Enable Javscript for better performance
பகையாகும் புகை...!- Dinamani

சுடச்சுட

    

    சுகாதாரம் குறித்துப் பேசும்போது பொதுவாக கண்ணுக்குத் தெரியக் கூடிய, சுற்றுப்புறச் சுகாதாரம் குறித்தே அதிகம் நமது கவனத்துக்கு வருகிறது. ஆனால், கண்ணுக்குத் தெரியாத, காற்றில் கலக்கக் கூடிய நச்சுகளால் மனித குலம் மட்டுமல்ல, விலங்குகள், உணவுப் பயிர்கள் ஆகியவையும் பெரிதும் பாதிக்கப்படுகின்றன. இதனால் நச்சு உணவுகளையே நாம் உண்டு வரு
    கிறோம் என்பது கொடுமையான விஷயம்.
    பல்வேறு வகையான எரிபொருள்களைப் பயன்படுத்துவதன் மூலம் காற்று மாசு அதிகரிக்கிறது. தொழிற்சாலைகளில் இருந்து வெளியாகும் புகையினால் அதிக காற்று மாசு ஏற்படுகிறது. நிலக்கரி உள்ளிட்டவற்றைப் பயன்படுத்தி மின்னுற்பத்தி செய்யும் நிலையங்கள், மோட்டார் வாகனப் புகை முதல் பெயிண்ட், கேசத்தில் தெளித்துக் கொள்ளும் ரசாயன ஹேர் ஸ்பிரே ரகங்கள், வார்னிஷ் உள்ளிட்டவற்றில் இருந்து வெளியாகும் வேதிப் பொருள்கள் காற்றில் பரவி, நச்சுத் தன்மையை அதிகரிக்கச் செய்கின்றன.
    மாசினால் காற்றில் கலக்கும் கண்ணுக்குத் தெரியாத பல்வேறு வகையான வேதிப் பொருள்கள் மனித உயிரைக் குடித்து வருகின்றன.
    காற்று மாசைக் கட்டுப்படுத்தவில்லையென்றால், உலக நாடுகள் பெரிய அளவிலான பாதிப்பைச் சந்திக்க நேரிடும் என்று உலக சுகாதார அமைப்பு எச்சரிக்கை விடுக்கின்றது. இதைத் தொடர்ந்துதான், காற்று மாசைக் குறைக்க, தனி நபர்களின் பெட்ரோல், டீசல் வாகனங்களின் இயக்கத்தை குறிப்பிட்ட நாள்களில் நிறுத்தி, பொது போக்குவரத்தைப் பயன்படுத்த வேண்டும் என்றும் படிப்படியாக உலகம் முழுவதும் மின்சார வாகனங்களுக்கு மாற வேண்டும் எனவும் கூறப்படுகிறது. நகரில் குறைவான தூரப் பயணத்துக்கு சைக்கிளை அதிகம் பயன்படுத்த வேண்டும் என்றெல்லாம் வலியுறுத்தப்படுகிறது.
    நகர்ப்புறங்களை ஒட்டியுள்ள பகுதிகளில் பல்வேறு உற்பத்தி நிறுவனங்களும், ஆலைகளும், விரிவாக்கக் குடியிருப்புகளும் அதிகரித்துள்ளன. இதனால், இரு மற்றும் 4-சக்கர வாகனங்களின் புழக்கமும் அதிகரித்துள்ளது என்பது கண்கூடு. இதனால், தில்லி, பெங்களூரு, மும்பை உள்ளிட்ட நகரங்களில் காற்று மாசு அதிகரித்துள்ளது என்றும் ஆய்வு அறிக்கைகள் தெரிவிக்கின்றன. மேலும் காற்று மாசு உள்ள 100 நகரங்களும் கண்டறியப்பட்டுள்ளன.
    இது உண்மை என்றாலும், இதற்கு எதிர்மறையாக தற்போது ஓர் ஆச்சரியமான விவரத்தை வெளியிட்டுள்ளனர். அதாவது, நகர்ப்புறங்களில் உள்ள காற்று மாசைவிட, கிராமப்புறங்களில் காற்று மாசு அதிகமாக உள்ளதாம்! அதுவும், மாட்டுச் சாணத்தால் தயாரிக்கப்பட்ட எரு, விறகு உள்ளிட்டவற்றைக் கொண்டு சமையல் செய்யும்போது, வெளியாகும் புகையானது காற்று வெளியில் கலந்து, அதிக அளவில் மாசு ஏற்படுகிறது என்று கண்டறிந்துள்ளனர். வயல்களில் கழிவுப் பயிர்களை எரிப்பதன் மூலமும் காற்று மாசு அதிகரிக்கிறது. அதாவது, கிராமப்புறங்களில் இது ஒரு முக்கியமான பிரச்னையாக உள்ளது என்று மத்திய அரசு தெரிவித்துள்ளது.
    இந்தியா மட்டுமல்ல, உலக நாடுகள் அனைத்திலும் இத்தகைய நிலைதான். வளரும் நாடுகளில் உள்ள கிராமங்களில் இத்தகைய காற்று மாசு அதிகமாகவே உள்ளது என்றும் தெரிவிக்கப்பட்டுள்ளது. அதாவது, கிராமப்புறம் என்றால் பசுமை, தூய்மை என்று எண்ணிய காலம் மாறி வருகிறது!
    இது தவிர, வெளியிடங்களில் ஏற்படும் மாசால் பாதிக்கப்படுவதைவிட, நான்கு சுவர்களுக்குள் இருந்து வெளியாகும் மாசால்தான் அதிகமானோர் பாதிக்கப்படுகின்றனர் என்றும் தெரிவிக்கப்பட்டுள்ளது. சமையலறையில் போதிய காற்றோட்ட வசதி இல்லாதது ஆகியவை உள்புற மாசு ஏற்பட முக்கியக் காரணங்களாகக் கூறப்படுகின்றன. இத்தகைய உள்புற மாசு, நகர்ப்புறங்களில் உள்ள கட்டடங்களில் அதிகம் ஏற்படுகிறது என்றும் கண்டறியப்பட்டுள்ளது. மேலும், கட்டுமானத்தின்போது செயற்கைப் பொருள்களைப் பயன்படுத்துவது, பெயிண்ட், வேதிப் பொருள்கள், பூச்சிகொல்லிகள் உள்ளிட்டவற்றாலும் காற்று மாசு ஏற்படுகிறது.
    இத்தகைய மாசுகளைக் கண்டறிய போதிய காற்று மாசு கண்காணிப்பு மையங்கள் தற்போது இல்லை. மாசுப் பிரச்னைக்குத் தீர்வு காண்பதற்காக அதிக அளவிலான காற்று மாசு கண்டறியும் நிலையங்களை நாடு முழுவதும் அமைக்க மத்திய அரசு திட்டமிட்டுள்ளது. இதன் மூலம் அடுத்த 5 ஆண்டுகளில் காற்று மாசை பாதியாகக் குறைக்க மத்திய அரசு திட்டமிட்டுள்ளது. தற்போது தலைநகர் தில்லியை ஒட்டியுள்ள பகுதிகளில் கண்காணிப்பு நடவடிக்கைகளை மத்திய அரசு மேற்கொண்டுவரும் நிலையில், அதை நாடு முழுவதும் கிராமப் பகுதிகளுக்கு விரிவுபடுத்தத் திட்டமிட்டுள்ளது.
    கை கழுவுதல் போன்ற உடல் தூய்மை நடவடிக்கை போல புறத் தூய்மை குறித்தும் காற்று மாசு குறித்தும் விழிப்புணர்வை ஏற்படுத்த மத்திய, மாநில அரசுகள் முனைப்பு காட்ட வேண்டும். இதை ஒரு முனைப்பு இயக்கமாக மேற்கொள்ள வேண்டியது அவசியமாகும். குறிப்பாக, கிராமப்புறப் மக்களுக்கு இதுகுறித்த விழிப்புணர்வை ஏற்படுத்த வேண்டியது அவசர, அவசியமாகும்.






     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai