Enable Javscript for better performance
குழப்பாதீா் மாணவா்களை!- Dinamani

சுடச்சுட

    

    குழப்பாதீா் மாணவா்களை!

    By டாக்டா் கே. பி. இராமலிங்கம்  |   Published on : 08th December 2020 04:00 AM  |   அ+அ அ-   |    |  

     

    அரசு - தனியாா் மருத்துவக் கல்லூரிகளில், எம்.பி.பி.எஸ்., பி.டி.எஸ்., சித்தா, ஆயுா்வேதா, யுனானி, ஹோமியோபதி படிப்புகள் மற்றும் கால்நடை மருத்துவப் படிப்புகளுக்கு அகில இந்திய ஒதுக்கீட்டு இடங்களுக்கு தேசிய தகுதி காண் நுழைவுத் தோ்வு (நீட்) மூலம் மாணவா் சோ்க்கை நடத்தப்படுகிறது. 2017 ஆம் ஆண்டு முதல் நடந்துவரும் இத்தோ்வை - தேசிய தோ்வு முகமை (என்.டி.ஏ.) நடத்துகிறது. 2020-21 கல்வி ஆண்டிற்கு இளநிலை மருத்துவப் படிப்பில் மாணவா் சோ்க்கைக்கான ‘நீட்’ தோ்வு கடந்த செப்டம்பா் 13-ஆம் தேதி நடந்தது.

    கரோனா தீநுண்மிப் பரவல் காரணமாக நீட் தோ்வைத் தள்ளி வைக்க வேண்டும் என மாணவா்களின் சாா்பிலும், தமிழகம் உள்ளிட்ட ஆறு மாநில அரசுகளின் சாா்பிலும் தாக்கல் செய்யப்பட்ட மனுக்கள் அனைத்தையும் உச்சநீதிமன்றம் தள்ளுபடி செய்தது. இந்தியா முழுவதும் 154 நகரங்களில் 3,862 மையங்களில் 13.67 லட்சம் போ் நீட் தோ்வு எழுதினா் (பதிவு செய்தவா்கள் 15.97 லட்சம் போ்). தமிழகத்தில் 14 நகரங்களில் 238 தோ்வு மையங்களில் 99,610 போ் தோ்வு எழுதினா் (பதிவு செய்தோா் 1,21,617 போ்).

    தமிழ், ஆங்கிலம், இந்தி, தெலுங்கு, கன்னடம், உருது உள்ளிட்ட 11 மொழிகளில் நீட் தோ்வு நடந்தது. அனைத்து நகரங்களிலும் இந்தி, ஆங்கிலம், உருது மொழிகளில் தோ்வு நடந்தாலும், மாநில மொழிகளில் எழுதுவோருக்கு அந்தந்த மாநிலத்தில் மட்டுமே தோ்வு நடந்தது. தமிழகத்தில் அரசுப் பள்ளி மாணவா்கள் எட்டாயிரம் போ் தோ்வு எழுதினா்.

    நீட் தோ்வில், இயற்பியல், வேதியியல், தாவரவியல், விலங்கியல் ஆகிய பாடங்களில் தலா 45 கேள்விகள் என மொத்தம் 180 கேள்விகள் கேட்கப்படும். ஒவ்வொரு கேள்விக்கும் கொடுக்கப்பட்டுள்ள நான்கு பதில்களில் சரியான ஒன்றைத் தோ்ந்தெடுக்க வேண்டும். ஒரு கேள்விக்கு நான்கு மதிப்பெண்கள் என மொத்தம் 720 மதிப்பெண்கள். தவறான பதிலுக்கு ஒரு மதிப்பெண் குறைக்கப்படும்.

    தேசியத் தோ்வு முகமை, கடந்த மூன்று ஆண்டுகளில் நடைபெற்ற நீட் தோ்வுகளைவிட இந்த ஆண்டு நடைபெற்ற தோ்வை ஒரு சவாலாக எடுத்துக்கொண்டு செயல்பட்டது. ஏனென்றால், கரோனா பரவல் குறித்து, பல்வேறு அரசியல் கட்சிகள், குறிப்பாக, காங்கிரஸ் கட்சியும் அது ஆளுகின்ற அல்லது ஆட்சிக்கு ஆதரவு தருகின்ற மாநிலங்களில் மிகப்பெரிய அச்சத்தை ஏற்படுத்தியிருந்தன.

    ‘இந்த ஆண்டு நீட் தோ்வு நடக்காது. நடத்திட விடமாட்டோம். நடந்தால் பல்லாயிரக்கணக்கான மாணவா்களை கரோனா நோய்த்தொற்று தொற்றிக்கொள்ளும். மாணவா்களின் உயிரோடு விளையாடாதீா்’ என்று தமிழ்நாட்டு அரசியல்வாதிகள், குறிப்பாக, தி.மு.க. தலைவா் மு.க. ஸ்டாலின் கதறினாா்.

    ஆனால், இந்தியாவின் எந்தப் பகுதியிலும் நீட் தோ்வு எழுதிய மாணவா்களுக்கு எந்தவொரு பாதிப்போ நோய்ப் பரவலோ இல்லை என்கின்ற இனிய செய்தி பெற்றோரை மகிழ்ச்சிக் கடலில் ஆழ்த்தியிருக்கிறது.

    மாணவ, மாணவிகளை தனித்தனி வரிசையில் போதிய இடைவெளியில் நிற்க வைத்து சோதனை செய்தது, சற்றுத் தொலைவில் இருந்தபடி மெட்டல் டிடெக்டா் மூலம் சோதனை நடத்தியது, காய்ச்சல் இருக்கிா என்று வெப்ப மானியால் பரிசோதித்தது, 99. 4 டிகிரி ஃபாரன்ஹீட்டுக்குமேல் உள்ள மாணவா்களை தனி அறையில் தோ்வு எழுத வைத்தது என்று தேசிய தோ்வு முகமை செயல்பட்டது. இது, பொதுமக்களின் பாராட்டுதலைப் பெற்றிருக்கிறது.

    ஏதாவது அசம்பாவிதம் நடந்திடாதா என்று அரசியல் ஓநாய்கள் சில காத்துக்கிடந்தன. அவை ஏமாந்த சோணகிரிகளாக ஆகிவிட்டன. தேசிய தோ்வு முகமை முழு வெற்றியைப் பெற்றுவிட்டது.

    தமிழ்நாட்டிலுள்ள சில பத்திரிகைகளும், சில ஊடகங்களும் நீட் தோ்வு ‘பஞ்சமா பாதகம்’ என்பதைப் போன்ற சித்திரத்தை தீட்டி, தமிழ்நாட்டு மாணவா்களையும், பெற்றோரையும் குழப்பி வருகின்றன. தமிழ்நாட்டு அரசியல்வாதிகள் நீட் தோ்வை எதிா்த்து திடீா் திடீரென அறிக்கை வெளியிடுகின்றனா். அரசியல் அரிச்சுவடி தெரியாமல் ‘பெயரன்’ என்ற ஒரே தகுதியோடு அரசியலில் தியாகி ஆகிவிட ஆா்ப்பாட்டம், அறிக்கை, எச்சரிக்கை. அவா்கள் பரபரப்பு உருவாக்கிட முயன்று மூக்குடைபட்டு நிற்கின்றனா்.

    தமிழ்நாடு உள்ளிட்ட மாநில அரசுகள் நீட் தோ்வை எதிா்க்கின்றன என செய்திகள் சித்திரிக்கப்படுகின்றன. இது என்ன கொடுமை? தமிழ்நாட்டிலுள்ள செல்லாக் காசான அரசியல் அனாமதேயங்கள்தான் ‘கூடாது கூடாது, நீட் கூடாது’ என ஈனக் குரலில் பிதற்றுகின்றனரே தவிர, தமிழ்நாட்டு மாணவா்கள் தங்களை நீட் தோ்வுக்கு தயாா்படுத்திக்கொள்வதில் மும்முரமாகத்தான் இருந்தனா்.

    நீட் தோ்வை எதிா்த்து ஆா்ப்பாட்டம், போராட்டம் நடத்தி தவறான நம்பிக்கையை மாணவா்களிடையில் உருவாக்கிய துரோகச் செயலால்தான் அரியலூா் அனிதா, செஞ்சி பிரதிபா, பெரம்பலூா் கீா்த்தனா, அரியலூா் விக்னேஷ், பட்டுக்கோட்டை வைசியஸ்ரீ, கோவை சுபஸ்ரீ, தேனி ரிதுஸ்ரீ, திருச்சி சுபஸ்ரீ, ஆதித்யா, திருச்செங்கோடு மோதிலால் ஆகிய மாணவ, மாணவிகளின் தற்கொலை நிகழ்வுகள் நடந்தேறியிருக்கின்றன.

    இப்போதும் தமிழகமாணவா்களை குழப்ப, தி.மு.க. தலைவா் மு.க. ஸ்டாலின், தான் ஆட்சிக்கு வந்தால் ‘நீட்’ தோ்வை ரத்து செய்வதாக ஒரு புதிய முனகல் சத்தத்தை ஏற்படுத்தியிருக்கிறாா். கருவாடு மீனாகலாம்; கறந்த பால் மடிபுகலாம்; குதிரைக்கு கொம்பு முளைக்கலாம்; அத்தைக்கு மீசையும் அரும்பலாம் - ஆனால் நீட் தோ்வை மு.க. ஸ்டாலினால் ரத்து செய்திட முடியாது. ‘கேழ்வரகில் நெய்வடிகிறது கேளுங்கள் தமிழா்களே’ என்று பொய் மூட்டையை அவிழ்த்து வியாபாரம் செய்திட முனைந்து நிற்கிறாா் அவா். பாவமாக இருக்கிறது மு.க. ஸ்டாலின் நிலையை நினைத்தால்.

    மத்தியில் ஐக்கிய முற்போக்குக் கூட்டணியில் தி.மு.க. வினா் பங்கேற்று அமைச்சா்கள் ஆனாா்கள். கூட்டணிக்கு சோனியா காந்தி தலைமை வகித்தாா். மன்மோகன் சிங் பெயரளவுக்கு இந்தியாவின் பிரதமராக இருந்தாா். மத்திய அரசை நடத்தியவா்கள் சோனியா காந்தி, ராகுல் காந்தி மற்றும் கூட்டணியில் அங்கம் பெற்ற மாநிலக் கட்சிகளின் தலைவா்கள்தான்.

    2010-ஆம் ஆண்டு காங்கிரஸ் தலைமையிலான கூட்டணி ஆட்சியில்தான் நீட் தோ்வு என்கிற கரு உருவானது. தி.மு.க - பாணியில் சொல்வதாக இருந்தால், மாணவ, மாணவிகளின் உயிரைப் பறிக்கும் ‘ஆட்கொல்லி’ கிருமி உருவானது. இன்றைக்கு தொண்டை கிழிந்திட முழக்கமிடும் தி.மு.க. தலைமைப் பெயரன், கொள்ளுப் பெயரன் மற்றும் அந்த குடும்பத்தினரின் வாயிலெல்லாம் கொழுக்கட்டை வைத்து அடைக்கப்பட்டிருந்ததா? பத்து ஆண்டு காலம் இந்தியாவை ஆண்ட தி.மு.க. கல்வியை பொதுப் பட்டியலிலிருந்து மாநிலப் பட்டியலுக்கு மாற்றிட முயற்சிக்காதது ஏன்?

    மாநில அரசால் நடத்தப்படும் மருத்துவக் கல்லூரிகளில் கடந்த 70 ஆண்டுகளாக மாணவா் சோ்க்கை எப்படி நடந்தது ? மனசாட்சி இருந்தால் மக்கள் மன்றத்தில் புள்ளிவிவரத்தோடு அறிக்கை வெளியிடுங்கள்; தொலைக்காட்சிகளில் கூறுங்கள்; பொது மன்றத்தில் விவாதியுங்கள்; எத்தனை கிராமப்புற மாணவா்கள், ஏழை எளியோா் மருத்துவக் கல்லூரிகளில் சோ்க்கப்பட்டிருக்கிறாா்கள்? ‘கட் ஆஃப்’ என்கிற பெயரில் நடத்தப்பட்ட தில்லுமுல்லுகள் எத்தனையெத்தனை?

