Enable Javscript for better performance
பாவம், மாணவர்கள்!- Dinamani

சுடச்சுட

    

    மத்திய இடைநிலைக் கல்வி வாரியத்தில் பத்தாம் வகுப்பு, பன்னிரண்டாம் வகுப்புத் தேர்வுகளுக்கான கேள்வித் தாள்கள், தேர்வுக்கு முன்பே கட்செவி அஞ்சல் மூலம் வெளியாகியிருப்பது பேரதிர்ச்சியை ஏற்படுத்தியிருக்கிறது. மாநில அரசுகளின் பள்ளிக் கல்வித் துறையினர் கவனக் குறைவாக செயல்படுவார்கள் என்றும், மத்திய இடைநிலைக் கல்வி வாரியம் மிகவும் சிறப்பாக செயல்படும் அமைப்பு என்பது போலவும் நிலவும் தோற்றம் உடைக்கப்பட்டிருக்கிறது.
    கடந்த புதன்கிழமை 10-ஆம் வகுப்பு கணிதப் பாடத்துக்கான தேர்வு முடிந்த அடுத்த 90 நிமிடங்களில், அந்தத் தேர்வை ரத்து செய்திருப்பதாக, மத்திய இடைநிலைக் கல்வி வாரியம் தெரிவித்திருக்கிறது. பத்தாம் வகுப்புக்கான கணிதப் பாடத்துக்கும், பிளஸ் டூ என்று அழைக்கப்படும் 12-ஆம் வகுப்புக்குமான பொருளாதாரப் பாடத்துக்கும் விரைவில் மறுதேர்வு நடத்தப்படும் என்று வாரியம் அறிவித்திருக்கிறது. அதற்குக் கூறப்படும் காரணம், தேர்வுக்கு முன்பே கேள்வித்தாள் வெளியில் கசிந்துவிட்டிருந்ததுதான்.
    கடந்த எட்டு ஆண்டுகளாக, பத்தாம் வகுப்புக்குப் பொதுத் தேர்வு நடத்தாமல் இருந்த மத்திய இடைநிலைக் கல்வி வாரியம், இந்த ஆண்டு முதல்தான் மீண்டும் பொதுத் தேர்வு முறையை அறிமுகப்படுத்தியிருக்கிறது. இந்த நிலையில், தேர்வுக்கான கேள்வித் தாள் கசிந்துவிட்டிருப்பது, மத்திய இடைநிலைக் கல்வி வாரியத்தின் நம்பகத்தன்மையையும், செயல்பாட்டையும் கேள்விக்குள்ளாக்கி இருப்பதில் வியப்பில்லை.
    வெளியில் கசிந்துவிட்டிருந்த பத்தாம் வகுப்பு கணிதப் பாட கேள்வித்தாள், தேர்வுக்கு முந்தைய தினமான செவ்வாய்க்கிழமை வாரியத்தின் தலைவர் அலுவலகத்துக்கே அனுப்பித் தரப்பட்டிருக்கிறது. கசிந்துவிட்ட கேள்வித் தாளைப் பார்த்து நலம் விரும்பி ஒருவர் அதை அனுப்பி இருந்தாரா, அல்லது 'உங்களால் பிடிக்க முடிந்தால் பிடியுங்கள்' என்று கேள்வித் தாளைக் கசியவிட்ட கும்பல் வாரியத்துக்கு சவால்விட்டதா என்று புரியவில்லை. ஒருநாள் முன்பே கசிந்துவிட்ட கேள்வித் தாள் வாரியத்துக்குக் கிடைத்தும்கூட, உடனடியாகத் தேர்வை ரத்து செய்யாதது ஏன் என்பதும் புரியவில்லை.
    கணக்கும் பொருளாதாரமும் மட்டுமல்ல, ஏனைய சில பாடங்களுக்கான கேள்வித் தாள்களும் இந்த ஆண்டு முன்கூட்டியே கசிந்திருப்பதாகக் கூறப்படுகிறது. பன்னிரண்டாம் வகுப்புக்கான இயற்பியல் பாடத்தின் கேள்வித் தாளும் கசிந்ததாகத் தெரிகிறது. தில்லி துணை முதல்வர் இது குறித்து விசாரணைக்கு உத்தரவிட்டிருக்கிறார்.
    தில்லிக்கு, ஏனைய இந்தியாவுக்கு, வெளிநாடுகளில் உள்ள 'சிபிஎஸ்இ' பாடத்திட்டப் பள்ளிகளுக்கு, பாதுகாப்புக்கு என்று ஆண்டுதோறும் மத்திய இடைநிலைக் கல்வி வாரியம் நான்கு வெவ்வேறு கேள்வித் தாள்களைத் தயாரிப்பது வழக்கம். இந்த ஆண்டு அந்த நடைமுறை தவிர்க்கப்பட்டு, அத்தனை மத்திய இடைநிலைக் கல்வி வாரிய மாணவர்களுக்கும் ஒரேவிதமான கேள்வித் தாள்கள் மட்டுமே தயாரிக்கப்பட்டன. அதனால், கேள்வித் தாள் கசிந்துவிட்டது என்பது தெரிந்தவுடன், அதை மாற்றி, கைவசம் பாதுகாப்புக்காக வைத்திருக்கும் மாற்றுக் கேள்வித் தாளை வழங்க முடியாத நிலை ஏற்பட்டுவிட்டது.
    கடந்த மார்ச் 5-ஆம் தேதி முதல் ஏப்ரல் 13-ஆம் தேதி வரை நடக்கும் தேர்வுகளில், பத்தாம் வகுப்புக்கு 16, 38,428 மாணவர்களும், பன்னிரண்டாம் வகுப்புக்கு 11,86,306 மாணவர்களும் தேர்வு எழுதுகிறார்கள். ஏறத்தாழ 27 லட்சம் பேர் எழுதும் தேர்வை, கேள்வித் தாள் கசிந்துவிடாமல் கவனமாக நடத்த வேண்டிய மத்திய இடைநிலைக் கல்வி வாரியம் இப்போது, மறு தேர்வு நடத்தித் தனது கெளரவத்தை நிலைநிறுத்திக் கொள்ளும் முயற்சியில் இறங்கி இருக்கிறது.
    சமூக வலைதளங்களால் ஏற்படும் நன்மைகளைவிட பாதிப்புகள்தான் அதிகம் என்பதற்கு, கேள்வித் தாள் கசிந்திருப்பது இன்னொரு எடுத்துக்காட்டு. எல்லைகளைக் கடந்து மின்னல் வேகத்தில் பரவும் அசுர சக்தி படைத்த கட்செவி அஞ்சல் (வாட்ஸ் ஆப்) மூலம் கேள்வித் தாள் கசியவிடப்பட்டிருப்பதால், பாதிப்பு எந்த அளவிலானது என்பதை வாரியத்தால் தீர்மானிக்க முடியவில்லை. கணிதம், பொருளாதாரம், கணக்கியல் ஆகியவற்றில் குற்றச்சாட்டு எழுந்திருக்கின்றன என்றாலும், பாதிப்பு எத்தகையது என்பதை இப்போதே நாம் உறுதியாகச் சொல்லிவிட முடியாது.
    மத்திய இடைநிலைக் கல்வி வாரியத்தில் கேள்வித் தாள் கசிவது என்பது புதிதொன்றுமல்ல. 2006-இல் வாராணசி குண்டுவெடிப்பு தொடர்பாக சந்தேகிக்கப்பட்ட சிலரை விசாரணை செய்தபோது, அவர்களிடமிருந்து கேள்வித் தாள்கள் சில கைப்பற்றப்பட்டன. 2011-இல் பன்னிரண்டாம் வகுப்புக்கான அறிவியல், கணிதம் ஆகிய பாடங்களின் கேள்வித் தாள்கள் பொதுவெளியில் கசிந்தது கண்டுபிடிக்கப்பட்டது.
    மத்திய மனிதவள மேம்பாட்டுத் துறை அமைச்சர், கல்வி வாரியத்தின் நம்பகத்தன்மை காப்பாற்றப்படும் என்று உறுதி அளித்திருக்கிறரே தவிர, இந்தக் கசிவுக்கு வாரியத்தின் உயரதிகாரிகள் யாரையும் பொறுப்பேற்கச் செய்யவோ, அவர்களை அகற்றி நிறுத்தி விசாரணைக்கு உத்தரவிடவோ முன்வரவில்லை என்பது வேதனை அளிக்கிறது.
    தில்லியில் கசிந்துவிட்டிருக்கும் கேள்வித் தாள்களுக்காக ஒட்டுமொத்த இந்தியாவில் மறுதேர்வு நடத்தி அத்தனை மாணவர்களையும் பழி வாங்கிவிடக் கூடாது. கடினமான உழைப்புக்குப் பிறகு தேர்வு எழுதி முடித்து, நிம்மதிப் பெருமூச்சுவிட்ட மாணவர்களை, மீண்டும் இன்னொரு முறை தேர்வு எழுதச் சொல்வது நியாயமில்லை. கவனச் சிதைவு ஏற்பட்டுவிட்ட நிலையில் அவர்களால் மீண்டும் பழையதுபோல தேர்வு எழுத முடியுமா என்பதும் சந்தேகம்தான். மத்திய இடைநிலைக் கல்வி வாரியத்தின் கவனக் குறைவுக்கும், பொறுப்பற்றத்தனத்துக்கும் ஒட்டுமொத்த மாணவ சமுதாயத்தையும் பழிவாங்க முற்படுவது ஏற்புடையதல்ல!
     

    • அதிகம்
      படிக்கப்பட்டவை
    • அதிகம்
      பகிரப்பட்டவை
    google_play app_store
    kattana sevai