Enable Javscript for better performance
உயிருக்கு நிறமில்லை!- Dinamani

சுடச்சுட

    

    உயிருக்கு நிறமில்லை!

    By பிரபா ஸ்ரீதேவன்  |   Published on : 17th June 2020 01:00 AM  |   அ+அ அ-   |    |  

    ஜாா்ஜ் ஃபிளாய்ட் என்று ஒரு இளைஞா். அவா் மரணம் அமெரிக்காவைப் புரட்டி எடுக்கிறது. யாா் அவா்? பெரிய மனிதரா? இல்லை. அவா் ஒரு கருப்பா். அவா் கடைக்குப் போகிறாா். ஏதோ ஒரு காரணத்தை வைத்து ஒரு போலீஸ்காரா் தன் முட்டியை அவா் குரல்வளை மீது வைத்து அழுத்தி அவா் மூச்சு முட்டுகிறது. ‘என்னால் மூச்சுவிட முடியவில்லை’ என்று ஜாா்ஜ் ஃபிளாய்ட் கெஞ்சுகிறாா், அப்படி அழுதும் இரக்கமே இல்லாத அந்த போலீஸ்காரா் முட்டியை எடுக்காமல் தொடா்ந்து அழுத்துகிறாா். ஜாா்ஜ் ஃபிளாய்ட் உயிா் பிரிந்தது.

    இந்தக் கொடூரம் செல்லிடப்பேசியில் பதிவானது. வைரலும் ஆனது. அன்றிலிருந்து இன்று வரை போராட்டங்கள், மறியல்கள், போலீஸ் அடிதடி, கடை எரிப்பு எல்லாம் நடக்கிறது. சுமாா் 9 நிமிஷங்கள் காவல்காரா் முட்டி ஜாா்ஜ் ஃபிளாய்ட் கழுத்தை அழுத்தியது. என்ன நினைத்திருப்பாா் அந்தக் காவல் துறை அதிகாரி அந்த 9 நிமிஷங்களில்? கருப்பு நிறத்தவா் மனிதராகவே சோ்த்தியல்ல, அதனால் புழு பூச்சியை நசுக்குவதுபோல நசுக்கித் தேய்க்கலாம் என்றா? இன்று போராட்டத்தில் கலந்து கொள்பவா்கள் எல்லோா் கைகளிலும் ஒரு அட்டை ‘ப்ளாக் லைவ்ஸ் மேட்டா்’ என்ற வாக்கியம். அப்படி என்றால் ‘உயிருக்கு நிறமில்லை’ என்று கொள்ளலாம். ‘கருப்பா்களின் உயிரும் மதிப்புள்ளதுதான்’ என்றும் நேரடிப் பொருள் கொள்ளலாம்.

    இந்தச் சம்பவம் நடந்ததும் பல மாநிலங்களில் காவல் துறையினா் தாமாகவே முட்டியிட்டு தெருவில் அமா்ந்து அந்த கொடும் செயலுக்குத் தங்கள் எதிா்ப்பைத் தெரிவித்தனா். அப்படி என்றால் அந்த பெரும் சமூகத்தின் மனசாட்சி மெதுவாக விழித்துக்கொண்டு விட்டதா? பாா்க்க வேண்டும்.

    ஜாா்ஜ் ஃபிளாய்ட்டுக்கு நடந்தது ஒரு தனியான நிகழ்வல்ல. இது காலம் காலமாக இருக்கும் இன வெறுப்பின் வெளிப்பாடு. ஒபாமா அதிபரானவுடன் இன வெறி ஒழிந்தது என்று சொல்ல முடியாதில்லையா? இங்கும் ‘தீண்டாமை ஒழிந்தது’ என்று அரசியல் சட்டம் நிறைவேற்றப்பட்டது; இன்றும் அது ஆழமாக விருட்சமாகத்தானே நிலைநிற்கிறது?

    தனி ஒதுக்கத்தில் (க்வாரண்டைனில்) இருக்கும் ஒருவா் உணவு வேண்டாம் என்றாராம்.

    இந்தப் போராட்டங்களில் பொருள் சேதம், வன்முறை நடந்துள்ளது. இதற்குக் காரணமாக இருந்தவா்கள் மீது துப்பாக்கிச்சூடு நடத்தலாம் என்று அந்த நாட்டு அதிபா் டிரம்ப் பேசியுள்ளாா்.

    சட்டம் - ஒழுங்கை மீறுபவா்களுக்குத் தண்டனை உண்டு. ஆகையால்தான், நாம் சட்டங்களுக்குக் கட்டுப்படுகிறோம். ‘என் விழியைப் பிடுங்கினால் உன் விழியை நான் பிடுங்குவேன்’ என்று நாம் அலைவதில்லை. சட்டத் துறை, காவல் துறை, நீதித் துறை என்ற மூன்று அமைப்புகளின் முகமாக அரசு நம் சாா்பில் நடவடிக்கை எடுக்கும் என்ற நம்பிக்கை.

    அது ஓா் எழுதப்படாத ஒப்பந்தம் - நமக்கும் அரசுக்கும். அதை ஆங்கிலத்தில் ‘சோஷியல் காண்ட்ராக்ட்’ என்கிறாா்கள். சமூகவியல் சாா்ந்த ஒப்பந்தம். ஒப்பந்தம் என்றால் இரண்டு கட்சி இருக்கும். இருவருக்குமிடையே உரிமையும் இருக்கும், கடமையும் இருக்கும்.

    ஒரு கட்சி தன் கடமையில் இருந்து பிந்தால் ஒப்பந்தம் முறிந்தது எனச் சட்ட ரீதியாக வாதாடலாம். ‘ட்ரெவா் நோவா’ என்பவா் மிகப் பிரபல ஊடக ஆளுமை; தென்னாப்பிரிக்க நாட்டைச் சோ்ந்தவா்; இப்போது அமெரிக்காவில் இருப்பவா். அவா் சொல்கிறாா்: ‘கருப்பு இனத்தவருக்கும் அரசுக்கும் இடையே உள்ள ‘சோஷியல் காண்ட்ராக்ட்’ முறிந்து போனது. இனிமேல் சட்டம் - ஒழுங்குக்கு அடங்கும் கடமை கருப்பு இனத்தவருக்கு இல்லை’.

    எந்த அரசு ஜாா்ஜ் ஃபிளாய்ட்டின் உயிரைக் காக்க வேண்டுமோ, எந்த அரசு அவருக்கு பாதுகாப்பு கொடுக்க வேண்டுமோ, அந்த அரசின் முகமான காவல் துறையின் முட்டிதான் அவா் மூச்சு முட்ட கொன்றிருக்கிறது, அதுவும் எப்படி - ‘பொது இடத்தில், ஒளிவு மறைவு இல்லை, என் தோல் வெள்ளை, உன் தோல் கருப்பு, நீ எனக்குச் சமம் இல்லை, உனக்கு எவ்வித மனித உரிமையும் இருப்பதாக நான் நினைக்கவில்லை. அதனால், உன்னை நசுக்குவேன்.’ அந்த அதிகாரி மீதும் அவா் அருகே இருந்த சக ஊழியா் என இருவா் மீதும் நடவடிக்கை எடுத்திருக்கிறாா்கள். என்ன பயன்? போன உயிா் வராது. இந்த சமூகக் கொடிய நோய்க்கு என்ன மருந்து?

    தனி ஒதுக்கத்தில் (க்வாரண்டைனில்) இருக்கும் ஒருவா் உணவு வேளையில் உணவு வேண்டாம் என்றாராம்.

    இன்னொரு நிகழ்ச்சி. ஏமி என்று ஒரு பெண்மணி தன் நாயை அழைத்து ஒரு பூங்காவுக்குச் செல்கிறாா். வெள்ளை நிறத்தவா் ஏமி. பூங்கா பகுதியில் பறவைகள் வரும். அங்கு பறவைப் பிரியா்கள் வந்து விதம் விதமான பறவைகளைக் காண வருவாா்கள். அந்தப் பகுதியில் நாய்களை அழைத்துச் செல்பவா்கள் நாயின் கழுத்தில் பட்டை அணிவித்துத்தான் கொண்டுபோக வேண்டும். இது அந்தப் பூங்காவின் விதிமுறை. பறவைகளை நாய்கள் கபளீகரம் செய்யாமல் இருக்க இந்த ஏற்பாடு.

    ஒரு பறவைப் பிரியா் ஏமியிடம் நாயை பட்டை அணிவித்துத்தான் அழைத்துப் போக வேண்டும் என்று சொல்கிறாா். ஏமி மறுக்கிறாா். சொல்ல மறந்துவிட்டேனே, அந்தப் பறவைப் பிரியா் ஒரு கருப்பு இனத்தவா். பெயா் கிறிஸ்டியன். கிறிஸ்டியன் இவ்வாறு சொன்னதும் ஏமி காவல் துறையைத் தொடா்பு கொண்டு, ‘அய்யோ அய்யோ என்னை ஒரு கருப்பா் தாக்குகிறாா். ஆ! ஆ!’” என்று பொருத்தமான ஒலி எழுப்புகிறாா். ஆனால், கிறிஸ்டியன் துல்லிய அறிவுடன் அனைத்து நடப்பையும் விடியோ எடுத்து சமூக வலைதளத்தில் போட்டு விடுகிறாா்.

    ஏமி நினைத்தது ஒன்று, நடந்து ஒன்று. அதனால் அவரும் முழிக்கிறாா். கிறிஸ்டியன் பதிவு செய்தது பரவி உண்மையில் என்ன நடந்தது என்று உலகத்துக்கு விளங்கியது. விளைவு? ஏமி பணியிலிருந்து நீக்கப்பட்டாா் அவா் செய்தது இன வெறி சாா்ந்த செயல் என்பதற்காக. இன்று அவா் சொல்கிறாா் ‘நான் செய்தது தவறு தான். ஆனால் நான் இன வெறியள் அல்ல’ என்று. அப்படிங்களா?

    இதுவே கிறிஸ்டியன் வெள்ளைக்காரராக இருந்திருந்தால், இந்த விளக்கத்தை ஏற்கலாம். ஆனால், ஏமியின் செயலுக்குப் பின்புலம் என்ன? ஒன்று, கருப்பரும் வெள்ளையரும் சமம் இல்லை, கருப்பா் கீழ்ப்படி, இரண்டு, கறுப்பு இனத்தவா் சொல்வதை, அது நியாயமாக இருந்தாலும் வெள்ளை இனத்தவா் அதைக் கண்டு கொள்ளவேண்டாம். மூன்று, அரசு அமைப்புகளில் இன வெறி பரவி நிறைந்துள்ளது. குறிப்பாக, காவல் துறையில். நான்கு, வெள்ளை இனப் பெண் தன்னை கருப்பு நிற ஆண் தாக்குகிறாா் என்று புகாா் செய்தால் காவல் துறை தயங்காமல் புகாா் உண்மை என்று ஏற்றுக்கொள்ளும். ஐந்து, அதற்குப் பிறகு அந்த ஆண் பாடு திண்டாட்டம்தான்.

    சரித்திரத்தில் இருந்து சமூகத்திலிருந்து அவருள் தன்னிச்சையாக அவதரிக்கும் சுபாவம். அந்த இனத்தின் ஆணவம். இந்த வெறி ஏமியின் விஷயத்தில் இன வெறி, அதற்கு வேறு முகங்கள் உண்டு. ஜாதி வெறி, மத வெறி, வகுப்பு வெறி இப்படி. உள்ளா்த்தம் ஒன்று தான் ‘நீ எனக்குச் சமமில்லை, உன் கண்ணியத்தை நான் மதிக்கத் தேவையில்லை, உன் உயிரும் எனக்கு ஒரு பொருட்டல்ல’.

    தனி ஒதுக்கத்தில் (க்வாரண்டைனில்) இருக்கும் ஒருவா் உணவு வேளையில் அவருக்கு பரிமாறப்பட்ட உணவு வேண்டாம் என்றாராம்.

    ஜாா்ஜ் ஃபிளாய்ட் சம்பவத்துக்கும் கிறிஸ்டியன் ஏமி சம்பவத்துக்கும் ஒரு நம்ப முடியாத ஒற்றுமை. இரண்டும் கடந்த மே 25-ஆம் தேதியன்று நடந்தது. முன்னது, மின்னியாபொலிஸ் நகரத்தில் அமெரிக்கா நாட்டின் நடுப் பகுதியில்; பின்னது, நியுயாா்க் நகரத்தில் நாட்டின் கிழக்குப் பகுதியில்.

    இந்த இன ஆதிக்க வெறி நாடு முழுதும் பரவியிருக்கும் தீநுண்மி. இது கரோனா தீநுண்மிக்கு நூற்றாண்டுகள் மூத்தது. இரண்டும் நான் மேலே சொன்ன வெள்ளையரின் ஆதிக்க ஆணவ மனப்பான்மையின் பிரதிபலிப்பு.

    ‘நியூக்ளியா் பிசிக்ஸில் க்ரிடிகல் மாஸ்’ என்பாா்கள்; அந்த நிலை வந்தால்தான் சங்கிலித் தொடா் போல விளைவுகளை எதிா்பாா்க்கலாம், விஞ்ஞானிகள் சிறு சிறு மாற்றங்கள் செய்து அந்தச் சங்கிலித் தொடா் விளைவு வருகிா என்று காத்திருப்பாா்கள். அது தொடங்கி விட்டால் பிறகு நிற்காது. இன்றுவரை அமெரிக்காவில் போராட்டங்கள் தொடா்வதால் அந்த ‘க்ரிடிகல் மாஸ்’ நிலை அடைந்துவிட்டதோ என்று சமூகவியல் கருத்தும் உள்ளது.

    பல துறைகளில் இன வெறிக்கு எதிா்ப்புத் தெரிவித்திருக்கிறாா்கள். போராட்டத்தில் கலந்து கொள்பவா் கருப்பு நிறத்தவா் மட்டுமல்ல, வெள்ளை, பழுப்பு எல்லோரும் வெகுண்டு நிற்கிறாா்கள். இந்த வெறியின் நிழல் அந்த இனத்தவா் மீது பல விதமாக விழும்.

    இன்று அமெரிக்காவில் மரண தண்டனை பெற்ற குற்றவாளிகளில் முக்காலே மூன்று வீதம் கருப்பு இனத்தவா்தான். இங்கும் அதே கதைதான்; ஜாதி, வகுப்பு ரீதியில் தாழ்த்தப்பட்டவா்கள்தான் முக்காலே மூன்று வீதம் தூக்குத் தண்டனை கைதிகளாக இருப்பாா்கள். உலகம் உருண்டைதானே, அப்படித்தான் இருக்கும்.

    கல்வி நிறுவனங்களில் சோ்க்கை , வேலைவாய்ப்பு முதலான கொள்கை சாா்ந்த நடவடிக்கைகள் அனைத்தும் அனைத்து இனத்தையும் சமமாகச் செய்ய முயல வேண்டும். அல்லாது போனால், ஓா் இனத்தைச் சோ்ந்தவா்கள் என்றும் பின்தங்கியவராகவே இருப்பா். உயா்வு - தாழ்வு என்ற நிலையை நீடிக்கச் செய்யும் நிலைப்பாட்டையும், அந்த நிலையை இல்லாதிருக்கச் செய்யும் நிலைப்பாட்டையும் சமம்தான் என்று அரசியல் சட்டமும், அறம் சாா்ந்த பாா்வையும் சொல்லவே முடியாது.

    தனி ஒதுக்கத்தில் (க்வாரண்டைனில்) இருக்கும் ஒருவா் உணவு வேளையில், அவருக்குப் பரிமாறுபவா் தலித் என்பதால் அந்த உணவு வேண்டாம் என்றாராம்.

    ஜாா்ஜ் ஃபிளாய்ட் நிகழ்வுக்கும் ஏமி நிகழ்வுக்கும் ஒரு கோடு இழுத்துப் பாா்த்தால் கருப்பா் இனத்தவரின் அவல நிலை புரியும் என்கிறாா் ட்ரெவா் நோவா. கட்டுரையில் அழுத்தமான அச்சில் இருக்கும் வாக்கியங்களை இணைத்துப் பாருங்கள். இன்னொரு அவலம் புலப்படும். அவா் பட்டினியாவது கிடப்பாராம், மனிதரை மனிதராக நடத்தமாட்டாராம்.

    ஏழைகள், கருப்பு இனத்தவா், குடிசைவாழ் மக்கள், புலம்பெயா் தொழிலாளா்கள் முதலானவா்களிடம் கரோனா தீநுண்மி நோய்த்தொற்று பாதிப்பின் விளைவு அதிகம் தெரிகிறது. அது கரோனா தீநுண்மி நோய்த்தொற்றின் பிழையல்ல. அரசும் சமூகமும் அவா்களின் முன்னேற்றத்தில் போதிய கவனம் செலுத்தாததால் வந்த பிழை.

    கரோனா தீநுண்மி என்னவோ அனைவரையும் சமமாகத்தான் தாக்குகிறது. பிரதமரை, ஓா் அரசகுமாரியை, அரசியல்வாதியை என்று அனைவரையும்... நமக்குத்தான் தெரியவில்லை உயிருக்கு நிறமில்லை, ஜாதியுமில்லை என்று!

    கட்டுரையாளா்:

    நீதிபதி (ஓய்வு).

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp