Enable Javscript for better performance
நீர் மேலாண்மை காலத்தின் கட்டாயம்!- Dinamani

சுடச்சுட

    

    நீர் மேலாண்மை காலத்தின் கட்டாயம்!

    By கு. தாமோதரன்  |   Published on : 08th January 2019 01:34 AM  |   அ+அ அ-   |    |  

    அண்மைக்காலமாக நீர்வளம் குறித்த புள்ளிவிவரங்கள் மேலும் அச்சத்தைஏற்படுத்துகின்றன. உலக மக்கள்தொகையில், 18 சதவீதத்தைத் தன்னகத்தே கொண்ட இந்தியா, வெறும் 4 சதவீத நீராதாரத்தை மட்டுமே கொண்டுள்ளது. 
    அமெரிக்கா, ஆஸ்திரேலிய நாடுகள் தனி நபருக்கு ஐந்தாயிரம் கனஅடி நீரைச் சேமிக்கும் அளவுக்கு நீர்நிலைகளைத் தன்னகத்தே கொண்டுள்ளன. ஆனால், இந்தியா வெறும் 200 கனஅடி நீரை மட்டுமே சேமிக்கும் நீர்நிலைகளைக் கொண்டுள்ளது. இந்த நீர்நிலைகள் தற்போது சரியான பராமரிப்பில் உள்ளதா என்ற கேள்வியும் எழுகிறது. 
    உலகளவில் வேகமாக தண்ணீர் பஞ்சம் ஏற்படும் நகரங்களில் இந்தியாவில் உள்ள பெங்களூரு இரண்டாவது இடத்தில் இருப்பதாக ஓர் ஆய்வு கண்டறிந்துள்ளது. இந்த நிலை புது தில்லி, மும்பை மற்றும் சென்னை நகரங்களிலும் அடுத்தடுத்து தொடரும் என்றும் எச்சரிக்கிறது. நீர்நிலைகளைப் பராமரிக்கத் தவறினால் 2040-ம் ஆண்டுக்குள் இந்தியா முழுவதும் குடிநீர்ப் பஞ்சம் ஏற்படும் என்று ஆய்வுகள் எச்சரிக்கின்றன. 
    நீராதாரத்திற்கு மூலமாக விளங்குவது மழை நீராகும். அதைப் பாதுகாத்துப் பயன்படுத்த நமது முன்னோர் குளம், ஏரி மற்றும் நீர்த்தேக்கங்கள் பலவற்றை ஏற்படுத்தினர். 
    விவசாயத்துக்காகவும் மக்களின் அடிப்படைத் தேவைகளுக்காகவும் உருவாக்கப்பட்ட நீர் நிலைகளைப் பலப்படுத்தியும், தூர்வாரியும் தொடர்ந்து•சுத்தமாகப் பராமரித்து வந்தனர். 
    மக்களின் குடிநீர்த் தேவைகளுக்கும் இந்த நீர்நிலைகளே ஆதாரமாக விளங்கின. இதன் மூலம் நீர் மேலாண்மையை நமது முன்னோர் சிறப்பாகக் கையாண்டனர். நமது முன்னோரின் பாதையை நாம் பின்பற்றத் தவறியதே நீராதாரப் பிரச்னைகளுக்கு முக்கியக் காரணம். 
    சிறு ஓடைகள் அல்லது வாய்க்கால்கள் மழைநீரை நீர்நிலைகளுக்குக் கொண்டு செல்லும் பாலமாகச் செயல்பட்டன. இந்தத் தொடர்புகள் தற்போது முற்றிலுமாகத் துண்டிக்கப் பெற்றதால், மழைநீர் பெருமளவுக்கு வீணடிக்கப்படுகிறது. மேலும், குளம், ஏரி மற்றும் ஆற்றின் கரையோர இடங்கள் பொதுமக்களால் ஆக்கிரமிக்கப்பட்டுள்ளன. ஒருபுறம், நீர்நிலைகள் கழிவுகளை நிரப்பும் குப்பைத் தொட்டிகளாக பொதுமக்களால் பயன்படுத்தப்படுகின்றன. மறுபுறம், இச்சூழலைப் பயன்படுத்தி கொண்டு, தொழிற்சாலைகளும் நீர்நிலைகளில் கழிவுகளை கலக்கத் தொடங்கிவிட்டன. 
    பெரும்பான்மையான நீர்நிலைகள் கழிவுகளால் மூடப்பட்டுவிட்டன. மீதமுள்ள குளங்களையும், ஏரிகளையும் ஆக்கிரமித்து சிலர் வீட்டு மனைகளாக மாற்றிவிட்டதும் சூழலியலின் உச்சபட்ச பின்னடைவாகும். 
    மழைநீரை நீர்நிலைகளில் சேமிக்கத் தவறியது ஒரு புறமிருக்க, நமது அரசால் கொண்டுவரப்பட்ட மழைநீர் சேகரிப்பு திட்டமும் பலனளிக்காமல் போனது. 
    புதிதாக வீடு கட்ட அனுமதி பெறும்போது, மழைநீர் சேகரிப்புக்கான திட்டமும் வீட்டின் மாதிரி வரைபடத்தில் இருக்க வேண்டும் என்பது விதி. அவ்வாறே, பொதுமக்களும் வரைபடத்தில் திட்டத்தைச் செயல்படுத்துகின்றனர். ஆனால், கட்டடங்களில் இந்தத் திட்டம் செயல்வடிவம் பெறுவதில்லை. 
    மொத்தத்தில், மழை நீர் சேகரிப்புக்கு பெரிதும் அவசியமாகிற குளம், ஏரிமற்றும் ஆறுகள் சரிவர பராமரிக்கப்படாததால் பெருமளவிலான மழைநீர் வீணடிக்கப்படுகிறது. 
    ஊராட்சி மற்றும் நகராட்சிகள் இயற்கை வளங்களை மேலாண்மை செய்யத் தவறிவிட்டன. அதுபோன்றே, குடியிருப்புகளில் மழைநீர் சேகரிப்புத் திட்டத்தைத் தாமாக முன்வந்து ஏற்படுத்த வேண்டும் என்கிற எண்ணம் மக்களிடம் இல்லை. 
    எனவே, மழை நீர் வளத்தைப் பாதுகாக்க, 1992-ஆம் ஆண்டு கொண்டுவரப்பட்ட 73-ஆவது மற்றும் 74-ஆவது சட்டப் பிரிவான இயற்கை வளங்களை ஊராட்சி மற்றும் நகராட்சிகள் பாதுகாக்க வேண்டும் என்கிற சட்டத்தைத் தீவிரமாக நடைமுறைப்படுத்த வேண்டும். 
    நீர் மேலாண்மையை ஊராட்சி மற்றும் நகராட்சிகளிடம் ஒப்படைப்பதற்கு முன், அரசு• சில முக்கியப் பணிகளைச் செய்யவேண்டியது அவசியமாகிறது. முதலில், அரசின் நில அளவை கொண்டு, நீர்நிலைகளான குளம், ஏரி மற்றும் ஆறுகளின் எண்ணிக்கை, •சுற்றளவு ஆகியவற்றைச் சரிபார்க்கும் நடவடிக்கைளில் இறங்க வேண்டும்.
    நாடு முழுவதும் உள்ள நீர்நிலைகளின் ஆக்கிரமிப்புகளைப் போர்கால அடிப்படையில் அகற்றிட வேண்டும். அடுத்து, அரசு• நிதியிலிருந்து நீர்நிலைகளைத் தூர் வாரி, அணையைப் பலப்படுத்தி, நீர்நிலைகளின் •சுற்றளவையும் ஆழத்தையும் உறுதி செய்திட வேண்டும். இந்தப் பணி முடிந்த பின், நீர் மேலாண்மை பொறுப்பை அந்தந்த ஊராட்சி மற்றும் நகராட்சிகளிடம் வழங்கிட வேண்டும். 
    ஊராட்சி மற்றும்நகராட்சிகள், நீர்மேலாண்மை பொறுப்பை ஏற்ற பிறகு, முதல் பணியாக, நீர் நிலைகள் ஆக்கிரமிக்கப்படாமல் இருக்க கரையோரங்களில் மரக்கன்றுகளை நட்டுப் பராமரிக்க வேண்டும். 
    இரண்டாவது, துண்டிக்கப்பட்ட சிறு ஓடைகளையும் வாய்க்கால்களையும் சீரமைத்து நீர்நிலைகளுக்குத் தொடர்பை ஏற்படுத்த வேண்டும். மூன்றாவதாக, மக்கள் வாழ்விடங்களில் மழைநீர் சேகரிப்பை நடைமுறைப்படுத்த வேண்டும். மழைநீர் சேகரிப்பு தொட்டி அமைப்பது தொடர்பான சந்தேகங்களை மக்களிடையே ஊராட்சி மற்றும் நகராட்சி நிர்வாகிகள் விளக்கிட வேண்டும். மக்கள் குடியிருப்புகளில் உள்ள மழைநீர் சேகரிப்பு தொட்டியை மூன்றாண்டுக்கு ஒரு முறை புனரமைக்க வேண்டும்.
    நான்காவதாக, ஒவ்வொரு ஆண்டும் அரசு• கொடுத்துள்ள நீர்நிலைகளின் எண்ணிக்கை, •சுற்றளவு, ஆழம் சரியாக இருக்கின்றதா என்பதை ஆய்வு செய்து நீர்நிலைகளைச் செப்பணிட வேண்டும்.
    இவ்வாறு செய்யும் நிலையில் நம் நாடு நீர்வளம் மிக்கதாக விளங்கும் என்பதில் சந்தேகமில்லை. 

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    flipboard facebook twitter whatsapp