கிறது. டாக்டர் படத்தின் வெற்றிக்கு பிறகு இந்தப் படம் வெளியாவதால் படத்தின் மீதான எதிர்பார்ப்பு அதிகரித்துள்ளது.
அறிமுக இயக்குநர் சிபி சக்கரவர்த்தி இயக்கியுள்ள இந்தப் படத்தில் சிவகார்த்திகேயனுக்கு ஜோடியாக பிரியங்கா மோகன் நடித்திருக்கிறார். மேலும், பால சரவணன், மிர்ச்சி விஜய், சிவாங்கி, சமுத்திரக்கனி, எஸ்ஜேசூர்யா உள்ளிட்டோர் முக்கிய வேடங்களில் நடித்துள்ளனர். அனிருத் இசையில் இந்தப் படத்தின் பாடல்கள் நல்ல வரவேற்பை பெற்றுள்ளன.
இந்தப் படத்தையடுத்து சிவகார்த்திகேயன் தமிழ், தெலுங்கில் உருவாகும் படத்தில் நடிக்கவிருக்கிறார். இந்தப் படத்துக்கு தமன் இசையமைக்க, மனோஜ் பரமஹம்சா ஒளிப்பதிவு செய்கிறார். ஜதி ரத்னாலு பட இயக்குநர் அனுதீப் இந்தப் படத்தை இயக்குகிறார். நடிகர் சத்யராஜ் இந்தப் படத்தில் முக்கிய வேடத்தில் நடிக்கிறார்.
இந்தப் படத்தின் பூஜை இன்று(பிப்ரவரி 10) நடைபெற்றது. பூஜையின் போது எடுக்கப்பட்ட படங்கள் வைரலாகி வருகிறது. இந்தப் படம் புதுச்சேரியைக் கதைக் களமாக கொண்டு உருவாகும் என்று கூறப்பட்டது. இந்த நிலையில் இந்தப் படத்தின் படப்பிடிப்பு காரைக்குடியில் இன்று முதல் துவங்குகிறது. பிரேம்ஜி இந்தப் படத்தின் படப்பிடிப்பில் கலந்துகொள்கிறார்.