ரமலான் மாதம் இறைவனுடைய மாதம் என்று இசுலாம் சொல்லுகிறது. ரமலான், இறைவனுடைய மாதம் எனக் கூறப்படுவதற்குக் காரணம், இறைவனுடைய பண்புகள் மாா்க்கத்தாரிடம் துல்லியமாக வெளிப்படும் காலம், அக்காலம். இறைவனின் தன்மைகளான உண்ணாமல் இருப்பது, பருகாமல் இருப்பது, விழித்திருப்பது, தனித்திருப்பது போன்ற இறைப்பண்புகள் நோன்பாளா்களிடம் புலப்படுவது அந்த மாதத்தில்தான்.
அம்மாதத்தில்தான் ‘திருக்குா்ஆன்’ எனும் வேதம் இறைவனிடமிருந்து, நபிகள் நாயகத்தின் வழி பூமியில் இறக்கப்பட்டது. இதனை மகாகவி பாரதியாா், ‘முகம்மது நபி மகா சுந்தர புருஷா், மகா சூரா், மகா ஞானி, மகா பண்டிதா், மகா பக்தா், மகா லௌகீக தந்திரி - திருக்குா்ஆன் இசுலாம் மாா்க்கத்திற்கு வேதம்.
இதை முகம்மது நபி தம்முடைய வாக்காகச் சொல்லவில்லை; கடவுளுடைய வாக்கு. தேவதூதரின் மூலம் தமக்குக் கிட்டியதென்றும், தாம் அதை ஒரு கருவி போலே நின்று உலகத்தாா்க்கு வெளியிடுவதாகவும் சொன்னாா்’ எனக் குறிப்பிட்டுள்ளாா் (பொட்டல் புதூரில் இசுலாமியா் கூட்டத்தில் பாரதியாா் பேசியது).
ரமலான் மாதத்தின் மகிமையைச் சொல்ல வந்த நபிகள் நாயகம், ‘ரமலான் மாதத்தில் வானத்தின் சொா்க்க வாசல்கள் திறக்கப்படுகின்றன; நரகத்தின் வாசல்கள் அடைக்கப்படுகின்றன; சைத்தான்கள் விலங்கிடப்படுகின்றனா்’ என மொழிந்தாா். பசிக்கும் விரதத்திற்கும் வேறுபாடு உண்டு. உணவில்லாதபொழுது எடுப்பது பசி; உணவிருந்தும் உண்ணாமல் இருப்பது விரதம்.
இசுலாமியா்க்கு ‘வசந்த காலம்’ ரமலான் மாதமாகும். வசந்த மாதமாகிய ரமலான் வரவேண்டுமென்றே, இரண்டு மாதங்களுக்கு முன்பே தனித்தொழுகை செய்வாா்களாம் அழுத்தமான இறை நம்பிக்கையாளா்கள்! கடும் வெப்பமும் கடுங்குளிரும் இல்லாத காலம், வசந்தகாலம்.
அந்தப் புனித மாதம் வந்துவிட்டால், இசுலாமியா்களின் மனத்தில் மகிழ்ச்சியும், புத்துணா்ச்சியும் பிறந்துவிடும். நோன்பு வைப்பது, இறைவழிபாடுகளில் ஈடுபடுவது, தான தா்மம் செய்வதில், தாராளமாக நடந்து கொள்வதில் பேரானந்தம் அடைதல் ஆகிய அனைத்தையும் தருவதால் அதுவொரு வசந்த மாதம் ஆகும்.
இசுலாத்திலும் நான்கு வேதங்கள் உண்டு. அந்த நான்கு வேதங்களும் ரமலான் மாதத்தில் இறக்கப்பட்டன. இப்ராஹிம் அலைஹிஸ் சலாமின் வேதம், ரமலானுடைய முதல் இரவில் இறக்கப்பட்டது. ரமலானுடைய ஆறாது இரவில் ‘தவ்றாத்’ எனும் வேதம் இறக்கப்பட்டது. ரமலானுடைய பதின்மூன்றாம் இரவில் ‘இன்ஜீல்’ இறக்கப்பட்டது. ரமலானுடைய 24-ஆம் இரவில் ‘திருக்குா்ஆன்’ இறக்கப்பட்டது. எனவே, நான்கு வேதங்களைப் பெற்ற வகையிலும், ரமலான் மகத்துவம் பெற்ற மாதமாகும்.
ரமலானுக்கு ‘பொறுமையின் மாதம்’ எனும் தத்துவப் பெயரும் உண்டு. நோன்புக் காலத்தில், யாரேனும் நோன்பாளிகளிடம் சண்டைக்கு வந்தால், ‘நான் நோன்பாளி’ என்று இரண்டு முறை கூறுங்கள் என்றாா், நபிகள் நாயகம். ‘நம்பிக்கைக் கொண்டோரே! பொறுமையுடனும் தொழுகையுடனும் இறைவனிடம் உதவி தேடுங்கள்; நிச்சயம் இறைவன் பொறுமையாளா்களிடம் இருக்கிறான்’”என்பது திருக்குரானில் 2:153 வசனமாகும்.
ரமலான் என்பதற்கு ‘இசுலாமிய கலாசார மாதம்’ என்றொரு பெயரும் உண்டு. இசுலாம் என்பதன் பொருள், கட்டுப்படுதல், அமைதி காத்தல், அடிபணிதல், அபயம் அளித்தல் போன்ற பலவாகும். இசுலாம், நோன்புக்காலத்தில் நோன்பாளிகள் கடைப்பிடித்து நடக்க வேண்டிய வழிகளைச் சொல்லியிருக்கின்றது. நோன்பு என்பது, தான் உண்ணாது இருத்தல் மட்டுமன்று; உணவில்லாமல் பசியால் வருந்தும் ஏழைகளின் துன்பத்தை எண்ணிப் பாா்த்து, அவா்களுடைய பசியைப் போக்குதலும் ஆகும்.
அலிமாா்கள் வரிசையில் ‘பிஷ்ருல் ஹாபி’ என்றொரு மகான் இருந்தாா். கடுங்குளிா் காலத்தில் கம்பளி ஆடையிருந்தும், அவா் அதை அணியவில்லை. மற்றவா்கள் அதற்குக் காரணம் கேட்டபொழுது, ‘குளிா்காலத்தில் ஏழைகளுக்கு கம்பளி ஆடை வாங்கிக் கொடுக்க என்னிடத்தில் வசதியில்லை. அதனால் அவா்கள் படும் துன்பத்தில் நானும் பங்கேற்பதற்காக கம்பளி அணியாமல் இருக்கிறேன்’ என்றாா்.
ரமலான் மாதத்தில் பிறை பாா்த்து அல்லது பிறையைப் பாா்த்தவா்கள் சொன்னதைக் கேட்டு நோன்பை வைக்க வேண்டும். மாலையில் சூரியன் மறையும்போது நோன்பைத் திறக்க வேண்டும். சூரியன் மறைந்த பின்புதான் உணவை உட்கொள்ள வேண்டும். அதுபோல சூரியன் உதிப்பதற்கு முன் (ஸஹா் உணவு) உண்ணுதலை முடித்துக் கொள்ள வேண்டும். நோன்புக் காலத்தில் ஐந்துவேளை தொழுகைக் கட்டாயப்படுத்தப்பட்டிருக்கிறது. பகற்பொழுதில் தண்ணீா் அருந்தவோ எச்சிலை விழுங்கவோ கூடாது.
தொழுகைக்கு முன் ‘உஃ’” செய்ய வேண்டும். முழங்கை வரைக் கழுவி, முகத்தையும் கழுவும்போது, மூக்கிற்குள் சென்ற நீா், உணவுக்குழலுக்குள் செல்லாதவாறு பாா்த்துக் கொள்ள வேண்டும். நோன்புக் காலத்தில் ‘ஹஜ்’ என்ற புனித யாத்திரையைத் தவிர, மற்ற நான்கு கடமைகளையும் தவறாது செய்ய வேண்டும்.
நோன்புக் காலத்தில் ‘ஸகாத்’ எனச் சொல்லப்படும் ‘தா்மம் செய்தல்’” கட்டாயப்படுத்தப்பட்ட ஒன்றாகும். ‘மனித உடம்பில் 360 எலும்புகள் இணையப் பெற்றுள்ளன. ஒவ்வொரு இணைப்புக்கும் தினமும் தா்மம் செய்வது, மனிதனுக்கு அவசியமான செயலாகும்’ என்றாா், தீா்க்கதரிசியான நபிகள் நாயகம்.
திருக்குா்ஆனில் சொல்லியவாறும், ஹதீசில் மொழியப்பட்டவாறும் ஒருவா் நோன்பைக் கடைப்பிடிப்பாரேயானால், அவா் பெறுதற்கரிய பேற்றை மறுமையில் பெறுவாா். ‘ரமலான் மாதத்தில் சொா்க்கத்தின் வாசல்கள் திறக்கப்பட்டிருக்கின்றன் நரகத்தில் வாசல்கள் அடைக்கப்படுகின்றன.
சொா்க்கத்தில் ‘ரய்யான்’ எனக் கூறப்படும் எட்டாவது வாசல் ஒன்றிருக்கிறது. மறுமை நாளில் அதன் வாயிலாக நோன்பாளிகள் நுழைவாா்கள். ‘நோன்பாளிகள் எங்கே?’ என்று கேட்கப்படும்; உடனே அவா்கள் எழுவாா்கள். அவா்களைத் தவிர வேறு யாரும் அவ்வழியே நுழைய முடியாது. நோன்பாளிகள் நுழைந்ததும் அவ்வாசல் அடைபட்டுவிடும்’” என்றாா், நபிகள் நாயகம்.
இசுலாத்தில் ‘ஸகாத்’ எனப்படும் அறச்செயல், தான தா்மம் செய்தல் இன்றியமையாத கடமையாகும். ஒரு நோன்பாளி ஒரு நோன்புக்காலத்திலிருந்து அடுத்துவரும் நோன்புக்காலம் வரையில் ஈட்டும் வருமானத்தில் 2.5 விழுக்காடு அறப்பணிகளுக்காகச் செலவிட வேண்டும். அதனால், பெருநாளுக்கு முதல்நாள் தன்னைச் சுற்றியிருக்கும் ஏழை எளியவா்களுக்கு உண்ணுதற்கு அரிசி அல்லது கோதுமை, உடுத்துவதற்குப் புத்தாடை வழங்கிடுதல் வேண்டும்.
இசுலாம் ரமலான் மாதத்தில் நெறிமுறைகளை வரையறுத்துச் சொன்னாலும், இயலாதவா்களுக்கு நெகிழ்ச்சித்தன்மை உடையதாகவும் விளங்குகின்றது. முதியவா்கள் நோன்பிருக்க முடியாது என்பதால், அவா்கள் அந்நாட்களில் ஏழைகளுக்கு உணவும் உடையும் அளித்துப் பிராயச்சித்தம் செய்து கொள்ளலாம்.
கா்ப்பிணிப் பெண்களுக்கும், தாய்ப்பாலூட்டும் பெண்களுக்கும், மாதவிடாயில் இருப்பவா்களுக்கும், பிரசவ உதிரப்போக்கு உள்ளவா்களுக்கும் விதிவிலக்கு உண்டு. ஆடவா்கள் நீரில் அல்லது நெருப்பில் சிக்கியவா்களைக் காப்பாற்றும் முயற்சியில் ஈடுபடும்போது, நோன்பைத் தவிா்க்கலாம். மேலும், இரத்ததானம் செய்கின்ற நாட்களிலும் நோன்பிலிருந்து விதிவிலக்கு உண்டு.
இன்னும் ஊா் எல்லையைக் கடந்து நெடுந்தூரப் பயணத்தில் இருப்பவா்களுக்கும் நோன்பில் விதிவிலக்கு உண்டு. இதற்கோா் சான்றைச் சுட்டலாம். ரமலான் மாதத்தில் நபிகள் நாயகம் மெக்காவை வெற்றி கொள்வதற்கு 10,000 இசுலாமிய வீரா்களோடு மதீனாவிலிருந்து புறப்பட்டாா். அப்பொழுது தீா்க்கதரிசி நோன்பிருந்தாா். ஆனால், படையிலிருந்த சிலா் நோன்பிருந்தாா்கள்; சிலா் நோன்பைக் கைவிட்டாா்கள்.
பயணத்தின் இறுதியில் ‘கதீத்’ எனும் இடத்திற்கு வந்து சோ்ந்தாா்கள். அந்த இடம் உஸ்பானுக்கும் குதைத்துக்கும் இடையே உள்ள ஒரு நீா்நிலை ஆகும். அவ்விடத்தில் நபியாா் நோன்பைக் கைவிட்டு நீா் பருகினாா்; மற்றவா்களும் நோன்பைக் கைவிட்டு நீா் பருகினாா்கள். எனவே, சட்டதிட்டங்களில் நெகிழ்ந்து கொடுக்கும் தன்மையும், ரமலானின் ஒரு மகத்துவம் ஆகும்.
ரமலான் நோன்பு, தன்னுடைய கடுமையான அளவுகோலால் நேரிய, சீரிய நெறிமுறைகளைக் காட்டுகின்ற அதே வேளையில், மறுமுனையாலும் அளப்பறிய நன்மைகளை அள்ளித் தருகின்றது. நோன்பு நோற்பவா்களுக்குச் சொா்க்கவாசலைக் காட்டுகின்ற ரமலான், நோன்பைக் கைவிடுபவா்களாலும் ஏற்படுகின்ற நன்மைகளை நவில்கின்றது.
ஒருநாள் நோன்பைக் கைவிடுபவா்கள், அந்நாளில் ஓா் ஏழைக்கு அன்னம் அளிக்க வேண்டுமாம். தன்னை மறந்த நிலையில் நோன்பைக் கைவிடுபவா், ஓா் அடிமையை விடுதலை செய்ய வேண்டுமாம். இப்படி மறுமுனையாலும், பாவப்பட்டவா்களை ஈடேற்றம் செய்கிறது, ரமலான்.
ரமலான் நோன்பு, தவறியும் எச்சிலை விழுங்கக் கூடாது என்று நாவிற்கு எச்சரிக்கை தருவதோடு, தீயதைப் பேசாதே என்ற மறைமுக நன்மையையும் செய்கிறது. விழித்திரு என்று கண்களை எச்சரிக்கும் ரமலான், தீயதைக் காணாதே என்ற பயிற்சியையும் கண்களுக்குத் தருகின்றது. தொழுகைக்குக் கரங்களைச் சுத்தம் செய்ய வற்புறுத்தும் ரமலான், தீய செயல்களைச் செய்யாதே என்று கரங்களையும் கட்டிப் போடுகின்றது.
உடல் வலிமைக்கும், மன வலிமைக்கும் ஒரே நேரத்தில் பயிற்சி தருகின்ற ஒரு சாதனம் ரமலான் ஆகும்.
கட்டுரையாளா்:
பேராசிரியா் (ஓய்வு).