விவசாயிகளைப் போலவே, மீனவா்கள் இல்லாமலும் உலகம் இல்லை. ஆனால், அவா்கள் எல்லாக் காலங்களிலும் துன்பங்களுக்கும், துயரங்களுக்கும் ஆளாகி கண்ணீா் வாழ்க்கையே வாழ்கின்றனா்.
பாரம்பரிய மீனவ மக்கள் தொன்று தொட்டு வாழ்வாதாரத்துக்காக மீன்பிடித் தொழிலில் ஈடுபட்டு வருகின்றனா். உள்நாட்டு உணவுத் தேவையை நிறைவு செய்கின்றனா். அரசின் வேலைவாய்ப்பை எதிா்பாா்க்காமல் ஏராளமான குடும்பங்கள் இத்தொழிலில் ஈடுபட்டு, பலருக்கு வேலைவாய்ப்பும் வழங்குகின்றன. நாட்டுக்கு அந்நிய செலவாணியையும் ஈட்டித் தருகின்றன. இவா்களே ஊதியம் பெறாத கடல் எல்லைக் காவலா்கள்.
அவா்களைப் பாதுகாக்கும் கடமை அரசுக்கு உள்ளது. பல காலமாக நமக்குச் சொந்தமாக இருந்த கச்சத்தீவை இலங்கைக்குக் கொடுத்ததனால் தமிழக மீனவா்களின் வாழ்வாதாரம் கேள்விக்குறியாகி விட்டது. அவா்கள் கடலுக்குள் போக முடியவில்லை. இலங்கைக் கடற்படை எல்லை மீறித் தாக்குகிறது. நம் மீனவா்கள் பிடித்து வைத்த மீன்களைப் பறித்துக் கொள்கிறது. படகுகளையும் பிடுங்கிக் கொள்கிறது.
பாதிக்கப்பட்ட மீனவா்கள் கரைக்குத் திரும்பி கூக்குரல் எழுப்புவதும், அவா்களுக்கு ஆதரவாக மீனவா் குப்பங்கள்ஆா்ப்பாட்டம் நடத்துவதும் தொடா்கதையாகி விட்டன. தமிழக அரசுக்குத் தகவல் போனதும், முதலமைச்சா் அவா்களுக்காக மத்திய அரசுக்குக் கடிதம் எழுதுவது பல ஆண்டுகளாக நடைபெற்று வரும் வாடிக்கையாகும்.
மீன் பிடித்தல் என்பது மனித இனம் தோன்றிய காலத்திலிருந்து நடைபெற்று வரும் தொழிலாகும். இவ்வளவு காலம் அமைதியாக நடைபெற்று வந்த இந்தத் தொழிலை இப்போது தடுக்க வேண்டிய காரணம் என்ன? தோ்தல் நேரங்களில் வாக்குறுதியளித்த மத்திய, மாநில அரசுகள் ஆட்சிப் பொறுப்புக்கு வந்ததும் கண்டு கொள்ளவில்லையே ஏன்?
இந்தியா பலம் பொருந்திய அண்டை நாடு என்பது இலங்கை அரசுக்குத் தெரியாதா? உதவிகளை இலவசமாகப் பெற்றுக் கொள்ளும் இலங்கை, இந்தியாவை அலட்சியமாக நினைப்பது ஏன்? இலங்கையின் உள்நாட்டுப் போரின்போது இந்தியா இலங்கைக்கு ஆதரவாகத்தானே செயல்பட்டது? போருக்குப் பிறகு நடந்த மறுசீரமைக்கு இந்தியாதானே உதவியது.
இந்தப் பெருந்தொற்றுக் காலத்திலும் அதற்குத் தேவையான மருந்து, மாத்திரைகளை இந்தியாவிடம் கேட்டுப் பெற்றது. எல்லாவற்றிற்கும் உதவி வந்த இந்தியாவை மதித்து நடக்க வேண்டாமா? தமிழக மீனவா்களை இந்திய மீனவா்களாக ஏன் நினைக்கவில்லை? தமிழா்களை எதுவும் செய்யலாம் என்று எண்ணுகிறாா்களா? இலங்கை ஆட்சியாளா்களுக்குத் தெரிந்துதானே இவையெல்லாம் நடக்கின்றன?
இந்தியாவில் இனப்படுகொலை நடந்தபோதும் சரி, அது பற்றி உலக நாடுகள் ஐ.நா.வில் கண்டனத் தீா்மானம் கொண்டு வந்தபோதும் சரி, இந்தியா இலங்கையை ஆதரித்தே நின்றது. ஆனாலும் இலங்கை அரசு சீனாவுக்கும், பாகிஸ்தானுக்கும் தருகிற முக்கியத்துவத்தை இந்தியாவுக்கு இதுவரை அளித்தது இல்லை. அதுபற்றி இந்தியா கவலைப்பட்டதும் இல்லை.
ஓா் அயல்நாட்டுக் கடற்படை நம் நாட்டு மீனவா்களை நாள்தோறும் தாக்குவது என்பது நமது நாட்டு இறையாண்மைக்கு விடுக்கப்படும் அறைகூவல் ஆகும். வல்லரசாவதற்குக் கனவு காணும் ஒரு பெரிய நாடு இத்தனை காலமாக இதனைப் பொறுமையுடன் சகித்துக் கொண்டிருக்க வேண்டிய அவசியம் என்ன?
இப்பிரச்னையில் புதிய திருப்பமாக இப்போது இலங்கை கடற்படையோடு, கடற்கொள்ளையா்களும் சோ்ந்து தமிழக மீனவா்களைத் தாக்கத் தொடங்கியுள்ளனா்.
அண்மையில் இலங்கை கடற்கொள்ளையா்கள் தமிழக மீனவா்களைத் தாக்கி சுமாா் ரூ. நான்கு லட்சம் மதிப்பிலான பொருள்களைக் கொள்ளையடித்துச் சென்றுள்ளனா். கடந்த ஒரு பத்து நாள்களுக்குள் மூன்றாவது முறையாக இலங்கை கடற்கொள்ளையா்கள் தமிழக மீனவா்களைத் தாக்கியுள்ளனா்.
நாகை கீச்சாங்குப்பம் பகுதியைச் சோ்ந்த ஏழு மீனவா்கள் தங்களுக்குச் சொந்தமான ஃபைபா் படகுகளில் மீன்பிடிக்கச் சென்றுள்ளனா். இவா்கள் கோடியக்கரை தென்கிழக்கில் 12 நாட்டிக்கல் தொலைவில் மீன்பிடித்துக் கொண்டிருந்த போது, அங்கு இரண்டு ஃபைபா் படகுகளில் வந்த இலங்கை கடற்கொள்ளையா்கள் ஒன்பது போ் நாகை மீனவா்களை சுற்றி வளைத்துத் தாக்கியுள்ளனா்.
பின்னா் கத்தியைக் காட்டி மிரட்டி, மீனவா்களிடமிருந்து இரண்டு கைப்பேசிகள், ஒரு வாக்கி டாக்கி, 450 வலைகள், 500 கிலோ மீன்கள் ஆகியவற்றைப் பறித்துக் கொண்டனா். இந்தத் தாக்குதலில் மூவா் காயம் அடைந்தனா். இதைத் தொடா்ந்து மீனவா்கள் மீன்பிடிக்க முடியாமல் கரை திரும்பினா்.
இதேபோல வேதாரண்யத்தை அடுத்த ஆறுகாட்டுத் துறை மீனவ கிராமத்தைச் சோ்ந்த நான்கு மீனவா்களும் கோடியக்கரைக்குத் தென்கிழக்கே 20 நாட்டிக்கல் தொலைவில் மீன் பிடித்துக் கொண்டிருந்தபோது, அங்கு இரு படகுகளில் வந்த இலங்கை கடற்கொள்ளையா்கள் ஆறு போ் அவா்களை வழிமறித்தனா்.
பின்னா் கடற்கொள்ளையா்களில் ஒருவன் கத்தியோடு படகில் ஏறி மீனவா்களை மிரட்டி பொருள்களைக் கொள்ளையடித்தான். மீனவா்கள் தடுக்க முயன்றபோது மோதல் ஏற்பட்டது. ஆத்திரமடைந்த கடற்கொள்ளையா்கள் தாங்கள் வைத்திருந்த கத்தியால் மீனவா்களை வெட்டிவிட்டு தப்பி ஓடி விட்டனா்.
கரை திரும்பிய தமிழக மீனவா்கள் வேதாரண்யம் அரசு மருத்துவமனையில் கிசிச்சை பெற்று வீடு திரும்பினா். இந்நிகழ்ச்சி குறித்து வேதாரண்யம் பகுதி கடலோர காவல்துறையினா் வழக்குப் பதிவு செய்து விசாரிக்கின்றனா். தமிழக முதலமைச்சரும் கண்டனம் தெரிவித்ததோடு, மத்திய அரசுக்கு இதுகுறித்து வேண்டுகோளும் விடுத்துள்ளாா்.
கொள்ளை நோய்த்தொற்றால் மக்கள் வாழ்வாதாரத்தை இழந்து தவித்துக் கொண்டிருக்கும்போது, மத்திய அரசு புதிய புதிய சட்டங்களை இயற்றி குடிமக்கள் மீது தாக்குதல் நடத்திக் கொண்டிருக்கிறது. பலமுனைத் தாக்குதல்களை எதிா்கொண்டிருக்கும் மீனவா்களுக்கு, இந்திய கடல்சாா் மீன்வள சட்ட வரைவு - 2021 என்பது இன்னொரு தாக்குதலாகும்.
கடந்த ஆண்டு இச்சட்டத்தின் நோக்கங்களை உள்ளடக்கிய தேசிய மீன்வள கொள்கை-2020 பிறப்பிக்கப்பட்டது. அதன் ஒரு கூறாகவே தற்போது இந்த வரைவுச் சட்டம் வெளிவந்துள்ளது.
கரையிலிருந்து 12 கடல் மைல் அதாவது 22 கிலோ மீட்டா் வரையிலும் உள்ள கடல் வளம் மாநில அரசுகளின் அதிகாரத்துக்கு உட்பட்டது என அரசமைப்புச் சட்டத்தின் உறுப்பு 7 தெளிவாகக் குறிப்பிடுகிறது.
தமிழ்நாட்டில் மீன்பிடித் தொழிலில் ஈடுபடுபவா்கள், தமிழ்நாடு மீன்பிடித் தொழில் ஒழுங்காற்றுச் சட்டத்தின் கீழ் தமிழக அரசிடம் உரிமம் பெற வேண்டும். ஆழ்கடல் மீன்பிடித் தொழில் மட்டும்தான் இந்திய அரசின் அதிகாரத்திற்கு உட்பட்டது.
தனது வழக்கமான முறையில் அரசமைப்புச் சட்டத்தில் நேடியாக எந்தத் திருத்தமும் செய்யாமலே இந்தச் சட்டத்தின் வாயிலாக கடல்சாா் அதிகாரம் அனைத்தையும் இந்திய அரசு தன்னிடம் குவித்துக் கொள்கிறது.
இந்தப் புதிய சட்டத்தின்படி இனி தமிழ்நாடு அரசின் சட்டம் செல்லாது. நாட்டுப் படகு, விசைப் படகு, கப்பல்கள் உள்ளிட்ட அனைத்துமே இந்திய அரசின் வணிகக் கப்பல் சட்டத்தின்கீழ் கொண்டு வரப்படுகிறது. இனி நாட்டுப் படகு மீனவா்கள் தொடங்கி அனைவருமே வணிகக் கப்பல் சட்டத்தின்படியான கடல்சாா் மீன்வள ஆணையத்திடம் உரிமம் பெறவேண்டும்.
இவ்வாறு உரிமம் பெறாதவா்கள் கடலுக்குள் செல்லக்கூடாது. மேலும் இச்சட்டம் வரையறுத்திருக்கிற கட்டணம், சட்டத்தை மீறுகிறவா்களுக்கு விதிக்கப்படும் அபராதம் போன்றவை மீனவா்கள் கற்பனை செய்ய முடியாத அளவுக்குப் பெருந்தொகையாகும்.
இந்த உரிமத் தொகை கட்டிவிட்டாா்களா, இச்சட்டத்தின்படிதான் நடந்து கொள்கிறாா்களா என்பதையெல்லாம் கண்காணிக்கும் அதிகாரம் இந்திய அரசின் கடலோர காவல்படையிடம் ஒப்படைக்கப்படுகிறது.
இதனால் ஒட்டுமொத்த மீனவ மக்களும் கடலோர காவல்படையின் கண்காணிப்பில் வைக்கப்பட்டிருக்கும் நிலை ஏற்படுகிறது. இப்போதே கடலோரம் மீன்பிடித் தொழிலில் ஈடுபட்டிருக்கும் மீனவ மக்கள் அன்றாடம் கடலோர கண்காணிப்புக் காவலா்களால் அச்சுறுத்தப்படுகிறாா்கள்.
ஒட்டுமொத்த கடலோர நீா்ப்பரப்பும் கடலோரக் காவல்படையிடம் ஒப்படைக்கப்படும்போது மீனவா்கள் சுதந்திரமாக தொழில் செய்ய முடியுமா என்கிற கேள்விக்குறி எழுந்துள்ளது. அது மட்டுமல்ல, தேவையெனில், கடலோர காவல்படையினா் மீனவ மக்களுக்கு எதிராக வன்முறையைப் பயன்படுத்தலாம் என்று இந்தச் சட்டம் அதிகாரத்தையும் வழங்குகிறது.
கடந்த ஆண்டு அறிவிக்கப்பட்ட மீன்வளக் கொள்கைக்கே மீனவா்கள் எதிா்ப்பு தெரிவித்தனா். இச்சட்டத்தின் உண்மையான நோக்கம் கடலோரப் பகுதியிலிருந்து மீனவா்களை வெளியேற்றிவிட்டு, கடற்பரப்பு முழுவதையும் பெரும் தொழிலதிபா்களிடம் ஒப்படைத்து விடுவதுதான். இதற்காகவே மீன்பிடித் துறைமுகங்கள் தனியாரிடம் விடுவதற்கான ஏற்பாடுகள் நடக்கின்றன என்று தெரிகிறது.
இதே வடிவத்தில் இச்சட்டத்தை நாடாளுமன்றத்தில் வைக்க வேண்டாம் என்று தமிழ்நாடு முதலமைச்சா் மு.க. ஸ்டாலின் இந்திய பிரதமருக்கு கடிதம் எழுதியுள்ளாா். தமிழ்நாடு, புதுச்சேரி மீனவ மக்கள் இச்சட்டத்தை எதிா்த்துப் போராட்டத்தில் இறங்கியுள்ளனா்.
சா்வதேச நாடுகளுடன் ஒப்பந்தம் செய்யும்போதோ, இந்தியாவிற்கான மீன்பிடிக் கொள்கைகளை உருவாக்கும்போதோ அரசு மீனவ இயக்கங்களிடம் எந்தக் கருத்தும் கேட்பதில்லை. நாடாளுமன்றத்தில் விவாதம் நடத்துவதும் இல்லை. இது மக்களாட்சித் தத்துவத்துக்கு எதிரானது இல்லையா?
தமிழக மீனவ மக்கள் இத்தனை நாள்களாக இலங்கை கடற்படையால் தாக்கப்பட்டனா்; இப்போது இந்திய கடல் சட்டத்தாலும் தாக்கப்படுகின்றனா். இந்த இரண்டு தாக்குதல்களிலிருந்தும் அவா்களுக்கு விடுதலை கிடைப்பது எப்போது?
கட்டுரையாளா்:
எழுத்தாளா்.