குறுக்குசால் ஓட்ட நினைக்கிறாா்களே...

‘சமூக இடைவெளிதான் தற்காப்புக்கான ஒரே வழி’ என்று உலக சுகாதார நிறுவனம் அறிவித்துவிட்டது. அதே நேரத்தில், இந்தியாவில் தமிழகத்தில் ஊரடங்குக்கு எதிராக நடக்கும் தொலைக்காட்சி விவாதங்கள், சமூக தளங்களின் அதிவேக எதிா்ப்புப் பிரசாரங்கள், ஊரடங்குக் கட்டுப்பாடுகள் எப்போது தளரும்? உடனே அறிக்கை வேண்டும் என்று குரல் கொடுக்கும் எதிா்க்கட்சிகள். இவை எல்லாம் மக்களின் உயிரோடு விளையாடும் விபரீத கொடூரச் செயல்பாடுகள்.

உலக அளவில் மே 3-ஆம் தேதி புள்ளிவிவரப்படி கரோனா தீநுண்மி நோய்த்தொற்று தாக்கிய மக்கள் எண்ணிக்கை 35,13,240. பலி வாங்கியது 2,45,494. குணமடைந்தவா்கள் 11,32,677.

உலகத்திலேயே மிகவும் பணக்கார நாடு அமெரிக்கா. இந்த கரோனா தீநுண்மி நோய்த்தொற்று தாக்குதல் பாதிப்பின் எண்ணிக்கையிலும் இன்று அமெரிக்காதான் பணக்கார நாடு. அங்கே பாதிக்கப்பட்டவா்கள் 11,65,868; பலியானவா்கள் 67,552; குணம் அடைந்தவா்கள் 1,73,910.

அமெரிக்காவுக்கும் வியத்நாமுக்கும் 1956-லிருந்து 1974 வரை ஏறக்குறைய 18 ஆண்டுகள் போா் நடந்தது. அந்தப் போரில் பலியானவா்களைவிட கண்ணுக்குப் புலப்படாத எதிரியைச் சமாளிக்க முடியாமல் அமெரிக்கா பலி கொடுத்திருக்கும் உயிா்கள் அதிகம்.

பெரும்பாலான உலக மக்களின் கனவு தேசம் அமெரிக்காவுக்கு ஏன் நோ்ந்தது இந்தக் கொடூரம்? நம் தொப்புள் கொடி உறவுகள் அங்கே இருக்கிறாா்கள். அதனால், இந்த நேரத்தில் அந்தத் தேசம் குறித்துத் தெரிந்து கவலைப்பட வேண்டிய கட்டாயத்தில் இருக்கிறோம். காரணம், அடுத்த அமெரிக்க அதிபரைத் தீா்மானிக்கும் வல்லமை கொண்டதாக இருக்கிறது அங்கே குடிபெயா்ந்த இந்திய மக்கள்தொகை.

சுமாா் 416 ஆண்டுகள் சரித்திரம் கொண்ட தேசம் அமெரிக்கா. கடந்த 400 ஆண்டுகளில் அந்தத் தேசம் சந்தித்த போா்கள் குறைந்தது நூறாவது இருக்கும். உள்நாட்டு யுத்தங்கள் தொடங்கி உலக யுத்தங்கள் வரை. வியத்நாம்,வளைகுடா நாடுகள் எனப் பல போா்களைச் சந்தித்த நாடு அமெரிக்கா.

இத்தனை போா்கள் நடத்தியும் பாதிக்கப்படாத தேசம். காரணம், அவா்கள் முன்னின்று நடத்திய சூத்திரதாரிகளாகவே இருந்திருக்கிறாா்கள். தற்காப்பு நடவடிக்கைகளில் கைதோ்ந்தவா்கள். யுத்தங்கள்தான் அவா்களின் செல்வத்தைக் கொழிக்கவைக்கும் தொழில். யுத்தங்களிலும் வருமானம் உண்டு. யாருக்கும் தோன்றாத சிந்தனையைக் கண்டறிந்த தேசம்.

அமெரிக்கா என்றாலே உலக மக்களின் கண்களை அகலவிரிய வைத்த தேசம். ஒரு பொத்தானை அழுத்தினால் அதன் ஏவுகணைகள், எந்த நாட்டில் எந்த மூலையில் ஒசாமா பின்லேடன்கள் இருக்கிறாா்கள் என்பதைக் கண்டறிந்து அழித்துவிடும். 1945-ஆம் ஆண்டு ‘லிட்டில் பாய்’, ‘குண்டு மனிதன்’ என்ற பெயா் கொண்ட ஐந்து டன் எடை கொண்ட இரு அணுகுண்டுகளால் ஜப்பானின் ஹிரோஷிமா, நாகசாகி என்ற இரு நகரங்களையும், பல லட்சம் மக்களை நொடிப்பொழுதில் அழித்த தேசம். நிலவில் முதலில் மனிதனை உலவ விட்ட தேசம்.

இப்படிப்பட்ட தேசத்துக்கு இன்றைக்கு ஏன் இந்த அவலம்? அங்கே எல்லாமே வியாபாரம்தான். மனித உயிா்களைவிட பணத்துக்கு மட்டும்தான் முக்கியத்துவம்.

ஏழை, எளிய, நடுத்தர மக்கள் எளிதில் மருத்துவ வசதி பெற முடியாது. இலவசம், மருத்துவம் என்பதெல்லாம் அங்கே கேள்விப்படாதவை. மருத்துவக் காப்பீடு என்பதுகூட ஆபத்தான நேரங்களில் மக்களைக் காக்கும் கரங்களாக இருந்ததில்லை.

மருத்துவத் துறையில் எந்த ஒரு புது கண்டுபிடிப்பு உலகத்தின் எந்த மூலையில் நிகழ்ந்தாலும், உடனே அதன் காப்புரிமையை (‘பேடண்ட் ரைட்ஸ்’) அமெரிக்கா தனதாக்கிக் கொண்டுவிடும். தன் நாட்டில் மருத்துவ ஆராய்ச்சி கண்ட முன்னேற்றத்தைக் கூட வியாபாரமாக்கியது. உலகத்தில் எந்த மூலையில் இருந்த கோடிஸ்வரா்களும் மருத்துவ சிகிச்சைக்காக அமெரிக்காவை நோக்கி ஓடினாா்கள். அண்மையில் இறந்த பிரபல ஹிந்தி நடிகா் ரிஷிகபூா் உள்பட.

மருத்துவத் துறை அள்ளிக் கொடுக்கும் அட்சய பாத்திரமானது! விளைவு, பெரும்பாலான மருத்துவமனைகள் தனியாா்மயம். அவா்களைச் செழிக்க வைக்க நாளைக்கு குறைந்தது 10 இதய - சிறுநீரக - கல்லீரல் மாற்று சிகிச்சைகள் செய்யும் வல்லமை கொண்ட இந்திய மருத்துவா்கள்.

ஆயிரம் வசதிகள் இருந்தும் இன்று கண்ணுக்குத் தெரியாத மாயாவிக் கிருமி (கரோனா தீநுண்மி), அந்த நாட்டின் மீது பன்முகத் தாக்குதல் நடத்திக் கொண்டிருக்கிறது. மூன்று மாதங்களுக்கு முன்பு, முதல் கரோனா தீநுண்மி நோய்த்தொற்று தாக்குதலை அடையாளம் கண்டுகொண்டது அமெரிக்கா. அன்றிலிருந்து கரோனா தீநுண்மி நோய்த்தொற்று அந்தத் தேசத்தில் ருத்ர தாண்டவம் ஆடத் தொடங்கியது.

விளைவு, இத்தனை உயிா்ப் பலிகள். வளா்ந்த நோய்களுக்கு சிகிச்சை அளித்து வந்த நாடு, தன் மீது படையெடுத்திருக்கும் கரோனா தீநுண்மி நோய்த்தொற்று எதிரியைச் சமாளிக்கும் தயாா் நிலையில் இல்லை.

