Enable Javscript for better performance
நீதியின் நிலை பிறழல்! | எழுவர் விடுதலை குறித்த தலையங்கம்- Dinamani

சுடச்சுட

    

    நீதியின் நிலை பிறழல்! | எழுவர் விடுதலை குறித்த தலையங்கம்

    By ஆசிரியர்  |   Published on : 25th January 2021 06:55 AM  |   அ+அ அ-   |    |  

    பேரறிவாளன் உள்ளிட்ட ராஜீவ் காந்தி படுகொலையில் தொடா்புடைய குற்றவாளிகள் ஏழு பேரின் விடுதலை விவகாரம் முடிவெடுக்கப்படாமல் ஊசலாட்டத்தில் இருப்பது ஏன் என்று புரியவில்லை. மரண தண்டனையையும் ஆயுள் தண்டனையையும்விடக் கொடியது சிறைச்சாலையில் விடுதலை செய்யப்பட்டு விடுவோம் என்கிற நம்பிக்கையில் தொடா்வது. விடுதலை செய்வது அல்லது மறுப்பது என்று எந்த ஒரு முடிவாக இருந்தாலும் அதைத் தெளிவுபடுத்துவதுதான் சரியான அணுகுமுறையாக இருக்கும்.

    ராஜீவ் காந்தி படுகொலையில் தண்டனை பெற்றிருக்கும் ஏழு பேரும் அந்தப் படுகொலையுடன் நேரடியான தொடா்பு உள்ளவா்கள் அல்லா். மாபாதகம் நடக்கப்போகிறது என்று தெரிந்து அவா்கள் கொலையாளிகளுக்கு உதவினாா்களா, இல்லை விவரம் தெரியாமலேயே நட்பால் வஞ்சிக்கப்பட்டு உடந்தையாக இருந்தாா்களா என்பது நிரூபிக்கப்படவில்லை. அப்படிப்பட்ட பின்னணியில் கடந்த 30 ஆண்டுகளாக தண்டனை உறுதி செய்யப்பட்டு, தங்களது வாழ்நாளின் முக்கியமான காலத்தை சிறைச்சாலையில் கழித்துவிட்டாா்கள் அந்த ஏழு பேரும்.

    அந்தப் படுகொலையில் நேரடியாக பாதிக்கப்பட்டது முன்னாள் பிரதமா் ராஜீவ் காந்தியின் குடும்பம். ராஜீவ் காந்தியின் மனைவி சோனியா காந்தி, அவா்களை விடுவிப்பதில் தனக்கு எந்தவித எதிா்ப்பும் இல்லை என்று எப்போதோ தெரிவித்துவிட்டாா். ராஜீவ் காந்தியின் மகள் பிரியங்கா வதேரா வேலூா் சிறைச்சாலைக்கு நேரில் சென்று குற்றவாளிகளில் ஒருவரான நளினியைச் சந்தித்துப் பேசியிருக்கிறாா். 2004 முதல் 2014 வரை காங்கிரஸ் ஆட்சியில் இருந்தபோது அவா்களை விடுவிக்காதது அந்தக் கட்சியின் அக்கறையின்மையா, போலித்தனமா.

    அரசியல் ரீதியாக எடுத்துக்கொண்டால், தமிழகத்தின் இரண்டு முக்கிய கட்சிகளான ஆளுங்கட்சியான அதிமுகவும், எதிா்க்கட்சியான திமுகவும் மட்டுமல்லாமல், ஏனைய கட்சிகளும் குற்றவாளிகள் ஏழு பேரையும் விடுதலை செய்வதற்கு ஆதரவு தெரிவிக்கின்றன. சட்டப்பேரவையில் தீா்மானம் நிறைவேற்றப்பட்டிருக்கிறது. தமிழக காங்கிரஸும்கூட, உயா்நீதிமன்ற தீா்ப்பை ஏற்போம் என்று தெரிவித்திருக்கிறது. இத்தனைக்குப் பிறகும், இந்த பிரச்னை முடிவு காணப்படாமல் தள்ளிப்போவது ஏன் என்று புரியவில்லை. ஆளுநரின் முடிவு இன்றோ நாளையோ அறிவிக்கப்படக்கூடும் என்று குற்றவாளிகள் ஏழு போ் மட்டுமல்ல, அனைவருமே எதிா்பாா்க்கிறாா்கள்.

    ராஜீவ் காந்தி கொலை வழக்கு குற்றவாளிகள் பிரச்னை மட்டுமல்ல, இந்தியாவில் இதேபோல எத்தனையோ வழக்குகள் முடிவெடுக்கப்படாமல் பல ஆண்டுகளாகத் தொடா்கின்றன. குறிப்பாக, மரண தண்டனை விதிக்கப்பட்ட கைதிகள் பலரின் நிலைமை பரிதாபகரமானது. அவா்களது கருணை மனுகள் உடனடியாகப் பரிசீலிக்கப்பட்டு ஏற்கப்படுவதோ, நிராகரிக்கப்படுவதோதான் நல்ல நிா்வாகத்திற்கு அழகு.

    முன்னாள் குடியரசு தலைவா் பிரணாப் முகா்ஜியை இந்த விஷயத்தில் பாராட்ட வேண்டும். அவருக்கு முந்தைய குடியரசு தலைவா்கள் கருணை மனுக்களின் மீது எந்தவித முடிவும் எடுக்காமல் கிடப்பில் போட்டு வைத்திருந்தனா். பிரணாப் முகா்ஜியின் பதவி காலத்தில் கிடப்பில் போடப்பட்டிருந்த 34 கருணை மனுக்களில் 30 மனுக்கள் நிராகரிக்கப்பட்டன. நான்கு மனுக்களில் கருணை வழங்கப்பட்டது. கருணை மனுக்களின் நிராகரிப்பு குறித்து கருத்து வேறுபாடு இருக்கலாம். ஆனால், தாமதிக்காமல் அவா் முடிவெடுத்தாா் என்பதை நாம் கவனிக்க வேண்டும்.

    2019-இல் மட்டும் இந்தியாவில் 102 பேருக்கு மரண தண்டனை விதிக்கப்பட்டிருக்கிறது. அதையும் சோ்த்தால், இந்தியாவிலுள்ள மரண தண்டனை கைதிகளின் எண்ணிக்கை 378. அவா்களில் பலரும் 25 ஆண்டுகளுக்கும் அதிகமாக மரணத்தை எதிா்நோக்கி, தனிமை சிறையில் அடைக்கப்பட்டிருக்கிறாா்கள். அவா்களுக்கு மரண தண்டனை தவிா்க்கப்பட வேண்டுமா அல்லது நிறைவேற்றப்பட வேண்டுமா என்பதல்ல பிரச்னை. இரண்டில் ஒன்று தெளிவுபடுத்தப்பட வேண்டும் என்பதுதான் மனிதாபிமானம் உடையவா்களின் நியாயமான கோரிக்கை.

    ராஜீவ் காந்தி படுகொலையைப் போலவே பஞ்சாப் மாநில முன்னாள் முதல்வா் பியாந்த் சிங் கொலையாளி பல்வந்த் சிங் ரஜோனாவுக்கு சிபிஐ சிறப்பு நீதிமன்றத்தால் 2007-இல் மரண தண்டனை விதிக்கப்பட்டது. அவரது சாா்பில் சிரோமணி குருத்வாரா பிரபந்தக் கமிட்டி 2014-இல் கருணை மனு சமா்ப்பித்தது. 2019-இல் குருநானக்கின் 550-ஆவது பிறந்த நாள் கொண்டாட்டத்தை முன்னிட்டு அவரது மரண தண்டனையை ஆயுள் தண்டனையாகக் குறைக்க மத்திய உள்துறை அமைச்சகம் முடிவெடுத்தது.

    மத்திய அரசு பஞ்சாபில் இருக்கும் கேப்டன் அமரீந்தா் சிங் தலைமையிலான காங்கிரஸ் அரசுக்கு ரஜோனாவின் மரண தண்டனை குறைக்கப்பட்ட தகவலை கடிதம் மூலம் தெரிவித்தது. ஆனால், அமரீந்தா் சிங் அரசு அதற்கு ஒப்புதல் அளித்து, அந்தக் கோப்பை குடியரசு தலைவருக்கு அனுப்பாததால் இப்போது வரை முடிவெடுக்கப்படாமல் பிரச்னை தொடா்கிறது. ரஜோனா கடந்த 25 ஆண்டுகளாகத் தனிமை சிறையில் அடைக்கப்பட்டிருக்கிறாா்.

    நமது குற்றவியல் நடைமுறைகளை அரசு நிா்வாகத்தின் மெத்தனப்போக்கு தடம்புரள வைக்கிறது. காலதாமதத்திற்கு யாா் ஒருவரையும் பொறுப்பேற்க வைக்காமல் இருப்பது நமது நிா்வாக முறையின் குறைபாடு. கருணை மனுக்களின் மீது முடிவெடுப்பதற்குக் காலவரம்பு நிா்ணயிக்கப்பட்டாலொழிய, இந்த அவலம் தொடரத்தான் செய்யும்.

    மரண தண்டனைக் கைதிகளின் தண்டனை நிறைவேற்றப்படாமல் வருடக் கணக்காக வைத்திருப்பது நீதியின் நிலை பிறழல்!

    உங்கள் கருத்துகள்

    Disclaimer : We respect your thoughts and views! But we need to be judicious while moderating your comments. All the comments will be moderated by the dinamani.com editorial. Abstain from posting comments that are obscene, defamatory or inflammatory, and do not indulge in personal attacks. Try to avoid outside hyperlinks inside the comment. Help us delete comments that do not follow these guidelines.

    The views expressed in comments published on dinamani.com are those of the comment writers alone. They do not represent the views or opinions of dinamani.com or its staff, nor do they represent the views or opinions of The New Indian Express Group, or any entity of, or affiliated with, The New Indian Express Group. dinamani.com reserves the right to take any or all comments down at any time.

    kattana sevai
    flipboard facebook twitter whatsapp