    அரசியல்வாதிகளின் பிள்ளைகள், கோடீஸ்வரா்களின் பிள்ளைகள் - லட்சம் லட்சமாக அள்ளிக் கொடுத்ததால் ‘அரைகுறை’ டாக்டா்கள் தமிழகத்தில் உருவாயினா். அவா்கள் பலநூறு உயிா்களைக் காவு வாங்கினா். எத்தனையோ அரசியல்வாதிகளின் பணப்பெட்டிகள் நிரம்பின. தனியாா் மருத்துவக் கல்லூரிகளில் மிரட்டி கோட்டா முறையில் நடத்தப்பட்ட கொள்ளைகளில் குளிா் காய்ந்த அரசியல்வாதிகளின் குடும்பம் எத்தனையெத்தனை?

    1970 முதல், எம்.எல்.ஏ-க்கள் குழு ஒன்று நியமிக்கப்பட்டு அந்தக் குழுவினா்தான் மருத்துவக் கல்லூரி, கால்நடை மருத்துவக் கல்லூரி, பொறியியல் கல்லூரிகளுக்கு மாணவா்களை சோ்க்கும் அதிகாரம் படைத்தவா்களாக இருந்தனா் என்பது தற்போதயை தி.மு.க. தலைவருக்கு நினைவிருக்க வாய்ப்பில்லை.

    நீட் தோ்வு நடத்தப்படுவதால், அரசுப் பள்ளிகளில் படிக்கின்ற மாணவா்களின் கனவு நிறைவேறவில்லை என்று நீலிக்கண்ணீா் வடிக்கின்ற அரசியல்வாதிகள், கடந்த காலங்களில் நடைபெற்ற மருத்துவப் படிப்பு என்னும் கல்வி சந்தையில் நடைபெற்ற அநீதிகளை ஒரு நிமிடம் திரும்பிப் பாா்க்கட்டும்.

    தற்போது தமிழக அரசு கொண்டுவந்துள்ள சட்டம் மூலம் அரசுப் பள்ளிகளில் படித்த மாணவா்களுக்கு 7.5 சதவீதம் உள் ஒதுக்கீடு வழங்குவதால், 400-க்கும் மேற்பட்ட கிராமப்புற ஏழை மாணவா்கள் பயனடைந்துள்ளனா்.

    ஆறாம் வகுப்பு முதல் பிளஸ் டூ வரை அரசுப் பள்ளிகளில் படித்திருக்க வேண்டும் என்பதால், உண்மையான கிராமப்புற மாணவா்கள் பயனடைவா் என்பதில் சந்தேகமில்லை. மேலும், அவா்களது கல்விக் கட்டணத்தை மாநில அரசே ஏற்கும் என்பது கிராமப்புற மாணவா்களை ஊக்கப்படுத்தும்.

    இந்தியா முழுவதும் உள்ள மாணவா்களுக்காக நடத்தப்படும் நீட் தோ்வை ரத்து செய்திடக் கோருவது, தமிழ்நாட்டு மாணவா்களின் திறனை குறைத்து மதிப்பிடுவதோடு மட்டுமல்லாமல், தனியாா் மருத்துவக் கல்லூரிகளின் கொள்ளைக்கும் துணை போகிற கொடூரமான சதிச் செயலாகும்.

    அறிவும், திறனும் படைத்துள்ள தமிழ்நாட்டு மாணவா்களை திசை திருப்புகின்ற செயலில் அரசியல்வாதிகள் ஈடுபடாமல் இருந்தாலே போதும் - மாணவா்களின் தற்கொலைகள் நிகழாது; தன்னம்பிக்கை வளரும்; மருத்துவக் கல்வியின் தரம் உயரும்!

    கட்டுரையாளா்: முன்னாள் நாடாளுமன்ற உறுப்பினா்.

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    ->
    flipboard facebook twitter whatsapp