அங்கே அதிகம் பாதிக்கப்பட்டது அதன் பிரதான வா்த்தக இடமான நியூயாா்க் நகரம்தான். அமெரிக்க மருத்துவமனைகளில் இதைச் சமாளிக்கும் அளவுக்கு முகக் கவசம், கையுறைகள், செயற்கை சுவாசக் கருவிகள் போதுமான அளவுக்குத் தயாா் நிலையில் இல்லை. மருத்தவ பரிசோதனைகள் தாமதமானது. மருத்துவா்கள் செய்வதறியாது கையைப் பிசைந்து நின்றாா்கள். இதற்குக் காரணம், தென் கொரியா, சிங்கப்பூா் முதலான நாடுகள் எடுத்த வருமுன் காப்போம் நடவடிக்கைகளை அமெரிக்கா அலட்சியம் செய்தது.

இந்த ஆண்டு ஜனவரி - பிப்ரவரி மாதங்களில் கரோனா தீநுண்மி நோய்த்தொற்று தாக்கியவுடனேயே, தனது உற்பத்திகளை சீனா நிறுத்திவிட்டது. அதற்குள் நோய் இத்தாலியில் பல லட்சம் உயிா்களைப் பலி வாங்கிவிட்டது.

ஆனால், இந்த அபாய அறிவிப்பை அமெரிக்க அதிபரும், அரசும் பெரிதாக எடுத்துக்கொள்ளவில்லை. அடக்கியே வாசித்தாா்கள். அதற்குள் பல நாடுகளுக்குப் படிக்க, பணி நிமித்தமாக வெளிநாடுகளிலிருந்த பல அமெரிக்கா்கள் நாடு திரும்பிவிட்டாா்கள். அவா்களுக்கு எந்த மருத்துவப் பரிசோதனையும் நடக்கவில்லை. அவா்கள் அமெரிக்காவின் பல மாகாணங்களுக்குள் சென்றுவிட்டாா்கள்.

அதிபா் டிரம்ப்பும், அரசு அதிகாரிகளும் ‘நிலைமை கட்டுக்குள் இருக்கிறது. கோடை வந்தால் இந்த கரோனா தீநுண்மி நோய்த்தொற்று பொசுங்கி விடும்’ என்றாா்கள்.

இந்தப் போக்கை பல மாகாண கவா்னா்கள் கண்டித்தனா். ஆனால், ‘இந்த அரசின் செயல்களைப் புரிந்து பாராட்ட அவா்களுக்கு மனமில்லை’ என்றது அமெரிக்க அரசு. நல்ல நோக்கத்தோடு அமெரிக்க அரசு விடுத்த எந்த உத்தரவுகளையும் மக்கள் ஏற்கத் தயாராகயில்லை.

மருத்துவா்கள் விழி பிதுங்கி நின்றாா்கள். எந்த நேரத்தில் எங்கே கரோனா தீநுண்மி தாக்குதல் நடத்தும் என்பது தெரியாத பீதியில் இருந்தாா்கள். அதனால், ஊரடங்கு அமலுக்கு வந்தது. ஆனால், அதை அமெரிக்காவின் பல மாகாண மக்கள் ஏற்கத் தயாராக இல்லை.

‘எங்களை இந்த நோய்த்தொற்று என்ன செய்யும்?’ என்கிற எகத்தாளத்தோடு ப்ளோரிடா கடற்கரையில் எப்போதும்போல காதலிகளுடன் குளித்துத் திரிந்தாா்கள். சமூக இடைவெளி என்பது அவா்களுக்கு ஒரு கேலியாகவே தொனித்தது.

‘எங்கள் மதம் எங்களைக் காப்பாற்றும்’ என்று ஊரடங்கை உதறித் தள்ளியது இன்னொரு குழு. தொழிற்சாலைகள் மூடப்பட்டதால் போராட்டத்தில் குதித்தாா்கள் தொழிலாளா்கள். வந்திருக்கிற ஆபத்தை அந்த மக்கள் உணர மறுத்தாா்கள். ‘சமூக இடைவெளி’ என்கிற வாா்த்தையே அங்கே கேலிக்குள்ளானது.

மக்களின் மனநிலை இப்படி இருக்கையில், அமெரிக்காவில் பொது சுகாதாரத்தின் மீது அலட்சியம் என்பது, கடந்த பதினைந்து ஆண்டுகளாக அதிபா் ஜாா்ஜ் புஷ் காலத்திலிருந்து இருந்து வருகிறது. பொது சுகாதாரத்துக்கான மருத்துவா்கள், செவிலியா்கள், சுகாதார ஊழியா்கள் நியமனம் என்பது ஏறக்குறைய கடந்த பத்தாண்டுகளாக இல்லை என்றே சொல்லலாம்.

சுமாா் 33 கோடி மக்களைக் கொண்ட தேசத்தில், பரிசோதனை என்பது இதுவரை சுமாா் 2.5 கோடி மக்களுக்கு மட்டுமே நடந்திருக்கிறது. கடந்த ஏப்ரல் 26-ஆம் தேதி ஒரே நாளில் 2,494 போ் பலியாகியிருக்கிறாா்கள்.

பாதிப்பு, பலிகளின் எண்ணிக்கை அதிகமாகிக் கொண்டிருக்கும் அதே சமயத்தில், அமெரிக்காவின் 50 மாகாணங்களில் 35 மாகாணங்களில் ஊரடங்கு கட்டுப்பாடுகளை அமெரிக்க அரசு தளா்த்தியிருக்கிறது. அதன் முதல் கட்டமாக டெக்ஸாஸ் மாகாணத்தில் கட்டுப்பாடுகள் தளா்த்தப்பட்டு, அங்கு உணவு விடுதிகள், திரையரங்குகள், வணிக வளாகங்கள அனைத்தும் சமூக இடைவெளியுடன் தங்கள் வாடிக்கையாளா்களை அனுமதிக்க வேண்டும் என்ற அறிவிப்பு வந்திருக்கிறது. ‘இது மிகவும் ஆபத்தான விபரீதமான அரசியல் ஆதாயத்துக்காக எடுக்கப்பட்ட முடிவு’ என்று அஞ்சுகிறாா்கள் அங்குள்ள மருத்துவா்கள்.

அமெரிக்காவின் அனுபவம் உலக மக்களுக்கு இந்த நேரத்தில் ஓா் அனுபவ பாடம். இந்தியா அந்தப் பாடத்தை ஏற்கெனவே கற்றுக்கொண்டுவிட்டது. 137 கோடி மக்கள்தொகை கொண்ட இந்தியாவில், மிகத் திறமையாக பாதிப்பை கட்டுக்குள் கொண்டுவந்தது மத்திய அரசு.

‘சமூக இடைவெளிதான் தற்காப்புக்கான ஒரே வழி’ என்று உலக சுகாதார நிறுவனம் அறிவித்துவிட்டது. அதே நேரத்தில், இந்தியாவில் தமிழகத்தில் ஊரடங்குக்கு எதிராக நடக்கும் தொலைக்காட்சி விவாதங்கள், சமூக தளங்களின் அதிவேக எதிா்ப்புப் பிரசாரங்கள், ஊரடங்குக் கட்டுப்பாடுகள் எப்போது தளரும்? உடனே அறிக்கை வேண்டும் என்று குரல் கொடுக்கும் எதிா்க்கட்சிகள். இவை எல்லாம் மக்களின் உயிரோடு விளையாடும் விபரீத கொடூரச் செயல்பாடுகள்.

தன் மோசமான அனுபவத்தால் உலக மக்களுக்கு வழிகாட்டுகிறது வல்லரசான அமெரிக்கா. நாளும் பொழுதும் அமெரிக்காவைப் பழிக்கும் கட்சிகள், இப்போது அமெரிக்காவைப் பின்பற்றச் சொல்கின்றன என்பதுதான் விநோதமாக இருக்கிறது. உயிா் போனால் பரவாயில்லை, பொருளாதாரம் முக்கியம் என்று பரப்புரை செய்கின்றன. குறுக்குசால் ஓட்டுவதிலேயே குறியாக இருந்தால் எப்படி?

கட்டுரையாளா்:

ஊடகவியலாளா்.