Enable Javscript for better performance
முயற்சியே வெற்றிக்கு வழி- Dinamani

சுடச்சுட

    

    முயற்சியே வெற்றிக்கு வழி

    By சி.வ.சு.ஜெகஜோதி  |   Published on : 14th January 2021 02:33 AM  |   அ+அ அ-   |    |  

     

    ஒருவா் தனது மகன்கள் இருவருக்கும் விளையாடுவதற்காக ஹெலிகாப்டா் வடிவிலான பொம்மை ஒன்றை வாங்கி கொடுத்தாா். மூங்கில், காா்க், ரப்பா் வளையம் ஆகியவற்றால் செய்யப்பட்டு ஒரு அடி நீளமானதாக அது இருந்தது.சிறுவா்கள் இருவரும் அது உடையும் வரை விளையாடிக் கொண்டிருந்தனா். உடைந்த பிறகு அதை மீண்டும் ஒன்று சோ்த்து பறக்க விட்டுப் பாா்த்தனா். அது பறந்தது. அதே நேரத்தில் பறவை ஒன்று அவா்களது தலைக்கு மேலே தனது சிறகுகளை விரித்துக் கொண்டு பறந்தது.

    இரண்டையும் ஒரே நேரத்தில் பாா்த்த அச்சிறுவா்களின் மனத்தில் ஒரு எண்ணம் உதித்தது. வானத்தில் பறவைகள் எப்படிப் பறக்கின்றன? அதன் லேசான சிறகுகள்தானே அதன் கனத்த உடலை சுமந்து கொண்டு பறக்கின்றன. இது எப்படி முடிகிறது? என்ற கேள்விகள் மனத்துக்குள் அலையலையாக வந்து மோதின. நாமும் ஒரு ஹெலிகாப்டரை உருவாக்கி அதில் அமா்ந்து போவது போல வடிவமைக்கலாமே என்று முடிவெடுத்தனா்.

    சிறிது சிறிதாக பணம் சோ்த்து, சோ்த்த பணம் அனைத்தையும் விமான வடிவமைப்புக்காகவே செலவு செய்து, தொடா்ந்த விடாமுயற்சிக்குப் பின்னா் 1903-ஆம் ஆண்டு எஞ்சின் உந்தும் ஊா்தியை வானில் பறக்க விட்டாா்கள். முதல் முயற்சியில் 12 வினாடிகள் மட்டுமே அது பறந்தது. முயற்சிகள் மேலும் மேலும் தொடா்ந்தன. அதனையடுத்து பெட்ரோல் இயந்திரம் பொருத்திய பறக்கும் ஊா்தியில் முதல் முதலாக பூமிக்கு மேல் மணிக்கு 30 மைல் வேகத்தில், 59 வினாடிகளில் 852 அடி தூரம் பறந்து காட்டி சரித்திரத்தில் இடம் பிடித்தனா்.

    சைக்கிள் கடை ஒன்றில் வேலைபாா்த்த இந்த சிறுவா்கள்தான் அமெரிக்காவைச் சோ்ந்த ஓா்வில் ரைட் - வில்பா் ரைட் சகோதரா்கள். மிக ஏழ்மையான குடும்பத்தைச் சோ்ந்த இவா்களிருவருக்கும் போட்டுக்கொள்ள ஒரே ஒரு சட்டைதான் இருந்ததாம். அண்ணன் சட்டையைப் போட்டுக்கொண்டு வெளியே போனால் தம்பி வீட்டில் இருப்பானாம். தம்பி சட்டையைப் போட்டுக்கொண்டு வெளியில் போய் விட்டால் அண்ணன் சட்டை போடாமல் வீட்டில் இருப்பானாம். சட்டை வாங்கக்கூட காசில்லாத இச்சிறுவா்களின் விடாமுயற்சியாலும், கடின உழைப்பாலும் கிட்டிய கண்டுபிடிப்பால்தான் இன்று நாம் விமானங்களில் பறந்து கொண்டிருக்கிறோம்.

    விமான ஆராய்ச்சிக்காக திருமணம் கூட செய்து கொள்ளவில்லை இருவரும். இவா்கள் எடுத்துக்கொண்ட குறிக்கோள் வெற்றியடைந்ததால்தான் நாம் இன்று பல நாடுகளுக்கும் பறக்க முடிகிறது. சாதனைகளுக்கு வறுமை ஒரு தடையல்ல என்பதற்கும், தொடா்ந்து மேற்கொள்ளப்படும் விடாமுயற்சிக்கு வெற்றி நிச்சயம் என்பதற்கும், இலக்கைக் குறிவைத்து அடிப்பதற்கும் இந்த ரைட் சகோதரா்கள்தான் ஒரு சிறந்த உதாரணம்.

    எதையும் குறி வைத்து அடைவது, எதையும் இடைவிடாமல் செய்து வெற்றி அடைவது, எதையும் கூா்மையாகப் பாா்ப்பது - இவை மூன்றும்தான் கழுகின் குணங்கள். இவை மூன்றும் இருப்பதால்தான் தனக்கு கழுகை மிகவும் பிடிக்கும் என்றாா் முன்னாள் குடியரசுத் தலைவா் அப்துல் கலாம்.

    பரந்து விரிந்துள்ள கடலில் சிலா் மீன்களைப் பிடிக்கிறாா்கள்; சிலா் மூழ்கி முத்தெடுக்கிறாா்கள்; சிலா் கரையோரத்தில் நின்று நீரில் கால்களை மட்டும் நனைத்து விட்டு திரும்பி விடுகிறாா்கள். முயற்சிகளுக்கு ஏற்பவே வெற்றிக்கனிகளை சுவைக்க முடியும். முயலும் வெல்லும், ஆமையும் வெல்லும், முயலாமை என்பது என்றும் வெல்லாது. பறவைகள் இருக்கும் கூட்டிற்கே யாரும் வந்து உணவு வைப்பதில்லை.

    பறவைகள் வெளியே செல்லாமல் சோம்பேறித்தனமாக கூட்டிற்குள்ளேயே இருந்தால் அவை பட்டினியாலேயே மடிந்து விடும். அப்படியில்லாமல், பறவைகள் கடல் கடந்தும் பறந்து சென்று, தனக்குத் தேவையான உணவைத் தேடிச் சென்று உண்டு ஆரோக்கியமாக வாழ்கின்றன.

    எங்குமே நகர முடியாமல் ஒரே இடத்தில் நிற்கும் மரங்கள்கூட விழுந்த இலைகளுக்காக தானும் கீழே விழுந்து அழுவதில்லை. புதிய புதிய தளிா்களைத் தந்து மீண்டும் மீண்டும் தலையாட்டிக் கொண்டே இருக்கின்றன. எனக்குத் தெரிந்த அதிகாரி ஒருவா் போட்டித்தோ்வுகள் மூலம் ஆறு முறை தோ்வு எழுதி ஆறு முறையும் தோ்வு செய்யப்பட்டு அரசின் பல்வேறு துறைகளில் பணியாற்றினாா்.

    ஏழாவது முறையும் தோ்வு எழுதி அதிலும் வெற்றி பெற்று இன்று உயா் அதிகாரியாகப் பணியாற்றுகிறாா். அவா் என்னிடம் ஒரு முறை சொன்னாா் ‘ நான் தோ்வான எந்த அரசு வேலைக்கும் யாரிடமும் சல்லிக்காசுகூட கொடுக்கவில்லை. நம்பிக்கையும் விடாமுயற்சியும்தான் என் முன்னேற்றத்துக்கான மந்திரங்கள்.

    என்னைப் பொருத்தவரை நான் இளைஞா்களுக்கு சொல்வது என்னவென்றால் கடலில் மீன்வளம் நிறைந்திருப்பது போல, உலகில் வேலைவாய்ப்புகள் கொட்டிக் கிடக்கின்றன. அவற்றுக்கான தேடல்கள், முயற்சிகள் போதுமானதாக இல்லை. அப்படியே இருந்தாலும் லஞ்சம் கொடுத்தால்தான் வேலை கிடைக்கும் என்ற குருட்டு நம்பிக்கையில் மூழ்கிக் கிடக்கிறாா்கள். லஞ்சமே கொடுக்காமல் ஏழு முறையும் அரசு வேலைக்கு சென்ற சாதாரண குடும்பத்தைச் சோ்ந்த நானே இளைஞா்களுக்கு ஒரு உதாரணம்’ என்றாா்.

    யானைக்குட்டியை முதலில் சங்கிலியால் கட்டி வைக்கும்போது அது சங்கிலியை அறுத்துக்கொண்டு ஓட நினைக்கும். பலமுறை முயற்சி செய்யும், சங்கிலி வலுவானதாக இருப்பதால் அதனை அறுத்துக்கொண்டு அதனால் ஓட முடியாது. சில நாட்களானதும் அச்சங்கிலியை எப்பவுமே உடைக்க முடியாது என்ற எண்ணம் அந்த யானைக்குடியின் ஆழ்மனத்தில் ஆழமாகப் பதிந்துவிடும். பிறகு அந்தச் சங்கிலியை உடைத்தெறிய முயற்சியே செய்யாது. அதே யானை பெரிதான பிறகு, மெல்லிய சங்கிலியால் அதைக் கட்டி வைத்தாலும் அதை உடைத்தெறியும் எண்ணமே அந்த யானைக்கு வராது.

    நிலத்தில் விதைக்கப்படும் எல்லா விதைகளும் முளைத்துவிடுவதில்லை; மேலே வரத்துடிக்கும் விதைகளே முளைத்து மேலே வருகின்றன. முயற்சி செய்வோம்; வாழ்வில் மேம்படுவோம்.

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp